ବଲାଙ୍ଗୀର:ଗୁରୁ ଶିଷ୍ୟ ସମ୍ପର୍କରେ କଳଙ୍କ । ଛାତ୍ରୀଙ୍କୁ ଦୁଷ୍କର୍ମ ଉଦ୍ୟମ କରି ଗିରଫ ହେଲେ ଶିକ୍ଷକ । ବହି କିଣାଇ ଦେବା ବାହାନାରେ ଘରକୁ ଡାକି ନବମ ଶ୍ରେଣୀ ଛାତ୍ରୀଙ୍କୁ ଦୁଷ୍କର୍ମ ଉଦ୍ୟମ କରିଥିବା ନେଇ ଥାନାରେ ହୋଇଥିଲା ଅଭିଯୋଗ । ଏଭଳି ଲଜ୍ଜା ଜନକ ଘଟଣା ଘଟିଛି ବଲାଙ୍ଗୀର ପାଟଣାଗଡ ଥାନା ଅଞ୍ଚଳରେ । ଶିକ୍ଷକ ଜଣଙ୍କ ହେଉଛନ୍ତି ସତ୍ୟ ନାଏକ ।
ମିଳିଥିବା ସୂଚନା ଅନୁଯାୟୀ, ପାଟଣାଗଡ ଥାନା ଅନ୍ତର୍ଗତ ଏକ ଉଚ୍ଚ ବିଦ୍ୟାଳୟରେ ସତ୍ୟ ନାଏକ ଶିକ୍ଷକ ଭାବେ କାର୍ଯ୍ୟରତ ଅଛନ୍ତି । ସେ ସ୍କୁଲର ଜଣେ ନବମ ଶ୍ରେଣୀର ଛାତ୍ରୀଙ୍କ ଘରକୁ ଯାଇ ବହି କିଣିଦେବା ବାହାନରେ ତାଙ୍କୁ ଘରକୁ ଡାକିଥିଲେ । ଛାତ୍ରୀ ଜଣଙ୍କ ଘରକୁ ଆସିବା ପରେ ଶିକ୍ଷକ ତାଙ୍କୁ ଏକ ନିଛାଟିଆ ସ୍ଥାନକୁ ନେଇଯାଇ ଦୁଷ୍କର୍ମ ଉଦ୍ୟମ କରିଥିଲେ । ଉକ୍ତ ଛାତ୍ରୀ ଜଣକ ଶିକ୍ଷକଙ୍କୁ ବିରୋଧ କରିବାରୁ ସତ୍ୟ ନାଏକ ତାଙ୍କୁ ଛାଡି ଦେଇଥିଲେ ।
ଏଥିସହ ଏ କଥା ଘରେ କିମ୍ବା ବାହାରେ ପ୍ରଘଟ କଲେ ଜୀବନରୁ ମାରିଦେବାକୁ ଧମକ ଦେଇଥିଲେ । ପରେ ପୀଡିତା ଜଣକ ସ୍କୁଲ ଯିବା ପାଇଁ ଘରେ ମନା କରିଥିଲେ । କିନ୍ତୁ ତାଙ୍କ ମାଆ ସ୍କୁଲ କାହିଁକି ଯାଉନାହିଁ ବୋଲି ପ୍ରଶ୍ନ କରିଥିଲେ ନାବାଳିକା ଜଣଙ୍କୁ । ଶେଷରେ ପୁରା ଘଟଣା ସମ୍ପର୍କରେ ମାଆଙ୍କୁ କହିଥିଲେ ସେ । ଘଟଣା ସମ୍ପର୍କରେ ଜାଣିବା ପରେ ପରିବାର ପକ୍ଷରୁ ଶିକ୍ଷକ ସତ୍ୟ ନାଏକଙ୍କ ବିରୋଧରେ ପାଟଣାଗଡ ଥାନାରେ ଅଭିଯୋଗ ହୋଇଥିଲା ।