ବଲାଙ୍ଗୀର ସମବାୟ ବ୍ୟାଙ୍କରେ ବ୍ୟାପକ ଦୁର୍ନୀତି

ପ୍ରକୃତ ଚାଷୀ ଋଣ ପାଇବାକୁ ଛଟପଟ ହେଉଥିବା ବେଳେ ଭୂତ ଚାଷୀ ପାଇଛନ୍ତି ଋଣ । ସମବାୟ ବ୍ୟାଙ୍କରେ ଚାଲିଛି ଲକ୍ଷଲକ୍ଷ ଟଙ୍କାର ଦୁର୍ନୀତି ।

ବଲାଙ୍ଗୀର: ଚାଷୀଙ୍କୁ ନେଇ ବଲାଙ୍ଗୀରରେ ଚାଲିଛି ସାଂଘାତିକ ଖେଳ । ଭୂତ ଚାଷୀଙ୍କୁ ମିଳିଛି ଋଣ । ପ୍ରକୃତ ଚାଷୀ ହତାସ ।

ସୂଚନା ଅଧିକାରରେ ଆଇନ ବଳରେ ମିଳିଥିବା ତଥ୍ୟରେ ଏହା ସ୍ପଷ୍ଟ ହୋଇଛି । ଯେଉଁଥିରେ ଦୁର୍ନୀତି ବାରି ହୋଇଯାଉଛି । ଚାଷୀଙ୍କ ନାଁରେ ଏହି ହରିଲୂଟ ହୋଇଥିବା ବେଳେ କିଛି ଚାଷୀଙ୍କ ଅଜ୍ଞାତରେ ତାଙ୍କ ନାଁରେ ଋଣ ଉଠିଥିବାର ଅଭିଯୋଗ ହୋଇଛି । ତେବେ ସମ୍ପୃକ୍ତ ସମବାୟ ବ୍ୟାଙ୍କ କତ୍ତୃପକ୍ଷ ଏହାକୁ ଅସ୍ବୀକାର କରିଛନ୍ତି । ସମବାୟ ବ୍ୟାଙ୍କ ଋଣ ଦେଇଥିବା 15ରୁ ଅଧିକ ଚାଷୀଙ୍କ କୌଣସି ତଥ୍ୟ ମିଳୁନାହିଁ । ସମାନ ଭାବରେ ସେମାଙ୍କ ନାଁରେ ଚାଷ ଜମି ମଧ୍ୟ ନଥିବା ବେଳେ ଲକ୍ଷାଧିକ ଟଙ୍କା ସେମାଙ୍କୁ ଋଣ ଦିଆ ଯାଇଛି ବୋଲି ସୂଚନା ଅଧିକାର କାର୍ମୀ ଅଭିଯୋଗ କରିଛନ୍ତି । ଆଉ ଏହି ବ୍ୟାଙ୍କରୁ କିଛି ଚାଷୀଙ୍କ ଅଜାଣତରେ ମଧ୍ୟ ଋଣ ଉଠିଥିବାର ଅଭିଯୋଗ ଆସିଛି ।

ଗୋଟିଏ ପଟେ ଭୂତ ଚାଷୀ ନାଁରେ ଜରସିଙ୍ଗା ସମବାୟ ବ୍ୟାଙ୍କରୁ ଟଙ୍କା ହରିଲୁଟ ହୋଇଥିବାର ଅଭଯୋଗ ହୋଇଥିବା ବେଳେ ବ୍ୟାଙ୍କ କର୍ତ୍ତୃପକ୍ଷ ଏହାକୁ ମାନିବାକୁ ପ୍ରସ୍ତୁତ ନୁହଁନ୍ତି । ସମବାୟ ବ୍ୟାଙ୍କରେ କୌଣସି ପ୍ରକାରର ବେଆଇନ କାମ ହୋଇନାହିଁ । ଯେକୌଣସି ତଦନ୍ତକୁ ସାମ୍ନା କରିବାକୁ ସମବାୟ ବ୍ୟାଙ୍କ ପ୍ରସ୍ତୁତ ବୋଲି କହିଛନ୍ତି ସମବାୟ ବ୍ୟାଙ୍କ ଅଧ୍ୟକ୍ଷ ଲକ୍ଷ୍ମଣ ମେହେର ।

ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ