ବଲାଙ୍ଗୀର: ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି ବଲାଙ୍ଗୀର ବନ୍ଦ ପାଳନ । ମୁଖ୍ୟତଃ 4ଟି ଦାବି ନେଇ ଏହି ବନ୍ଦ ପାଳନ ହୋଇଥିଲା । ବଲାଙ୍ଗୀରରେ ପୁନଃ ସ୍ଥାୟୀ ହାଇକୋର୍ଟ ବେଞ୍ଚ ସ୍ଥାପନ, ଲୋୟର ସୁକତେଲ ପ୍ରକଳ୍ପ ସମ୍ପୂର୍ଣ୍ଣ ବାଇପାସ କାମ ଆରମ୍ଭ ପ୍ରମୁଖ ଦାବି ଥିଲା ।
ବୁଧବାର ଠାରୁ ଚାଲିଥିବା ଏହି ବନ୍ଦ ଡାକରାରେ ମକର ସଂକ୍ରାନ୍ତି ପାଇଁ ସ୍ବତ ପ୍ରବୃତ୍ତ ଭାବେ ସରକାରୀ କାର୍ଯ୍ୟାଳୟ ବନ୍ଦ ରହିଥିଲା। ତେବେ ଗୁରୁବାର ମଧ୍ୟ ବନ୍ଦର ପ୍ରଭାବ ଦେଖିବାକୁ ମିଳିଥିବା ବେଳେ ସବୁ ସରକାରୀ କଳ ଠପ ହୋଇଯାଇଥିଲା । ଆନ୍ଦୋଳନର ନେତୃତ୍ବ ନେଉଥିବା କ୍ରିୟା ଅନୁଷ୍ଠାନ କମିଟି ଓ ଆନ୍ଦୋଳନକୁ ସମର୍ଥନ ଦେଉଥିବା ଶତାଧିକ ସଂଗଠନ ସହରରେ ପିକେଟିଂ କରି ସବୁ ସରକାରୀ କାର୍ଯ୍ୟାଳୟ ବନ୍ଦ କରିଥିଲେ । ବ୍ୟାଙ୍କ, ବୀମା କାର୍ଯ୍ୟାଳୟ, କୋର୍ଟ କଚେରୀ ସମେତ ସବୁ କେନ୍ଦ୍ର ଓ ରାଜ୍ୟ ସରକାରଙ୍କ କାର୍ଯ୍ୟାଳୟ ଗୁରୁବାର ସମ୍ପୂର୍ଣ୍ଣ ବନ୍ଦ ରହିଥିଲା । ସବୁଠାରୁ ଗୁରୁତ୍ବପୂର୍ଣ୍ଣ ଦୁଇଦିନିଆ ବନ୍ଦ ସଫଳ ହୋଇଥିବା ବେଳେ ବନ୍ଦ ଶାନ୍ତି ପୂର୍ଣ୍ଣ ରହିଛି ।