ଗାଁ ପଡିଆରୁ ନିଖୋଜ ଯୁବକର ମୃତଦେହ ଉଦ୍ଧାର, ହତ୍ୟା ସନ୍ଦେହ

ବଲାଙ୍ଗୀର ପାଟଣାଗଡ ତେଣ୍ଡ ପଦର ଗ୍ରାମରେ ତିନି ଦିନ ଧରି ନିଖୋଜ ଥିବା ଯୁବକଙ୍କ ମୃତଦେହ ଉଦ୍ଧାର ହୋଇଛି । ପରିବାର ଲୋକେ ହତ୍ୟା ସନ୍ଦେହ କରୁଥିବାବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ବଲାଙ୍ଗୀର: ତିନି ଦିନ ଧରି ନିଖୋଜ ଥିବା ଯୁବକର ମୃତଦେହ ଉଦ୍ଧାର । ବଲାଙ୍ଗୀର ପାଟଣାଗଡ ତେଣ୍ଡ ପଦର ଗ୍ରାମର ରମାକାନ୍ତ ସାହୁ ଗତ ତିନି ଦିନ ତଳୁ ନିଖୋଜ ହୋଇଯାଇଥିଲେ । ବୁଧବାର ଏହି ଗ୍ରାମର ଏକ ପଡିଆରେ ତାଙ୍କ କ୍ଷତ ବିକ୍ଷତ ମୃତଦେହ ପଡିଥିବାର ଲୋକେ ଦେଖିବାକୁ ପାଇଥିଲେ ।

ପୋଲିସକୁ ଖବର ଦେବା ପରେ ପାଟଣାଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସେପଟେ ଏହାକୁ ପ୍ରଥମେ ଅପହରଣ ଓ ପରେ ହତ୍ୟା ବୋଲି ସନ୍ଦେହ କରିଛନ୍ତି ପରିବାର ଲୋକେ। ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣା ପଡ଼ିବ ବୋଲି ପୋଲିସ ସୂଚନା ଦେଇଛି।

ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ