ବଲାଙ୍ଗୀର: ବଲାଙ୍ଗୀରରେ ଶାସକ ବିଜେଡି ଦଳର ଦାଦାଗିରି ଅଭିଯୋଗ । କିଛି ବିଜେଡି କର୍ମୀଙ୍କ ମରଣାନ୍ତକ ଆକ୍ରମଣରେ ଜଣେ କୋଶଳ କର୍ମୀ ଗୁରୁତର ଆହତ ହୋଇଥିବାର ଅଭିଯୋଗ ହୋଇଛି। ଅଭିଯୋଗ ଅନୁସାରେ ବଲାଙ୍ଗୀର ଖପ୍ରାଖୋଲ ଥାନା ଅନ୍ତର୍ଗତ ବେଙ୍କେରା ଗ୍ରାମର ଆଦିବାସୀ ଯୁବକ ରାଜୀବ ରଞ୍ଜନ ବରିହା କୋଶଳ ଦଳରେ ରହି ସକ୍ରିୟ ଭାବରେ କାର୍ଯ୍ୟ କରି ଆସୁଥିଲେ ଏବଂ ସେହି ଅଞ୍ଚଳରେ ହେଇଥିବା ଦୁର୍ନୀତି ବିରୋଧରେ ଲଢେ଼ଇ କରୁଥିଲେ ।
ବିଜେଡିର ଦାଦାଗିରି: ଜଣେ କୋଶଳ କର୍ମୀଙ୍କୁ ମରଣାନ୍ତକ ଆକ୍ରମଣ
ତେବେ ଏହାକୁ ନେଇ ସ୍ଥାନୀୟ ପାଟଣାଗଡ଼ ବିଧାୟକଙ୍କ କିଛି ଖାସ ତଥା ବିଜେଡ଼ିର କର୍ମୀମାନେ ତାଙ୍କୁ ଧମକ ଦେବା ସହ ମରଣାନ୍ତକ ଆକ୍ରମଣ କରିଥିଲେ। ଯେଉଁଥିରେ ଯୁବକ ଜଣକ ଗୁରୁତର ଆହତ ହୋଇଥିବା ବେଳେ ପ୍ରଥମେ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲ୍ ଓ ପରେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ସେପଟେ ବିଧାୟକଙ୍କ ଦୁର୍ନୀତିମୂଳକ କାମକୁ ବିରୋଧ କରିବାରୁ ତାଙ୍କୁ ଏହି ଆକ୍ରମଣ କରିଥିବାର ଆହତ ଯୁବକ ଅଭିଯୋଗ କରିଛନ୍ତି।