ବଲାଙ୍ଗୀର:ନବ ଦାସଙ୍କ ମୃତ୍ୟୁ ପରେ ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳ ପରିସ୍ଥିତିକୁ ନେଇ ରାଜନୀତି ଜୋର ଧରିଛି । ଉଭୟ ବିଜେପି କଂଗ୍ରେସ ରାଜରାସ୍ତାକୁ ଓହ୍ଲାଇ ରାଜ୍ୟ ସରକାରଙ୍କ ବିରୁଦ୍ଧରେ ନାରାବାଜି କରୁଛନ୍ତି । ଏସବୁ ଭିତରେ ବାଲଙ୍ଗୀରରେ ଆଇନ ଶୃଙ୍ଖଳା ସ୍ଥିତି ପ୍ରସଙ୍ଗରେ କଂଗ୍ରେସ ଓ ବିଜେଡି ମଧ୍ୟରେ କାଦୁଅ ଫିଙ୍ଗା ରାଜନୀତି ଚାଲିଥିବାର ଦେଖିବାକୁ ମିଳିଛି । ପ୍ରଥମେ କଥାରେ କଥାରେ ଦୁଇ ରାଜନୈତିକ ଦଳ ଦୋଷ ଲଦାଲଦି ହେଉଥିବା ବେଳେ ଏବେ ବିଭିନ୍ନ ସଭା ସମିତିରେ ମୁହାଁମୁହିଁ ହେଉଛନ୍ତି । ବିଜେଡି ଦଳ ଗୁଣ୍ଡାଗର୍ଦ୍ଦି ଚଳାଇଥିବା କଂଗ୍ରେସ ଅଭିଯୋଗ କରୁଥିବାବେଳେ ବିଜେଡି ମଧ୍ୟ କଂଗ୍ରେସ ବିରୁଦ୍ଧରେ ସମାନ ଅଭିଯୋଗ କରୁଛି । ଏହାକୁ ନେଇ ରାଜରାସ୍ତାକୁ ଓହ୍ଲାଇଛନ୍ତି ଦୁଇ ପ୍ରମୁଖ ଦଳ । ଏମିତିରେ କିଏ ହିଂସାକୁ ପ୍ରଶୟ ଦେଉଛି ତାହାକୁ ନେଇ ପ୍ରଶ୍ନ ଉଠିଛି ।
ବଲାଙ୍ଗୀରରେ ବିଜେଡି ଓ କଂଗ୍ରେସ ଦଳ ମଧ୍ୟରେ ବିବାଦ ତୀବ୍ର ହୋଇଛି । ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ପାଇଁ ଦୀର୍ଘ ଦିନରୁ କଂଗ୍ରେସ ନେତା ତଥା ବଲାଙ୍ଗୀର ବିଧାୟକ ନରସିଂହ ମିଶ୍ର ସିଧାସଳଖ ବିଜେଡିକୁ ଦୋଷ ଦେଉଛନ୍ତି । ବଲାଙ୍ଗୀରର ବିକାଶରେ ଖୋଦ ସରକାରୀ ଦଳର ନେତା ବାଧା ଦେଉଥିବାର ଅଭିଯୋଗ କରୁଛନ୍ତି । ଅପରପକ୍ଷେ ବିଜେଡି ନରସିଂହ ମିଶ୍ରଙ୍କୁ ଗରୀବର ଶତ୍ରୁ କହିବା ସହ ସେ ହିଂସାକୁ ପ୍ରଶୟ ଦେଉଥିବାର ଅଭିଯୋଗ କରିଛି । ଏହି ରାଜନୀତି ଏବେ ଏଠାରେ ଭିନ୍ନ ମୋଡ଼ ନେଇଥିବା ବେଳେ ଜିଲ୍ଲାର ବିଭିନ୍ନ ସଭା ସମିତିରେ ଦୁଇ ଦଳ ମୁହାଁମୁହିଁ ହେବା ଆରମ୍ଭ ହୋଇଛି ।
ନିକଟରେ ବଲାଙ୍ଗୀର ସଂସ୍କୃତି ଭବନରେ ମନ୍ତ୍ରୀ, ଜିଲ୍ଲାପାଳ ଓ ପୋଲିସ ଉପସ୍ଥିତରେ ବିଜେଡି କାଉନସିଲର ସହ କଂଗ୍ରେସ ବିଧାୟକ ନରସିଂହ ମିଶ୍ର ଓ ତାଙ୍କ କର୍ମୀଙ୍କ କଥା କଟାକଟି ହୋଇଥିଲା । ବିଧାୟକ ଓ ତାଙ୍କ କର୍ମୀ ଜଣେ ମହିଳା କାଉନସିଲରଙ୍କୁ ଆକ୍ରମଣ କରିବା ସହ ଅସଭ୍ୟ ଭାଷାରେ ଗାଳି ଗୁଲଜ କରିଥିଲା ନେଇ ଟାଉନ ଥାନାରେ ଅଭିଯୋଗ ହୋଇଥିଲା । ସେହପରି କଂଗ୍ରେସ ମଧ୍ୟ ପାଲଟା ଅଭିଯୋଗ ଆଣି ବଲାଙ୍ଗୀର ବିଜେଡି ବିରୋଧରେ ଟାଉନ ଥାନାରେ ଏତଲା ଦେଇଥିଲା । ପରବର୍ତ୍ତୀ ସମୟରେ ବଲାଙ୍ଗୀରରେ ପ୍ରଥମ କରି ବିଧାୟକ ନରସିଂହ ମିଶ୍ରଙ୍କ ବିରୋଧରେ ବିଜେଡି ଏକ ବିରାଟ ଆନ୍ଦୋଳନ କରିଥିଲା । ନରସିଂହ ମିଶ୍ର ଗରିବଙ୍କ ଶତ୍ରୁ ତଥା ହିଂସାକୁ ପ୍ରଶୟ ହେଉଥିବା ଓ ହିଂସା ଘଟାଉଥିବାର କହିଥିଲା ବିଜେଡି ।