ବଲାଙ୍ଗୀର: ପଦାରେ ପଡିଲା ବଲାଙ୍ଗୀର ଶିକ୍ଷା ବିଭାଗରେ ବଡ ଦୁର୍ନୀତିର ଗୁମର । ଯେଉଁଥିରେ ଶିକ୍ଷକଙ୍କ ନାଁରେ ପେନସନ ଜାଲିଆତି କରି କୋଟି କୋଟି ଟଙ୍କା ହଡପ କରାଯାଉଥିବାର ଅଭିଯୋଗ ହୋଇଛି । ଏନେଇ ତଦନ୍ତ ଚାଲିଥିବା ବେଳେ ସେପଟେ ଘଟଣା ପ୍ରଘଟ ହେବା ପରେ ଫେରାର ହୋଇଯାଇଛି ଅଭିଯୁକ୍ତ ।
ସୂଚନା ଅନୁଯାୟୀ, ବଲାଙ୍ଗୀର ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ସାମ୍ନାକୁ ଆସିଛି ଏହି ଦୁର୍ନୀତି ଘଟଣା । ଯେଉଁଠି ଜଣେ କନିଷ୍ଠ କିରାଣି ଏହାର ମୁଖ୍ୟ କାର୍ପଟଦାର ଥିବାବେଳେ କୋଟି କୋଟି ଟଙ୍କା ମିଛ ଫାଇଲ ଜରିଆରେ ହଡପ କରିଥିବା ଅଭିଯୋଗ ହୋଇଛି । ଏଠାକାର କନିଷ୍ଠ କିରାଣି ପ୍ରମୋଦ କୁମାର ରଥ ଯିଏକି ନିଜ ବାପା 1992ରେ ଚାକିରୀରୁ ସ୍ବତଃ ପ୍ରବୃତ୍ତ ଭାବରେ ଅବସର ନେବା ପରେ ତାଙ୍କ ସ୍ଥାନରେ ଚାକିରୀ ପାଇଥିଲେ।
ପରବର୍ତ୍ତୀ ସମୟରେ ସେ ନିଜ ବାପା କେଶବ ରଥଙ୍କ ନାଁରେ ଜାଲିଆତି ଫାଇଲ ତିଆରି କରି ଗ୍ରାଚୁଇଟି, ପେନସନ ଓ ୟୁଏଲ ଆଦି ବାବଦରେ ରାଜ୍ୟକୋଷରୁ ତିନୋଟି କିସ୍ତିରେ 27 ଲକ୍ଷ 50 ହଜାର ଟଙ୍କା ହଡପ କରିଥିଲେ । ସେହିପରି ନିଜ ସ୍ତ୍ରୀ ଝରଣା ରଥଙ୍କୁ ଜଣେ ଶିକ୍ଷକଙ୍କ ଉତ୍ତରାଧିକାରୀ ଦର୍ଶାଇ ତାଙ୍କ ନାଁରେ ତିନୋଟି କିସ୍ତିରେ 13 ଲକ୍ଷ 65 ହଜାର ଟଙ୍କା ଉଠାଇଥିଲେ । ସମାନ ଭାବରେ ଆଉ ଜଣେ ଶିକ୍ଷକଙ୍କ ନାଁରେ ମଧ୍ୟ ସେ ତିନୋଟି କିସ୍ତିରେ 28 ଲକ୍ଷ 38 ହଜାର ଟଙ୍କା ଉଠାଇଥିଲେ।