ବଲାଙ୍ଗୀର: ବହୁଚର୍ଚ୍ଚିତ ମମିତା ମେହେର ହତ୍ୟା ମାମଲା । ବଲାଙ୍ଗୀରରେ ପହଞ୍ଚିଲେ ମହିଳା କମିଶନ ଅଧ୍ୟକ୍ଷା । ରାଜ୍ୟ ମହିଳା କମିଶନର ଚାରି ଜଣିଆ ଟିମ୍ ସମେତ ଅଧ୍ୟକ୍ଷା ମିନତୀ ବେହେରା ବଲାଙ୍ଗୀର ଯାଇ ମୃତ ଶିକ୍ଷୟିତ୍ରୀଙ୍କ ପରିବାରକୁ ଭେଟିଛନ୍ତି । ମମିତାଙ୍କ ପରିବାରକୁ ଦେଖା କରିବା ପରେ ମହିଳା କମିଶନ ଅଧ୍ୟକ୍ଷା ମହାଲିଙ୍ଗ ଯିବେ । ସେଠାରେ ମମିତାଙ୍କ ମୃତଦେହ ପୋତା ଯାଇଥିବା ଷ୍ଟାଡିୟମକୁ ଯାଇ ସ୍ଥିତି ଅନୁଧ୍ୟାନ କରିବେ ଏବଂ ରାଜ୍ୟ ସରକାରଙ୍କୁ ଏହାର ରିପୋର୍ଟ ଦେବେ ।
ସୂଚନା ଅନୁଯାୟୀ, ଆଜି ମହିଳା କମିଶନ ଅଧ୍ୟକ୍ଷା ମିନତୀ ବେହେରା ବଲାଙ୍ଗୀର ତୁରେକେଲା ଝାର୍ଣି ଗାଁ ସ୍ଥିତ ମମିତା ମେହେର ଘରକୁ ଯାଇଛନ୍ତି । ସେଠାରେ ତାଙ୍କ ପରିବାର ଲୋକଙ୍କୁ ସମବେଦନା ଜଣାଇବା ସହ ଦୋଷୀକୁ କିପରି କଠୋର ଦଣ୍ଡି ମିଳିବ ସେନେଇ ପୋଲିସକୁ ନିର୍ଦ୍ଦେଶ ଦେଇଛନ୍ତି । ଏଥିସହ ତାଙ୍କ ପରିବାର ଲୋକଙ୍କ ସୁରକ୍ଷା ଉପରେ ମଧ୍ୟ ଗୁରୁତ୍ବାରୋପ କରିଛନ୍ତି କମିଶନ । ବର୍ତ୍ତମାନ ସୁଦ୍ଧା ପୋଲିସ ଯାହା ବି ପଦକ୍ଷେପ ନେଇଛି ତାହା ସଠିକ୍ ଥିବାବେଳେ ଖୁବଶୀଘ୍ର ଏହି ମାମଲାର ଶୁଣାଣି ହୋଇ ଦୋଷୀ ଦଣ୍ଡ ପାଇବ ବୋଲି ମହିଳା କମିଶନ ଅଧ୍ୟକ୍ଷା ଆଶାବାଦୀ ଅଛନ୍ତି ।