ନାବାଳିକା ଯୌନ ନିର୍ଯାତନା ଘଟଣା: ତଦନ୍ତ ପାଇଁ ପୀଡିତା ନାବାଳିକା ଓ ମା' କୁ କଳାହାଣ୍ଡି ନେଲା ପୋଲିସ

ପ୍ରୟାସ ଆଶ୍ରମ ଗୃହରେ ନାବାଳିକା ଅନ୍ତେବାସୀଙ୍କୁ ଯୌନ ନିର୍ଯାତନା ଅଭିଯୋଗ ଆସିବା ପରେ ସବୁଠି ତତ୍ପରତା ଦେଖାଦେଇଛି ପୋଲିସ ଓ ପ୍ରଶାସନ । ଘଟଣାର ତଦନ୍ତ ପାଇଁ ଅଭିଯୋଗକାରୀ ନାବାଳିକା ଓ ତାଙ୍କ ମାଙ୍କୁ ବଲାଙ୍ଗୀରରୁ କଳାହାଣ୍ଡି ନେଲା ପୋଲିସ ।

ବଲାଙ୍ଗୀର: ଭବାନୀପାଟଣାସ୍ଥିତ ଏକ ଆଶ୍ରମ ଗୃହରେ ନାବାଳିକା ଅନ୍ତେବାସୀଙ୍କୁ ଯୌନ ନିର୍ଯାତନା ଅଭିଯୋଗ ଆସିବା ପରେ ସବୁଠି ତତ୍ପରତା ଦେଖାଦେଇଛି । ଅଭିଯୋଗକାରୀ ନାବାଳିକା ଓ ତାଙ୍କ ମାଙ୍କୁ ତଦନ୍ତ ପାଇଁ ବଲାଙ୍ଗୀରରୁ କଳାହାଣ୍ଡି ନେଇଛି କଳାହାଣ୍ଡି ପୋଲିସ ।

ସୂଚନାଯୋଗ୍ୟ, ଜନ୍ମରୁ ଏଚ୍ଆଇଭି ପୀଡିତ ଥିବା 2 ନାବାଳିକାଙ୍କୁ କଳାହାଣ୍ଡିର ଏକ ସେବାଶ୍ରମ ଗୃହରେ ରହୁଥିଲେ । ଯେଉଁଠି ସଂସ୍ଥାର ନିର୍ଦ୍ଦେଶକ ସରୋଜ ଦାସ ଜଣେ ନାବାଳିକାକୁ ଯୌନ ନିର୍ଯାତନା ଦେଇ ଆସିଥିଲେ । ଏହାପରେ ନାବାଳିକା ଜଣକ ଉକ୍ତ ସେବାଶ୍ରମ ଗୃହ ଛାଡି ବଲାଙ୍ଗୀର ପଳାଇ ଆସିଥିଲେ । ଏନେଇ ପୀଡିତା ନାବାଳିକାଙ୍କ ମା ବଲାଙ୍ଗୀର ଶିଶୁ ସୁରକ୍ଷା କମିଟିରେ ଅଭିଯୋଗ କରିଥିଲେ ।

ଘଟଣାକୁ ନେଇ ଶିଶୁ ସୁରକ୍ଷା କମିଟି ପକ୍ଷରୁ କୌଣସି ପଦକ୍ଷେପ ନେବା ଆଗରୁ କଳାହାଣ୍ଡି ପୋଲିସ ଓ ପ୍ରଶାସନ ପଦକ୍ଷେପ ନେଇ ସମ୍ପୃକ୍ତ ସଂସ୍ଥା ଉପରେ ଚଢ଼ାଉ କରିଥିଲେ । ମାମଲାର ଅଧିକ ତଦନ୍ତ ପାଇଁ କଳାହାଣ୍ଡି ପୋଲିସ ଆଜି ସମ୍ପୃକ୍ତ ନାବାଳିକାଙ୍କୁ କଳାହାଣ୍ଡି ନେଇଛନ୍ତି।

ଅମନ୍ୟପଟେ ବଲାଙ୍ଗୀରର ଶିଶୁ ସୁରକ୍ଷା କମିଟି ମାମଲାର ତଦନ୍ତ କରୁଥିବା ବେଳେ ତାଙ୍କୁ ନଜଣାଇ ନାବାଳିକାଙ୍କୁ ପୋଲିସ ନେଇଯିବା ସେମାନେ ଏହାକୁ ବିରୋଧ କରିଛନ୍ତି । ତେବେ ଏହି ଅଭିଯୋଗରେ ସତ୍ୟତା ରହିଛି ବୋଲି ଶିଶୁ ସୁରକ୍ଷା କମିଟି କହିଛି ।

ବଲାଙ୍ଗୀରରୁ ଏସ୍ କେ ୱାହିଦ୍, ଇଟିଭି ଭାରତ