ଲୋକପ୍ରତିନିଧିଙ୍କୁ ବିଡିଓଙ୍କ ଅଣଦେଖା ଅଭିଯୋଗ, ଜିଲ୍ଲାପରିଷଦ ସଭ୍ୟଙ୍କ ଧାରଣା

ବିଡିଓଙ୍କ ବ୍ୟବହାରକୁ ନେଇ ତାତିଲେ ଜିଲ୍ଲାପରିଷଦ ସଭ୍ୟ । ଏନେଇ ବେଲପଡ଼ା ବ୍ଲକ ସମ୍ମୁଖରେ ଆମରଣ ଅନଶନରେ ବସିଛନ୍ତି ଜିଲ୍ଲାପରିଷଦ ସଭ୍ୟମାନେ । ଅଧିକ ପଢ଼ନ୍ତୁ

ବଲାଙ୍ଗୀର: ବଲାଙ୍ଗୀରରେ ଏବେ ଲୋକ ପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ନେଇ ସବୁଠି ବିବାଦ । ଅନୁଦାନ ଟଙ୍କା କାଟି ଦେବା ଓ ଅନିୟମିତତା ନେଇ ଦୁଇ ଜିଲ୍ଲାପରିଷଦ ସଭ୍ୟଙ୍କ ଧାରଣା । ଏହାକୁ ନେଇ ଜିଲ୍ଲାରେ ଏବେ ଲୋକ ପ୍ରତିନିଧି ଓ ପ୍ରଶାସନିକ ଅଧିକାରୀଙ୍କ ମଧ୍ୟରେ ବିବାଦ ତେଜିବାରେ ଲାଗିଛି । ପ୍ରଥମେ ଜିଲ୍ଲାପାଳଙ୍କ ସହିତ କଣ୍ଟାବାଞ୍ଜି ସନ୍ତୋଷ ସିଂହ ଶାଲୁଜାଙ୍କ ମୁହାଁମୁହିଁ ଘଟଣାକୁ ନେଇ ବିବାଦ ଛିଣ୍ଡି ନାହିଁ । ଏଭଳ ସ୍ଥଳେ ଏବେ ପୁଣି ସେ ସମାନ ଅଭିଯୋଗ ନେଇ ଦୁଇ ଜିଲ୍ଲା ପରିଷଦ ସଭ୍ୟ ଧାରଣା ଦେବା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।

ତେବେ ବଲାଙ୍ଗୀର ଜିଲ୍ଲାର ପାଟଣାଗଡ଼ ଓ ବେଲପଡ଼ା ବ୍ଲକ ଅନ୍ତର୍ଗତ 26 ଓ 27 ନମ୍ୱର ଜିଲ୍ଲାପରିଷଦ ସଭ୍ୟମାନେ ଗତ ୨ଦିନ ହେବ ବେଲପଡ଼ା ବ୍ଲକ ସମ୍ମୁଖରେ ଆମରଣ ଅନଶନରେ ବସିଛନ୍ତି । ତାଙ୍କର ଅଭିଯୋଗ ଯେ ଏଠିକାର ବିଡିଓ ନିଜ ମନମୁଖି କାମ କରୁଛନ୍ତି । ବେଆଇନ ଭାବରେ ଜିଲ୍ଲାପରିଷଦ ସଭ୍ୟଙ୍କ ଅନୁଦାନକୁ ବିଡ଼ିଓ କାଟି ଦେଉଛନ୍ତି । ସେହିପରି ବିଭିନ୍ନ ସରକାରୀ ଅନୁଦାନ ଟଙ୍କା ଯଥା ସିଏଫ୍ସି, ଏସଏଫସି ଓ ବିଜୁ କେବିକେ ଟଙ୍କାରେ ବିଡିଓ କିରଥିବାର ଅଭିଯୋଗ ହୋଇଛି । ଏନେଇ ଦୁଇ ଜିଲ୍ଲାପରିଷଦ ସଭ୍ୟ ଧାରଣା ଦେଇଛନ୍ତି ।

ଆନ୍ଦୋଳନରେ ବରିଷ୍ଠ ବିଜେପି ନେତା ତଥା ପୂର୍ବତନ ମନ୍ତ୍ରୀ କନକବର୍ଦ୍ଧନ ସିଂହ ଦେଓ ମଧ୍ୟ ସାମିଲ ହୋଇଛନ୍ତି । ବିଡିଓଙ୍କୁ ଜବାବତଲବ କରିବାସହ ସେ ଲୋକଙ୍କ ଚାକର ଓ ଲୋକଙ୍କ ପାଇଁ କାମ କରନ୍ତୁ ବୋଲି କହିଛନ୍ତି । ସମାନ ଭାବରେ ଓଡ଼ିଶାରେ ମାଆକୁ ସମ୍ମାନ କଥା କୁହାଯାଉଥିବା ବେଳେ ବିଡିଓ ଏଠିକାର ମହିଳା ଜିଲ୍ଲାପରିଷଦ ସଭ୍ୟାଙ୍କୁ ଦୁର୍ବ୍ୟବହାର କାହିଁକି କରୁଛନ୍ତି ବୋଲି ପ୍ରଶ୍ନ କରିଛନ୍ତି ।

ସେପଟେ ଆମରଣଅନଶନରେ ବସିଥିବା ଜିଲ୍ଲାପରିଷଦ ସଭ୍ୟା ଅନିମା ଦାସ ଅଭିଯୋଗ କରିଛନ୍ତି ଯେ ଏଠିକାର ବିଡ଼ିଓ ଭିକ୍ତର ସେନ ସେମାନଙ୍କୁ ଦୁର୍ବ୍ୟବହାର କରୁଛନ୍ତି । ତାଙ୍କ ସେୟାର ଅନୁଦାନ ଟଙ୍କାର ବିଭିନ୍ନ ଉନ୍ନୟନମୂଳକ କାମ ତାଙ୍କୁ ନଜଣାଇ ସ୍ଥାନୀୟ ବିଜେଡି ବିଧାୟକଙ୍କ କର୍ମୀଙ୍କୁ ପ୍ରଦାନ କରିଛନ୍ତି ।

ସେହିପରି ଅଭିଯୋଗ କଲେ ଓଲଟା ଦୁର୍ବ୍ୟବହାର କରୁଥିବାର ସେ ଅଭିଯୋଗ କରିଛନ୍ତି । ଖାଲି ସେତିକି ନୁହେଁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ବଣ୍ଟନରେ ମଧ୍ୟ ସେ ବ୍ୟାପକ ଅନିୟମିତତା କରିଛନ୍ତି । ତଥ୍ୟ ମାଗିଲେ ଓଲଟା ଗାଳି କରୁଛନ୍ତି । ଏଭଳି ଭାବେ ବିଭିନ୍ନ ୮ଦଫା ଦାବି ନେଇ ସେମାନେ ଅନଶନ ଓ ଧାରଣା ଦେଇଥିବା କହିଛନ୍ତି ଆନ୍ଦୋଳନକାରୀ । ସେପଟେ ଏମାନଙ୍କ ସହ ସାମିଲ ହୋଇଛନ୍ତି ରାଜ୍ୟ ବିଜେପି ସମ୍ପାଦକ ଭୃଗୁବକ୍ସି ପାତ୍ର ।

ବିଜେପି ସମ୍ପାଦକ ଅନ୍ୟ କାମରେ ଆସିଥିବା ବେଳେ ଏହି ଅଭାବନୀୟ ଅବସ୍ଥା ଶୁଣି ଆନ୍ଦୋଳନରେ ସାମିଲ ହୋଇଥିଲେ । ଏଠିକାର ବିଡ଼ିଓ ମନମୁଖୀ କାମ କରୁଥିବାବେଳେ ବିନା ଜିଲ୍ଲାପରିଷଦ ସଭ୍ୟ ସଭ୍ୟାଙ୍କ ଅନୁମତି କିମ୍ବା ତାଙ୍କ ସହିତ ଆଲୋଚନା ନ କରି ସେ କାମ କରୁଛନ୍ତି । ମନମୁଖୀ କାମ ସବୁ ପରିବର୍ତ୍ତନ କରିଛନ୍ତି । ସେପଟେ ଓଡ଼ିଶା ମାଆଙ୍କୁ ସମ୍ମାନ କଥା କହୁଥିବା ବେଳେ ଏଠି ବିଡ଼ିଓ ଜଣକ କେମିତି ଏଭଳି ବ୍ୟବହାର କରୁଛନ୍ତି ତାକୁ ବିଜେପି ସମ୍ପାଦକ ପ୍ରଶ୍ନ କରିଛନ୍ତି । ସମାନ ଭାବରେ ବିଡ଼ିଓ ଏଭଳି ଅଧିକାରୀଙ୍କୁ ସରକାର କିଭଳି ପ୍ରୋତ୍ସାହନ ଦେଇଛନ୍ତି ତାହା ବଡ଼ ପ୍ରଶ୍ନ ବୋଲି କହିଛନ୍ତି ।

ଏ ଘଟଣାକୁ ନେଇ ବିଡ଼ିଓଙ୍କୁ ପଚାରିବାରୁ ସେ ଏମାନଙ୍କ ପ୍ରଶ୍ନ ଓ ଦାବି ଉପରେ ରିପୋର୍ଟ ପ୍ରସ୍ତୁତ କରୁଛନ୍ତି । ସମୟ ହେଲେ ସେ ଯାଇ ସେଠି ସେମାନଙ୍କ ସହିତ ଆଲୋଚନା କରିବେ ବୋଲି କହିଛନ୍ତି । ତେବେ ଶେଷ ସୂଚନା ଅନୁସାରେ କିଛି ପ୍ରତିଶ୍ରୁତି ପାଇବା ପରେ ବର୍ତ୍ତମାନ ଧାରଣା ଆନ୍ଦୋଳନ କରୁଥିବା ଜିଲ୍ଲାପରିଷଦ ସଭ୍ୟ ଓ ସଭ୍ୟା ତଥା ତାଙ୍କର ସମର୍ଥକମାନେ ଆନ୍ଦୋଳନରୁ ଓହରି ଯାଇଛନ୍ତି । ସେପଟେ ବଲାଙ୍ଗୀରରେ ଏବେ ଲୋକପ୍ରତିନିଧି ଓ ପ୍ରଶାସନିକ ଅଧିକାରୀ ମୁହାଁମୁହିଁ ହେବା ଆଗକୁ କେଉଁ ମୋଡ଼ ନେବ ତାହା ଦେଖିବାକୁ ବାକି ରହିଲା ।

ଇଟିଭି ଭାରତ, ବଲାଙ୍ଗୀର