ବଲାଙ୍ଗୀର: ଏକ ଶାଗୁଆନ ଗଛରୁ ଝୁଲନ୍ତା ଅବସ୍ଥାରେ ସ୍ବାମୀ ସ୍ତ୍ରୀଙ୍କ ମୃତଦେହ ଉଦ୍ଧାର । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବଲାଙ୍ଗୀର ତୁରେକେଲା ଥାନା ଗଡ଼ିଆଜୋର ଗାଁରେ । ମୃତକ ସ୍ବାମୀ ଜଣକ ହେଲେ ଗଡ଼ିଆଜୋର ଗାଁ ଗ୍ରାମରକ୍ଷୀଙ୍କ ପୁଅ ନୀଳକଣ୍ଠ କଟା ଏବଂ ତାର ସ୍ତ୍ରୀ ଶାନ୍ତି କଟା ।
ପାରିବାରିକ କଳହକୁ ନେଇ ଦମ୍ପତ୍ତିଙ୍କ ଆତ୍ମହତ୍ୟା
ସୂଚନାମୁତାବକ, ଗତକାଲି ଦୁଇଜଣ ଭାଲୁମୁଣ୍ଡା ଗାଁ ବ୍ୟାଙ୍କକୁ କାମରେ ଯାଉଥିବା କହି ଆଉ ଘରକୁ ଫେରିନଥିଲେ । ପରିବାର ଲୋକ ବହୁତ ଖୋଜାଖୋଜି କରିବା ପରେ ମଧ୍ୟ ତାଙ୍କର ଖୋଜଖବର ମିଳିନଥିଲା । ତେବେ ବୁଧବାର ତାଙ୍କ ଜମିରେ ଥିବା ଏକ ଶଗୁଆନ ଗଛରେ ଦୁଇ ଜଣଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ଏନେଇ ପରିବାର ଲୋକେ ତୁରେକେଲା ଥାନାକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି ।