ବେଆଇନ କଫ ସିରପ ଜବତ, 2 ଗିରଫ

ବିପୁଳ ପରିମାଣର କଫ ସିରପ ଜବତ କଲା ବଲାଙ୍ଗୀର ପୋଲିସ । ଏଥିରେ ସମ୍ପୃକ୍ତ ଥିବା ଦୁଇ ଜଣଙ୍କୁ ଗିରଫ କରିଛି ପୋଲିସ । ଅଧିକ ପଢନ୍ତୁ...

ବଲାଙ୍ଗୀର: ବିପୁଳ ପରିମାଣର କଫ ସିରପ ଜବତ କଲା ବଲାଙ୍ଗୀର ପୋଲିସ । ବେଆଇନ ଚାଲାଣ ବେଳେ ପାଟଣାଗଡ ରାସ୍ତା ବାରପୁଡଗିଆ ଛକ ନିକଟରୁ କାର୍ ସହ ବିପୁଳ ପରିମାଣର କଫ ସିରପ ଜବତ କଲା ବଲାଙ୍ଗିର ସଦର ପୋଲିସ । ଏଥିରେ ସମ୍ପୃକ୍ତ ଥିବା ଦୁଇ ଜଣଙ୍କୁ ଗିରଫ କରିଛି ପୋଲିସ ।

ଏକ ଚେଭରୋଲେଟ୍ କାରରେ କଫ ସିରପ ଚାଲାଣ ହେଉଥିବା ନେଇ ବିଶ୍ବସ୍ତ ସୂତ୍ରରୁ ଖବର ପାଇ ବଲାଙ୍ଗୀର ସଦରଥାନା ଅଧିକାରୀ ତୋଫାନ ବାଗ, ବାରପୁଡଗିଆ ବଗିଚା ଢାବା ନିକଟରେ ଚଢାଉ କରି ଗାଡିର ତଲାସି କରିଥିଲେ । କାରରୁ ୫ ହଜାର ୪ ଶହ ୪୦ ବୋତଲ କଫ ସିରପ ଜବତ କରାଯାଇଛି ।

ସୋନପୁର ଜିଲ୍ଲା ତରଭାରୁ ବଲାଙ୍ଗିର ଜିଲ୍ଲା ପାଟଣାଗଡ ଅଭିମୁଖେ ଚାଲାଣ କରାଯାଉଥିବା ବେଳେ ଜବତ କଫ ସିରପର ବଜାର ମୂଲ୍ୟ ଆନୁମାନିକ ୮ ଲକ୍ଷ ୭୦ ହଜାର ଟଙ୍କା ବୋଲି ସୂଚନା ମିଳିଛି । ବେଆଇନ କଫ ସିରପ ଚୋରା ଚାଲାଣ ଅଭିଯୋଗରେ ସଦର ପୋଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ତରଭାର ଆସିକ ରସୁଲ ଖାନ୍ ଓ ସମୀର ଖାନ୍ ।

ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ