ବଲାଙ୍ଗୀର: ପାଟଣାଗଡ଼ ପୋଲିସକୁ ବଡ ଧରଣର ସଫଳତା । ଜିଲ୍ଲାରେ ଆତଙ୍କ ମଚାଇଥିବା ଏକ ଡକାୟତି ଗ୍ୟାଙ୍ଗର ଚାରି ଜଣଙ୍କୁ ପୋଲିସ ଧରିବାରେ ସଫଳ ହୋଇଛି । ଏଥିସହ ସେମାନଙ୍କ ଠାରୁ ବନ୍ଧୁକ ଗୁଳି ଓ ନଗଦ ଟଙ୍କା ଜବତ କରିଛି ପୋଲିସ । ସୂଚନା ଅନୁସାରେ, ନିକଟରେ ପାଟଣାଗଡ଼ ସ୍ଥିତ ଏକ ସୁନା ଅଳଙ୍କାର ଦୋକାନରୁ ବନ୍ଧୁକ ମୁନରେ ମରଣାନ୍ତକ ଆକ୍ରମଣ କରି ଦେଢ଼ କେଜି ସୁନା ଅଳଙ୍କାର ସହ ନଗଦ ଟଙ୍କା ଲୁଟ ହୋଇଥିଲା ।
ତେବେ ଏହି ଘଟଣାରେ ପୋଲିସର ଏକ ସ୍ଵତନ୍ତ୍ର ଟିମ୍ ତଦନ୍ତ କରୁଥିବା ବେଳେ ଏଥିରେ ସଂପୃକ୍ତ ଥିବା ଚାରି ଜଣକୁ ପୋଲିସ୍ ଗିରଫ କରିଛି । ଗିରଫ ହୋଇଥିବା ଚାରିଜଣ ହେଲେ ପାଟଣାଗଡ଼ ସମଲେଶ୍ବର ଗାଁର ଶେଷଦେବ ବଗର୍ତ୍ତି, ରାମପୁରର ଆଓ୍ବାଜ ମେହେର, ବରଗଡ଼ ଜିଲ୍ଲା ବିଜେପୁର ଅଞ୍ଚଳର ଚନ୍ଦ୍ରମଣି ମେହେର ଏବଂ ସୁବର୍ଣ୍ଣପୁର ଜିଲ୍ଲା ଖୁଟପାଲି ଗାଁର ଅଲେଖ ବଢ଼େଇକୁ ଗିରଫ କରିଥିବା ଜଣାପଡିଛି । ଏଥିସହ ସେମାନଙ୍କ ଠାରୁ ୪୨ ହଜାର ୫ଶହ ଟଙ୍କା, ଡକାୟତିରେ ବ୍ୟବହୃତ ଦେଶୀ ବନ୍ଧୁକ, ଦୁଇଟି ୮ ଏମ୍ଏମ୍ ଜୀବନ୍ତ ଗୁଳି, ପଲସର ବାଇକ୍ ସହ ମାଲିକ ଠାରୁ ଲୁଟି ନେଇଥିବା ଏକ ସାମସଙ୍ଗ ମୋବାଇଲ ଫୋନ ପୋଲିସ ଜବତ କରିଛି । ଏହା ଛଡା ଏଥିରେ ଆହୁରି ଚାରି ଜଣ ଫେରାର ଥିବା ବେଳେ ସେମାନେ ସମସ୍ତେ ଆନ୍ତଃରାଜ୍ୟ ଡକାୟତ ଓ ତାଙ୍କୁ ଧରିବା ପାଇଁ ପୋଲିସର ଏକ ସ୍ବତନ୍ତ୍ର ଦଳ ବିଭିନ୍ନ ସ୍ଥାନରେ ଚଢାଉ କରୁଥିବାର ପାଟଣାଗଡ଼ ଏସଡିପିଓ ଜ୍ୟୋତିର୍ମୟ ଭୁକ୍ତା କହିଛନ୍ତି ।
ଇଟିଭି ଭାରତ, ବଲାଙ୍ଗୀର
