ବଲାଙ୍ଗୀର:ସରିଥିଲା ବିବାହ, ଆଉ ମାତ୍ର କିଛି ସମୟ ପରେ କନ୍ୟାକୁ ଧରି ନିଜ ଘରକୁ ଯାଇଥାନ୍ତା ବର । କିନ୍ତୁ ଯୌତୁକ ମାଗି ଫସି ଗଲା । ଘରକୁ ଯିବା ପୂର୍ବରୁ ପୋଲିସ ହେପାଜତକୁ ଗଲା ବର । ବିବାହର କିଛି ସମୟ ପରେ ଥାନାରେ ବିଚ୍ଛେଦ ହେଲା ବୈବାହିକ ସମ୍ପର୍କ । ଏଭଳି ଘଟଣା ଘଟିଛି ବଲାଙ୍ଗୀର ଜିଲ୍ଲାରେ । ବିଦାୟୀ ସମୟରେ କନ୍ୟା ପକ୍ଷଙ୍କୁ ଯୌତୁକରେ ବାଇକ ଦେବାକୁ କହିବାରୁ ଥାନାରେ ଅଭିଯୋଗ କରିଥିଲେ କନ୍ୟାଙ୍କ ବାପା ।
ଜଣେ ମୁସଲିମ କନ୍ୟାଙ୍କ ବାହାଘର ବୁର୍ଲା ସ୍ଥିତ ଶେଖ ସେହେଫାଜ କ୍ୟୁରେସିଙ୍କ ସହ ଠିକ ହୋଇଥିଲା । ମୁସଲିମ ପରମ୍ପରା ଅନୁଯାୟୀ ଗୁରୁବାର ତିନୋଟି ସମାଜ ସମ୍ମୁଖରେ ଝିଅ ଘରେ ନିକାହ ସମ୍ପର୍ଣ୍ଣ ହୋଇଥିଲା । ତେବେ ନିକାହ ପରେ ସମସ୍ତେ ଭୋଜିର ମଜା ନେଇଥିଲେ । ହେଲେ ବର ଘର ଲୋକେ ଭୋଜି ଖାଇବାକୁ ମନା କରିଥିଲା । ତେବେ କାରଣ ପଚରା ଯିବାରୁ ତାକୁ ଏକ ମୋଟର ସାଇକେଲ ଯୌତୁକ ଦରକାର ନ ହେଲେ ସେ ଝିଅକୁ ସାଙ୍ଗରେ ନେବ ନାହିଁ ବୋଲି କହିଥିଲା । ସେପଟେ ଝିଅ ଘର ଲୋକେ ଏଥିପାଇଁ ମାସେ ସମୟ ମାଗିବା ପରେ ମଧ୍ୟ ସେ ମାନି ନଥିଲା । ଏହାପରେ ଝିଅ ଘର ଲୋକେ ବରକୁ ବଲାଙ୍ଗୀର ଆଦର୍ଶ ଟାଉନ ଥାନା ପୋଲିସ ପାଖରେ ଜିମା ଦେଇଥିଲେ । ଥାନାରେ ହିଁ ମୋଲବୀ କାଜି ଆସି ବିବାହ ବିଚ୍ଛେଦ କରାଇଥିଲେ ।