ବଲାଙ୍ଗୀର: ଦେଶରେ କୋରୋନାର ବିଭିନ୍ନ ସମୟରେ କରୁଣ ଚିତ୍ର ସାମନାକୁ ଆସୁଥିବା ବେଳେ ବଲାଙ୍ଗୀରରେ ମଧ୍ୟ ଏକ ଘଟଣା ଏବେ ସମସ୍ତଙ୍କୁ ଚିନ୍ତା କରିବାକୁ ବାଧ୍ୟ କରିଛି । ଏଠି କୋରୋନାରେ ମୃତ୍ୟୁ ପରେ ନିଜ ଗାଁରେ ଅନ୍ତିମ ସଂସ୍କାର ପାଇଁ ଲୋକେ ମନା କରିବାରୁ ଜଣେ ପୁଅ ନିଜର ବାପାର ମୃତଦେହ ଧରି ହଇରାଣ ହୋଇଛି ।
କୋରୋନାରେ ବାପାଙ୍କ ମୃତ୍ୟୁ, ଗାଁକୁ ମୃତ ଦେହ ମନା
ସୂଚନା ଅନୁସାରେ ବଲାଙ୍ଗୀର ସଇଁତଳା ବ୍ଲକର ଦେଢେଲ ଗ୍ରାମର ଘନଶ୍ୟାମ ସାହୁଙ୍କ ବାପା ଅନାର୍ଯ୍ୟ ସାହୁ କୋରୋନା ସଂକ୍ରମିତ ହୋଇ ଗୁରୁତର ହୋଇଥିଲେ ଏବଂ ତାଙ୍କର ଚିକିତ୍ସା ପାଇଁ ସେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜରେ ତାଙ୍କୁ ଭର୍ତ୍ତି କରିଥିଲେ । ତେବେ ଆଜି ଚିକିତ୍ସାଧୀନ ଅବସ୍ଥାରେ ତାଙ୍କର ଏଠି ମୃତ୍ୟୁ ହୋଇଥିଲା । ସେପଟେ ପୁଅ ଜଣକ ମୃତଦେହ ନେଇ ଗାଁକୁ ଯିବାକୁ ଥିବାବେଳେ ଗ୍ରାମବାସୀ ତାଙ୍କୁ ମୃତଦେହ ଆଣିବା ପାଇଁ ରୋକଠୋକ ମନା କରିଥିଲେ । ଯାହାଫଳରେ ଦୀର୍ଘ ଘଣ୍ଟା ଧରି ପୁଅ ତା ବାପାର ମୃତଦେହ ଧରି ହଇରାଣ ହୋଇଥିଲେ ।