ବାଲେଶ୍ଵର: ଜଳେଶ୍ୱର ଅଞ୍ଚଳରୁ ମୁଣ୍ଡ ବିହୀନ କଙ୍କାଳ ଏବଂ ଦୁଇଟି ଗୋଡ ଉଦ୍ଧାର ହୋଇଛି । ସ୍ଥାନୀୟ ଲୋକେ ବିଲରେ ଥିବା ଏକ ବାଲିଗଦା ମଧ୍ୟରେ ହାଡ ବାହାରିଥିବା ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ହାଡ କଙ୍କାଳକୁ ଜବତ କରିଛି ।
ସୂଚନା ଅନୁଯାୟୀ ବାଲେଶ୍ବର ଜିଲ୍ଲା NH 60 ଜାତୀୟ ରାଜପଥ ନିକଟସ୍ଥ ଜମାଲପୁର ଠାରେ ଧାନବିଲକୁ କାମ କରିବା ପାଇଁ ସ୍ଥାନୀୟ ଲୋକ ଯାଉ ଥିବାବେଳେ ସେଠାରେ ଗଚ୍ଛିତ ଥିବା ବାଲି ଭିତରେ ମଣିଷ ଗୋଡ଼ ବାହାରକୁ ଥିବା ଦେଖିବାକୁ ପାଇଥିଲେ । ଏନେଇ ସ୍ଥାନୀୟ ଲୋକେ ଜଳେଶ୍ବର ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଗୋଟିଏ ଗୋଡ଼ ଓ ଅନ୍ୟ କଙ୍କାଳ ଉଦ୍ଧାର କରି ଫୋରେନସିକ ଟେଷ୍ଟ ପାଇଁ ଲାବକୁ ପଠାଇଛି । ତେବେ ମୃତଦେହ ପରିଚୟ ମିଳିପାରି ନ ଥିବାବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
