ବାଲେଶ୍ବର: ସମ୍ପତ୍ତି ଉପରେ ପୁଅ ବୋହୂଙ୍କ ନଜର ରହିଛି, ଜନ୍ମ କରିଥିବା ପୁଅ ପାଖରେ ସୁରକ୍ଷା ନାହିଁ । ଏମିତି କିଛି ଅଭିଯୋଗ ନେଇ ଆଜି(ଶୁକ୍ରବାର) ଜଣେ ମାଆ ପହଞ୍ଚିଛନ୍ତି ପ୍ରଶାସନ ନିକଟରେ । ବାର୍ଦ୍ଧକ୍ୟ ସମୟରେ ପୁଅ ପରକରି ଦେବାରୁ ସହାୟତା ପାଇଁ ପ୍ରଶାସନ ନିକଟରେ ପହଞ୍ଚିଛନ୍ତି ମହିଳା । ସୂଚନା ଅନୁସାରେ, ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ଦକ୍ଷିଣ ପଡ଼ା ଗାଁର ବାସନ୍ତୀ ପାତ୍ରଙ୍କ ସ୍ୱାମୀଙ୍କ ମୃତ୍ୟୁ ପରେ ବାର୍ଦ୍ଧକ୍ୟ ଭତ୍ତାରେ ଚଳୁଛନ୍ତି ।
ଅସହାୟ ମାଆ ମାଗୁଛି ନ୍ୟାୟ, ପୁଅ ବୋହୂଙ୍କ ନିର୍ଯାତନା ହେଉଛି ଅସହ୍ୟ
ତାଙ୍କର ଦୁଇପୁଅ ଓ ଜଣେ ଝିଅ । ଝିଅଙ୍କ ବାହାଘର ହୋଇ ସାରି ଥିବାବେଳେ ଦୁଇପୁଅ ଏବେ ମାଆଙ୍କ ସମ୍ପତ୍ତି ଉପରେ ଲୋଭ ରଖିଥିବା ଅଭିଯୋଗ କରିଛନ୍ତି । ସ୍ୱାମୀଙ୍କ ମୃତ୍ୟୁ ପୂର୍ବରୁ ବାସନ୍ତୀଙ୍କ ନାମରେ ବ୍ୟାଙ୍କରେ ଦୁଇ ଲକ୍ଷ ଟଙ୍କା ଫିକ୍ସ ଡିପୋଜିଟ ରଖିଥିଲେ । 6 ବର୍ଷ ଧରି ଏହି ଡିପୋଜିଟରୁ ମିଳୁଥିବା ସୁଧ ବାସନ୍ତୀଙ୍କ ବ୍ୟାଙ୍କ ଖାତାକୁ ଆସୁଥିଲା । ମାତ୍ର ପୁଅମାନେ ଏହି ସୁଧ ଟଙ୍କା ଓ ବାସନ୍ତୀଙ୍କ ଭତ୍ତା ଟଙ୍କା ନେଇ ଯାଉଥିବା ଅଭିଯୋଗ ଆଣିଛନ୍ତି ବାସନ୍ତୀ ।