ଭିଜିଲାନ୍ସ ଜାଲରେ କୋଟିପତି ସମବାୟ ବ୍ୟାଙ୍କ ସମ୍ପାଦକ

ଭିଜିଲାନ୍ସ ଜାଲରେ କୋଟିପତି ସମବାୟ ବ୍ୟାଙ୍କ ସମ୍ପାଦକ । ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବଲାଙ୍ଗୀର ସମବାୟ ବ୍ୟାଙ୍କର ସାଧାରଣ ସମ୍ପାଦକ ଅଶୋକ କୁମାର ମହାପାତ୍ରଙ୍କ ଘରେ ଭିଜିଲାନ୍ସ ପକ୍ଷରୁ ଚଢାଉ କରାଯାଇଛି ।

ବଲାଙ୍ଗୀର: ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସରେ ଜାଲରେ ଛନ୍ଦି ହୋଇଛନ୍ତି ବଲାଙ୍ଗୀର ସମବାୟ ବ୍ୟାଙ୍କର ସାଧାରଣ ସମ୍ପାଦକ ଅଶୋକ କୁମାର ମହାପାତ୍ର । ଭିଜିଲାନ୍ସ ପକ୍ଷରୁ ତାଙ୍କ ବାସଭବନ ସମେତ 4ଟି ସ୍ଥାନରେ ଏକକାଳୀନ ଚଢାଉ କରାଯାଇଛି । ଗୁରୁବାର ଭୋର ସମୟରୁ ଭିଜିଲାନ୍ସର ଏକ ଟିମ୍ ଚଢାଉ କରିଛି ।

ବଲାଙ୍ଗୀର ଭିଜିଲାନ୍ସ ସ୍ବତନ୍ତ୍ର ଅଦାଲତଙ୍କ ନିର୍ଦ୍ଦେଶ କ୍ରମେ ଏକକାଳୀନ ସମବାୟ ବ୍ୟାଙ୍କ ସ୍ଥିତ ତାଙ୍କ ଅଫିସ, ବଲାଙ୍ଗୀର ମାଲପଡା ସ୍ଥିତ ପୈତୃକ ବାସଭବନ, ଦାସମତୀ ନଗର ସ୍ଥିତ ବାସଭବନ ଓ ଭବାନୀ ପାଟଣା ସ୍ଥିତ ତାଙ୍କ ଝିଅ ଘରେ ଏହି ଚଢ଼ାଉ ଜାରି ରହିଛି ।

ଏହି ଚଢାଉରେ ବହୁ ଗୁରୁତ୍ବପୂର୍ଣ୍ଣ ଜମିର କାଗଜପତ୍ର, ଏକାଧିକ ବ୍ୟାଙ୍କ ଜମା ଖାତା, ବଣ୍ଡ ଓ ଏକଲକ୍ଷରୁ ଊର୍ଦ୍ଧ୍ବ ନଗଦ ଟଙ୍କା ଜବତ କରିଛି ଭିଜିଲାନ୍ସ । ବର୍ତ୍ତମାନ ସୁଦ୍ଧା ଆୟବହିର୍ଭୂତ ସମ୍ପତ୍ତିର ପରିମାଣ ଜଣାପଡି ନଥିବା ବେଳେ ଆକଳନ ପରେ ପ୍ରକୃତ ତଥ୍ୟ ସାମ୍ନାକୁ ଆସିବ ବୋଲି ତଦନ୍ତକାରୀ ଅଧିକାରୀ କହିଛନ୍ତି ।

ବଲାଙ୍ଗୀରରୁ ଶେଖ ମହମ୍ମଦ ୱାହିଦ୍, ଇଟିଭି ଭାରତ