30ଲକ୍ଷ ଟଙ୍କାର ବ୍ରାଉନସୁଗାର ଜବତ, ଜଣେ ଗିରଫ

ବାଲେଶ୍ବରରେ 305 ଗ୍ରାମର ବ୍ରାଉନ ସୁଗାର ଜବତ । ଯାହାର ମୂଲ୍ୟ 30 ଲକ୍ଷ ଟଙ୍କା ହୋଇଥିବାବେଳେ ଜଣକୁ ଗିରଫ କରିଛି ଅବକାରୀ ବିଭାଗ ।

ବାଲେଶ୍ବର: ପୁଣି ଜବତ ହେଲା ବିପୁଳ ପରିମାଣର ବ୍ରାଉନ ସୁଗାର । କେନ୍ଦ୍ରୀୟ ଓ ଜଳେଶ୍ବର ଅବକାରୀ ବିଭାଗର ମିଳିତ ଉଦ୍ୟମରେ ଚଢାଉ କରାଯାଇ 305 ଗ୍ରାମର ବ୍ରାଉନ ସୁଗାର ଜବତ ହୋଇଛି। ଯାହାର ଆନୂମାନିକ ମୂଲ୍ୟ 30 ଲକ୍ଷରୁ ଉର୍ଦ୍ଧ୍ବ ହେବା ବୋଲି ଜଣାପଡିଛି ।

ଜଳେଶ୍ବର ଷ୍ଟେସନ ବଜାର ସ୍ଥିତ ସେକ ବାଡି ଅଞ୍ଚଳରେ କେନ୍ଦ୍ରୀୟ ଅବକାରୀ ବିଭାଗ ୟୁନିଟ-2 ଓ ଜଳେଶ୍ବର ଅବକାରୀ ବିଭାଗ ମିଳିତ ଭାବେ ଚଢାଉ କରିଥିଲେ । ଚଢାଉ ବେଳେ ବ୍ରାଉନ ସୁଗାର ଜବତ କରିବା ସହ ଜଣେ ବ୍ୟକ୍ତିଙ୍କୁ ଗିରଫ କରିଛି ବିଭାଗ ।

ଗିରଫ ବ୍ୟକ୍ତି ଜଣକ ହେଲେ ସେକ ବାଡି ଅଞ୍ଚଳର ସପନ କୁମାର ପ୍ରଧାନ । ସପନ ଦୀର୍ଘ 2 ବର୍ଷ ଧରି ଚୁଇଁ ନାମକ ଜଣେ ଯୁବକକୁ ଭଡାରେ ରଖିଥିଲେ । ଯିଏ ବ୍ରାଉନ ସୁଗାର ବେପାରରେ ଜଡିତ ଥିଲା । ସେପଟେ, ବ୍ୟବସାୟରେ ସମ୍ପୃକ୍ତ ବ୍ୟକ୍ତିଙ୍କୁ ଧରିବାରେ ଅସମର୍ଥ ହୋଇଥିବାବେଳେ ଘରମାଲିକକୁ ଗିରଫ କରିଛି ଅବକାରୀ ବିଭାଗ ।

ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ