ବଲାଙ୍ଗୀର: ପ୍ରେମିକାକୁ ଦୁଷ୍କର୍ମ ପରେ ହତ୍ୟା ଉଦ୍ୟମ କଲା ପ୍ରେମିକ । ଅଭିଯୁକ୍ତ ପ୍ରେମିକକୁ ଗିରଫ କଲା ପୋଲିସ । ପ୍ରେମିକା ଶାରୀରିକ ସମ୍ବନ୍ଧ ରଖିବାକୁ ମନା କରିବା ପରେ ପ୍ରେମିକ ଦୁଷ୍କର୍ମ କରିଥିଲା । ଏହାପରେ ପ୍ରେମିକ ହତ୍ୟା କରିବା ପାଇଁ ଉଦ୍ୟମ କରୁଥିବା ବେଳେ ଅଳ୍ପକେ ଯୁବତୀ ଜଣଙ୍କ ବର୍ତ୍ତି ଯାଇଥିଲେ । ଗତ 7 ତାରିଖ ଦିନ ବଲାଙ୍ଗୀର ଜିଲ୍ଲାରୁ ଏହି ଘଟଣା ସାମ୍ନାକୁ ଆସିଥିଲା ।
କନ୍ଧପାଲି ବନ୍ଧ ନିକଟରୁ ଯୁବତୀ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ଏହାପରେ ତାଙ୍କୁ ଭୀମଭୋଇ ମେଡ଼ିକାଲ କଲେଜରେ ଭର୍ତ୍ତି କରାଯାଇଥିଲା । ଏବେବି ତାଙ୍କର ଚିକିତ୍ସା ଜାରି ରହିଛି । ବରଗଡ ଅଞ୍ଚଳର ଜନୈକା ଯୁବତୀ ବାପାମାଆଙ୍କ ମୃତ୍ୟୁ ପରେ ପେଟ ପୋଷିବା ଆଶାରେ ବଲାଙ୍ଗୀରରେ ଆସି ରହୁଥିଲେ । ଏଠାରେ ଦୀର୍ଘ ତିନି ବର୍ଷ ହେଲା ଘରଘର ବୁଲି କାମ କରି ନିଜ ପେଟ ପୋଷୁଥିଲେ ଯୁବତୀ ।
ଏହି ସମୟରେ ଏଠାକାର ଦାସ ବାଘ ନାମକ ଜଣେ ଯୁବକଙ୍କ ସହ ତାଙ୍କର ଦେଖା ହୋଇଥିଲା । ପରେ ଧୀରେଧୀରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । ଗତ 7 ତାରିଖ ଦିନ ପ୍ରେମିକ ଦାସ ବାଘ ପ୍ରେମିକାଙ୍କ ସହ ଶାରିରୀକ ସମ୍ପର୍କ ରଖିବାକୁ କହିଥିଲା । ହେଲେ ଏଥିରେ ରାଜି ହୋଇନଥିଲେ ଯୁବତୀ । ଶାରିରୀକ ସମ୍ପର୍କ ରଖିବା ପାଇଁ ମନା କରିବାକୁ ରାଗି ଯାଇ ପ୍ରେମିକ ତାଙ୍କୁ ଏକ ନିଛାଟିଆ ସ୍ଥାନରେ ଥିବା ପୋଖରୀ ପାଖକୁ ନେଇ ଦୁଷ୍କର୍ମ କରିଥିଲା । ଏହାପରେ ଲୋକଲଜ୍ଜା ଭୟରେ ପ୍ରେମିକାକୁ ହତ୍ୟା କରିବା ପାଇଁ ଭୁଜାଲିରେ ମରଣାନ୍ତକ ଆକ୍ରମଣ କରିଥିଲା ।