ବଲାଙ୍ଗୀର: ଶାଶୁ-ବୋହୂଙ୍କ ଗଳା କାଟି ହତ୍ୟା ମାମଲାରେ ଅଭିଯୁକ୍ତ ପୁତୁରା ଗିରଫ । ଗତକାଲି(ଗୁରୁବାର) ଶାଶୁ-ବୋହୂଙ୍କୁ ହତ୍ୟା କରାଯାଇ ଥିବାବେଳେ ପୋଲିସ ଆଜି ଅଭିଯୁକ୍ତକୁ ଗିରଫ କରିଛି । ସମ୍ପର୍କୀୟ ପୁତୁରା ଉଭୟଙ୍କୁ ଅତି ନିର୍ମମ ଭାବେ ହତ୍ୟା କରିଥିବା ଜଣାପଡିଛି ।
ଶାଶୁ-ବୋହୂଙ୍କ ଗଳାକାଟି ହତ୍ୟା ମାମଲାର ପର୍ଦ୍ଦାଫାସ, ଅଭିଯୁକ୍ତ ପୁତୁରା ଗିରଫ ସୂଚନା ଅନୁଯାୟୀ, ବଲାଙ୍ଗୀର ତୁଷୁରା ଥାନା ଅନ୍ତର୍ଗତ ନୂଆପଡ଼ାରେ ଗତକାଲି ଘରେ ଥିବାବେଳେ ଶାଶୁ-ବୋହୂଙ୍କ ଗଳା କାଟି ଅତି ନିର୍ମମ ଭାବରେ ହତ୍ୟା କରା ଯାଇଥିଲା । ଯାହା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଥିଲା । ତେବେ ତୁଷୁରା ପୋଲିସ ଏଥିରେ ତ୍ୱରିତ ପଦକ୍ଷେପ ନେବା ପରେ ସମ୍ପର୍କୀୟ ପୁତୁରାକୁ ଗିରଫ କରିଥିଲା । ତେବେ ସମ୍ପର୍କୀୟ ପୁତୁରା ଜଗନ୍ନାଥ ମେହେରଙ୍କ ଏମାନଙ୍କ ସହ ମତାନ୍ତର ରହି ଆସିଥିଲା ତଥା ତାକୁ ହତାଦର କରା ଯାଉଥିବା ଯୋଗୁଁ ହତ୍ୟା କରିଥିବା ଜଣାପଡ଼ିଛି । ତେବେ ଜଗନ୍ନାଥ ମେହେର ଆର୍ଥିକ ସ୍ଥିତି ସ୍ୱଚ୍ଛଳ ନ ଥିବାବେଳେ ସେ ଏକ ଦୋକାନରେ କାମ କରି ପରିବାର ପ୍ରତିପୋଷଣ କରୁଥିଲା ।
ଏହା ମଧ୍ୟ ପଢନ୍ତୁ:-MURDER: ଶାଶୁ ବୋହୂଙ୍କୁ ଘରେ ପଶି ହତ୍ୟା, କାରଣ ଅସ୍ପଷ୍ଟ
ଏହା ସହ ନୂଆପଡ଼ାରେ ଥିବା ତା'ର ପାଞ୍ଚ ଏକର ଜମିରେ ଚାଷ କରି ଦୁଇ ପଇସା ରୋଜଗାର କରୁଥିଲା । ତେବେ ସେ ଗତକାଲି ଘରେ କେହି ନ ଥିବାବେଳେ ଏମାନଙ୍କ ପାଖକୁ ଆସି ଖେତରେ ସାର ପକାଇବା ପାଇଁ ଟୋକେଇ ମାଗିଥିଲା । ଯାହାକୁ ନେଇ ତାଙ୍କ ଖୁଡି ଅମ୍ବିକା ମେହେର ମନା କରି ଦେଇଥିଲେ । ଏଥିରେ ଉତକ୍ଷିପ୍ତ ହୋଇ ସାଙ୍ଗରେ ଧରିଥିବା ଏକ ଚାକୁରେ ଖୁଡି ଅମ୍ବିକା ମେହେରଙ୍କ ଗଳା କାଟି ହତ୍ୟା କରିବା ପରେ ଜେଜେମା ପ୍ରେମଶିଳା ମେହେରଙ୍କୁ ମଧ୍ୟ ସମାନ ଭାବେ ଗଳା କାଟି ହତ୍ୟା କରିଥିଲା ।
ଘରେ ଶୌଚାଳୟରେ ନିଜକୁ ଧୋଇବା ପରେ ବାଡ଼ି ପଛପଟୁ ଫେରାଇ ମାରିଥିଲା । ତେବେ ପୋଲିସ ତାକୁ ସନ୍ଦେହରେ ରାତିରେ ଗିରଫ କରିବା ପରେ ସବୁ ଘଟଣାର ପର୍ଦ୍ଦାଫାସ ହୋଇଛି । ପରିବାରରେ ଥିବା କଳହ ପୁଞ୍ଜିଭୂତ ହୋଇ ଏହି ଘଟଣା ଘଟିଥିବା ପୋଲିସ କହିଛି । ସେପଟେ ଆଜି ପୋଲିସ୍ ଅଭିଯୁକ୍ତ ଜଗନ୍ନାଥ ମେହେରକୁ ନେଇ ସିନ ରି-କ୍ରିଏସନ୍ କରିବା ପରେ ବଲାଙ୍ଗୀର ଏସଡିଜେଏମ କୋର୍ଟକୁ ପଠାଇ ଦେଇଛି । ସେହିପରି ହତ୍ୟାରେ ବ୍ୟବହୃତ ଚାକୁ, ରକ୍ତ ଲଗା କପଡ଼ା ମଧ୍ୟ ଜବତ କରିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
