ବଲାଙ୍ଗୀର: ହରିଶଙ୍କର ଠାରୁ ନୃସିଂହନାଥ ପିଠକୁ ରୋପ ୱେ ନିର୍ମାଣ ଦାବି । ପ୍ରସିଦ୍ଧ ହରିଶଙ୍କର ପର୍ଯ୍ୟଟନ ସ୍ଥଳୀକୁ ଉପେକ୍ଷା ଅଭିଯୋଗ କଲେ ବଲାଙ୍ଗୀରବାସୀ । ଏନେଇ ଆଜି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି କୋଶଳ ମୁକ୍ତିମୋର୍ଚ୍ଚା । ବଲାଙ୍ଗୀରର ପ୍ରସିଦ୍ଧ ପର୍ଯ୍ୟଟନସ୍ଥଳୀ ହରିଶଙ୍କର । ତେଣୁ ହରିଶଙ୍କରଠାରୁ ନୃସିଂହନାଥ ପିଠକୁ ରୋପ ୱେ ନିର୍ମାଣ ଦାବି କରିଛନ୍ତି ବଲାଙ୍ଗୀର ଜନ ସାଧାରଣ । ଏହି ରୋପ ୱେ ନିର୍ମାଣ ଦାବିରେ ପ୍ରଥମରୁ କୋଶଳ ମୁକ୍ତି ମୋର୍ଚ୍ଚା ତିନି ଦିନ ଧରି ଜଳ ସତ୍ୟାଗ୍ରହ ଆନ୍ଦୋଳନ କରିଥିଲା । ସେହିପରି ଖପ୍ରାଖୋଲା ବ୍ଲକ ବନ୍ଦ ଡାକରା ମଧ୍ୟ ଦିଆଯାଇଥିଲା ।
ହେଲେ ଏହି ଦାବିକୁ ସରକାର କର୍ଣ୍ଣପାତ କରୁନଥିବା ଅଭିଯୋଗ କରିଛି କୋଶଳ ମୁକ୍ତି ମୋର୍ଚ୍ଚା । ଏନେଇ ଆଜି ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି । ଯାହାକୁ ବଲାଙ୍ଗୀର ଜିଲ୍ଲା କୋଶଳ ସମନ୍ବୟ ସମିତି ସହିତ ଅନେକ ସଙ୍ଗଠନ ସମର୍ଥନ ଦେଇ ଧାରଣାରେ ବସିଛନ୍ତି । ତେବେ ଦାବି ପୂରଣ ନ ହେଲେ ଆନ୍ଦୋଳନକୁ ତୀବ୍ର କରାଯିବ ଆନ୍ଦୋଳନକାରୀ ଚେତାବନୀ ଦେଇଥିଲେ ।