ବଲାଙ୍ଗୀର: ନଭେମ୍ବର 19 ତାରିଖରୁ ଫସଲ ବୀମା ପ୍ରାପ୍ତି ପାଇଁ ଆମରଣ ଅନଶନରେ ବସିଛନ୍ତି ଦୁଇଟି ଗ୍ରାମର ଚାଷୀ । ତେବେ ଏମାନଙ୍କ ଅନଶନକୁ ଚାରିଦିନ ବିତିଯାଇଥିବା ବେଳେ ଦୁଇ ଜଣ ଅନଶନକାରୀଙ୍କ ସ୍ବାସ୍ଥ୍ୟାବସ୍ଥା ବିଗିଡିବାରୁ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ସେପଟେ ଜିଲ୍ଲା ପ୍ରଶାସନ ସହିତ ଏମାନଙ୍କର ଆଲୋଚନା ବିଫଳ ହୋଇଥିବା ବେଳେ ଏମାନଙ୍କ ଅନଶନ ଜାରି ରହିବ ବୋଲି ଚେତାବନୀ ଦେଇଛନ୍ତି ।
ଫସଲ ବୀମା ପ୍ରାପ୍ତି ପାଇଁ ଆମରଣ ଅନଶନରେ ବଲାଙ୍ଗୀର ଚାଷୀ
ବଲାଙ୍ଗୀର ଦେଓଗାଁ ବ୍ଲକର କୂଳତାପଡା ଓ ଅର୍ଜୁନପୁର ଗ୍ରାମର ଚାଷୀମାନେ ଏହି ଅନଶନରେ ବସିଛନ୍ତି । ତେବେ ଏମାନଙ୍କ ଅଞ୍ଚଳରେ ଗତ 17 ଓ 18 ବର୍ଷ ତଥା 18-19 ବର୍ଷରେ ସ୍ବଳ୍ପ ବୃଷ୍ଟିପାତ ଯୋଗୁଁ ମରୁଡି ପଡିଥିଲା । ସେପଟେ ଏମାନେ ଫସଲ ବୀମା କରିଥିବା ବେଳେ ତାହାହିଁ ଏକ ମାତ୍ର ଏମାନଙ୍କର ଆଶା ଥିଲା । ହେଲେ ଏଯାଏଁ ଏମାନେ କୌଣସି ଫସଲ ବୀମା ପାଇନଥିବା ବେଳେ ତାଙ୍କ ଗୁହାରୀ କେହି ନଶୁଣିବାରୁ ଚାଷୀମାନେ ଏହି ଆମରଣ ଅନଶନ କରୁଛନ୍ତି ।