ଉଈହୁଙ୍କା ଭିତରେ ବୃଦ୍ଧାଙ୍କ ଜଙ୍ଗଲୀ ଜୀବନ, 50ହଜାର ଟଙ୍କା ପ୍ରଦାନ କଲେ ବିଧାୟକ ସରୋଜ ମେହେର

ବଲାଙ୍ଗୀରରେ ଉଈହୁଙ୍କା ମଧ୍ୟରେ ବୃଦ୍ଧାଙ୍କ ଜୀବନ ବିତୁଥିବା ଖବର ଗଣମାଧ୍ୟମରେ ପ୍ରସାରିତ ହୋଇଥିଲା । ଏହାପରେ ପାଟଣାଗଡ଼ ବିଧାୟକ ବୃଦ୍ଧାଙ୍କୁ ୫୦ ହଜାର ଟଙ୍କା ଅର୍ଥ ପ୍ରଦାନ କରିଛନ୍ତି । ଅଧିକ ପଢନ୍ତୁ

ବଲାଙ୍ଗୀର: ଜିଲ୍ଲାର ପାଟଣାଗଡ଼ ଅଞ୍ଚଳରେ ଜଣେ ବୃଦ୍ଧା ଉଈହୁଙ୍କା ପରି ମାଟି ଘରେ ଦୀର୍ଘ ୮ ବର୍ଷ ଧରି ରହିଆସୁଥିଲେ । ଏହି ଖବର ଗଣମାଧ୍ୟମରେ ପ୍ରସାରଣ ପରେ ବୃଦ୍ଧାଙ୍କ ନିକଟରେ ପ୍ରଥମେ ପ୍ରଶାସନ ଓ ଏବେ ପାଟଣାଗଡ଼ ବିଧାୟକ ପହଞ୍ଚିଛନ୍ତି । ବିଧାୟକ ନିଜ ଦରମାରୁ ବୃଦ୍ଧାଙ୍କୁ ୫୦ ହଜାର ସହାୟତା ରାଶି ଦେଇଥିବା ଜଣାପଡ଼ିଛି ।

ଜିଲ୍ଲାରେ ଅନେକ ସରକାରୀ ଯୋଜନା କାର୍ଯ୍ୟକାରୀ ହେଉଛି । ମାତ୍ର ଏହି ଅସହାୟ ବୃଦ୍ଧାଙ୍କ ନିକଟରେ ତାହା ପହଞ୍ଚିପାରିନଥିଲା । ଦୀର୍ଘ ୮ ବର୍ଷ ଧରି ସେ ଉଈହୁଙ୍କା ପରି କୁଡ଼ିଆ ଘରେ ରହିଆସୁଥିଲେ । ଖବର ପ୍ରସାରଣ ହେବା ପରେ ନିଜେ ପାଟଣାଗଡ଼ ବିଧାୟକ ସରୋଜ ମେହେର ନିଜ ଦରମାରୁ ୫୦ ହଜାର ଟଙ୍କା ସାହାଯ୍ୟ ପାଇଁ ଦେଇଛନ୍ତି । ତେବେ ପାଟଣାଗଡ଼ ବ୍ଲକ ବାଲିପଟା ଗ୍ରାମର ଅସହାୟ ବୃଦ୍ଧା ଦମୟନ୍ତୀ ବିଶିଙ୍କୁ ପରିବାର ଦୂରେଇ ଦେବା ପରେ ସେ ଏକାକୀ ରହି ଆସିଥିଲେ।

ସରକାରୀ ଯୋଜନା ତାଙ୍କ ପାଖରେ ଅପହଞ୍ଚ ଥିବାବେଳେ ସେ ନିଜ ଉଦ୍ୟମରେ ମାଟିରେ ଏକ ଛୋଟିଆ କୁଡିଆ ତିଆରି କରିଥିଲେ । ଏହା ମଧ୍ୟରେ ସେ ୮ ବର୍ଷ ଧରି ରହି ଆସୁଥିଲେ । ଯାହାର ଖବର ପ୍ରସାରଣ ହେବା ପରେ ପ୍ରଶାସନ ତତ୍ପରତା ଦେଖାଇ ତାଙ୍କୁ ସେଠୁ ଉଦ୍ଧାର କରି ଚିକିତ୍ସା ପରେ ବୃଦ୍ଧାଶ୍ରମକୁ ପଠାଇଥିଲା । ହେଲେ ବୃଦ୍ଧା ଜଣକ ସେଥିରେ ରାଜି ନ ହେବାରୁ ତାଙ୍କୁ ତାଙ୍କ ଝିଅ ଜ୍ବାଇଁ ଘରେ ପ୍ରଶାସନ ଥଇଥାନ କରିଥିଲେ ।

ସେପଟେ ଆଜି ପାଟଣାଗଡ଼ ବିଧାୟକ ସରୋଜ ମେହେର ଭୁବନେଶ୍ବରରୁ ଫେରିବା ପରେ ପ୍ରଥମେ ଏହି ବୃଦ୍ଧାଙ୍କୁ ଭେଟି ଥିଲେ । ତାଙ୍କ ନିଜ ଦରମାରୁ ସେ ୫୦ ହଜାର ଟଙ୍କା ସହାୟତା ଦେଇଥିଲେ । ସେହିପରି ଆଗକୁ ତାଙ୍କ ପାଇଁ ସବୁ ସୁବିଧା କରାଯିବ ବୋଲି ସେ କହିଛନ୍ତି । ତେବେ ବିଧାୟକଙ୍କ ଏହି ମହାନତା ପାଇଁ ତାଙ୍କୁ ସବୁଠି ପ୍ରଶଂସା କରାଯାଇଛି ।

ଇଟିଭି ଭାରତ, ବଲାଙ୍ଗୀର