ବଲାଙ୍ଗୀର:ମେଡିକାଲରେ ଲାଞ୍ଚ କାରବାର । ଭୀମ ଭୋଇ ମେଡିକାଲ୍ କଲେଜ ଡାକ୍ତରଖାନାର ପିଛା ଛାଡୁନାହିଁ ବିବାଦ । ପୁଣି ଭୀମ ଭୋଇ ମେଡିକାଲ୍ କଲେଜ ଡାକ୍ତରଖାନାରେ ଲାଞ୍ଚ କାରବାର ହେଉଥିବାର ଏକ ଭିଡିଓ ସାମ୍ନାକୁ ଆସିଛି । ଘଟଣାରେ ସମ୍ପୃକ୍ତ ନର୍ସଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ବିବିଏମସିଏଚ ସୁପରିଣ୍ଡେଣ୍ଟ ପ୍ରଫେସର ମାନସୀ ପଣ୍ଡା ।
ବିଭିନ୍ନ ସମୟରେ ଚର୍ଚ୍ଚାରେ ରହିଥାଏ ଭୀମ ଭୋଇ ମେଡିକାଲ । କେତେବେଳେ ଚିକିତ୍ସା ଅବହେଳା ତ କେତେବେଳେ ଡ଼ାକ୍ତର ଓ ଅନ୍ୟ କର୍ମଚାରୀଙ୍କ ମନମାନି ଇତ୍ୟାଦିକୁ ନେଇ ସବୁ ବେଳେ ଏହି ଡାକ୍ତରଖାନା ବିବାଦ ମଧ୍ୟରେ ରହିଛି । ସେହିପରି ରୋଗୀଠୁ ଟଙ୍କା ଆଦାୟ କରିବାର ମଧ୍ୟ ଅନେକ ଅଭିଯୋଗ ହୋଇଆସୁଛି । ତେବେ ପୂର୍ବରୁ ଅନେକ ଥର ରୋଗୀଙ୍କଠୁ ଲାଞ୍ଚ ନେଇ ଡାକ୍ତର ତଥା ଅନ୍ୟ କର୍ମଚାରୀମାନେ ବିଦା ହୋଇ ସାରିଛନ୍ତି । ଏହା ସତ୍ତ୍ବେ ବି ଏଠି ଲାଞ୍ଚ କାରବାର ଥମିବାର ନାଁ ନେଉନାହିଁ । ଡାକ୍ତରଖାନାରେ ଲାଞ୍ଚ କାରବାର ଆଉ ଏକ ଭିଡିଓ ଭାଇରାଲ ହେବାରେ ଲାଗିଛି । ଯେଉଁଥିରେ ଜଣେ ନର୍ସ ଓ କିଛି କର୍ମଚାରୀ ଲାଞ୍ଚରେ ମିଳିଥିବା ଟଙ୍କା ଭାଗବଣ୍ଟା କରୁଥିବା ଦେଖିବାକୁ ମିଳିଛି । ଭିଡିଓଟି ବଲାଙ୍ଗୀର ଭୀମ ଭୋଇ ମେଡିକାଲ୍ କଲେଜ ଡାକ୍ତରଖାନାର ସ୍ତ୍ରୀ ଓ ପ୍ରସୂତି ଶିଶୁ ବିଭାଗର ବୋଲି ଜଣାପଡ଼ିଛି ।
ଭିଡିଓରେ ଜଣେ ନର୍ସ ଅନ୍ୟ କର୍ମଚାରୀଙ୍କୁ ପ୍ରସୂତି ପରେ ମିଳିଥିବା ଟଙ୍କା ଭାଗ ବଣ୍ଟା କରୁଥିବାର ଦେଖିବାକୁ ମିଳିଛି । ନର୍ସ ଜଣକ ବିଭିନ୍ନ ପ୍ରସୂତି ମହିଳାଙ୍କଠାରୁ 3 ଶହ, ହଜାର ଇତ୍ୟାଦି ଟଙ୍କା ମିଳିତ ଥିବାର କହୁଥିବାବେଳେ ତାଙ୍କୁ ସେ ଅନ୍ୟ ଜଣେ ମହିଳା କର୍ମଚାରୀଙ୍କ ଦେବା ସହ ଅନ୍ୟମାନଙ୍କୁ ମଧ୍ୟ ଟଙ୍କା ଦେଇ ଦେବାର କଥା କହୁଛନ୍ତି । ଟଙ୍କା ସେ ଅନ୍ୟ କର୍ମଚାରୀଙ୍କୁ ଦେଉଥିବାର ସ୍ପଷ୍ଟ ଜଣା ପଡ଼ିଛି । ଏହି ଭିଡିଓ ସାମ୍ନାକୁ ଆସିବା ପରେ ବିବିଏମସିଏଚ୍ ଡାକ୍ତରଖାନା ସୁପରିଟେଣ୍ଡଣ୍ଟ ପ୍ରଫେସର ଡାକ୍ତର ମାନସୀ ପଣ୍ଡା କହିଛନ୍ତି ଯେ, ଏହି ଭିଡିଓ ସମସ୍ତଙ୍କୁ ଲଜ୍ଜିତ କରିଛି । ସଂପୃକ୍ତ ଘଟଣା ପରେ ଏଥିରେ ସାମିଲ ଥିବା ନର୍ସଙ୍କୁ ଅନ୍ୟ ବିଭାଗକୁ ବଦଳି କରା ଯାଇଛି । ସେହିପରି ତାଙ୍କ ନାମରେ ଅଭିଯୋଗ ପତ୍ର ଉପୋରକ୍ତ ଅଧିକାରୀଙ୍କୁ ପ୍ରଦାନ କରା ଯାଇଯାଇଛି । ଉପରୋକ୍ତ ଅଧିକାରୀ ଯାହା ନିର୍ଦ୍ଦେଶ ଦେବେ ତଦ୍ ଅନୁସାରେ ପଦକ୍ଷେପ ନିଆ ଯିବ ।"