ବାଲେଶ୍ବର: କୋରୋନା ବଦଳାଇ ଦେଇଛି ଜୀବନଶୈଳୀ। ଜୀବନ ଓ ଜୀବିକାର ସଂଘର୍ଷ ଭିତରେ ମଣିଷ ଯେମିତି ପେଶି ହୋଇଯାଉଥିବା ପରି ମନେ ହେଉଛି। କେଉଁଠି ପାଠ ପଢ଼ୁଆ ଯୁବକଯୁବତୀ ଦୁଇଓଳି ଖାଦ୍ୟ ଯୋଗାଡ଼ ପାଇଁ ପରିବା ବିକୁଛନ୍ତି ତ ଆଉ କେଉଁଠି ଜୀବିକା ବଦଳାଇ ପେଟ ପୋଷିବାର ଉପାୟ ବାଛି ନେଉଛନ୍ତି ଲୋକେ। ସେମିତି କିଛି ଦୃଶ୍ୟ ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ଜଳେଶ୍ବର ବଜାରରେ।
ପରିବାର ପୋଷିବା ପାଇଁ ପରିବା ବିକୁଛନ୍ତି ଷଷ୍ଠ ଶ୍ରେଣୀ ଛାତ୍ରୀ ଜଳେଶ୍ବର ବଜାରରେ ଦେଖିବାକୁ ମିଳିଛି ଏକ ଭିନ୍ନ ଚିତ୍ର। ଜଣେ ଷଷ୍ଠ ଶ୍ରେଣୀ ଛାତ୍ରୀ ପରିବାର ଗୁଜୁରାଣ ମେଣ୍ଟାଇବା ପାଇଁ ବଜାରକୁ ଆସିଥିଲେ ପରିବା ବିକିବା ପାଇଁ। ମାତ୍ର 11 ବର୍ଷ ବୟସରେ ଛାତ୍ରୀଙ୍କ ମୁଣ୍ଡ ଉପରେ ଲଦି ହୋଇଯାଇଛି ପରିବାର ବୋଝ। ପରିବା ବିକି ଦିନକୁ ଯାହା ଦି ପଇସା ରୋଜଗାର ହେଉଛି ସେଥିରେ ପରିବାରର ଚୁଲି ଜଳୁଛି। ବର୍ତ୍ତମାନ ସ୍କୁଲ ବନ୍ଦ ଥିବା ବେଳେ ପାଠ ପଢ଼ାରେ ଏକ ପ୍ରକାର ଡୋରି ବାନ୍ଧିଦେଇ ଛାତ୍ରୀ ଜଣଙ୍କ ପରିବାରର ଦାୟିତ୍ୱ ନେଇଛନ୍ତି। ଖାଲି ସେତିକି ନୁହେଁ ଜଣେ ଇଞ୍ଜିନିୟର ଛାତ୍ର ମଧ୍ୟ ପରିବାରର ଗୁଜୁରାଣ ମେଣ୍ଟାଇବା ପାଇଁ ବଜାରରେ ପରିବା ବିକୁଥିବା ନଜରକୁ ଆସିଥିଲେ। ସତରେ ଏ କୋରୋନା ଆଜି ସମସ୍ତଙ୍କୁ ଅସହାୟ କରି ପକାଇଛି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
