ଝାଡାବାନ୍ତିର ଶିକାର ହେଲେ 25ରୁ ଉର୍ଦ୍ଧ୍ବ ଛାତ୍ରୀ

Students Sick In School: ଟିଟିଲାଗଡ ବ୍ଲକ ଦେଶିଲ ଗ୍ରାମ ସ୍ଥିତ ସରକାରୀ ଆଦିବାସୀ ଆବାସିକ ବିଦ୍ୟାଳୟରେ 25ରୁ ଉର୍ଦ୍ଧ୍ବ ଛାତ୍ରୀ ଅସୁସ୍ଥ ହୋଇଥାବା ଜଣାପଡ଼ିଛି । ପାଣି ପାଇଁ ଏଭଳି ହୋଇଥିବା ଅନୁମାନ କରାଯାଉଛି । ଅଧିକ ପଢନ୍ତୁ

ବଲାଙ୍ଗୀର: ଜିଲ୍ଲାର ଏକ ସରକାରୀ ଆବାସିକ ସ୍କୁଲର ବହୁ ଛାତ୍ରୀ ଅସୁସ୍ଥ ହୋଇଛନ୍ତି । ଝାଡାବାନ୍ତି ବ୍ୟାପିବାରୁ 25ରୁ ଉର୍ଦ୍ଧ୍ବ ଛାତ୍ରଛାତ୍ରୀ ସ୍ୱାସ୍ଥ୍ୟବସ୍ଥା ବିଗିଡିଥିବା ଜଣାପଡିଛି । ଏକ ସ୍ବତନ୍ତ୍ର ଡାକ୍ତରୀ ଦଳ ସ୍କୁଲରେ ପହଞ୍ଚି ଚିକିତ୍ସା କରୁଥିବାବେଳେ ବର୍ତ୍ତମାନ ସମସ୍ତଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଥିବା ଜଣାପଡିଛି । ବଲାଙ୍ଗୀର ଜିଲ୍ଲାର ଟିଟିଲାଗଡ ବ୍ଲକ ଦେଶିଲ ଗ୍ରାମ ସ୍ଥିତ ସରକାରୀ ଆଦିବାସୀ ଆବାସିକ ସ୍କୁଲର ଏଭଳି ଘଟିଛି । ତେବେ କେଉଁ କାରଣରୁ ଏଭଳି ପରିସ୍ଥିତି ସୃଷ୍ଟି ହେଲା ତାହା ଜଣାପଡିନାହିଁ ।

ତେବେ ବିଦ୍ୟାଳୟର ପ୍ରଧାନ ଶିକ୍ଷକ କାନୁନ କିଶୋର ଭୋଇଙ୍କ କହିବା ଅନୁସାରେ ଆଜି ସକାଳୁ କିଛି ଛାତ୍ରଛାତ୍ରୀଙ୍କୁ ପେଟ ବ୍ୟଥା ସହ ଝାଡାବାନ୍ତି ହୋଇଥିଲା । ଅପରାହ୍ନରେ ଏଭଳି କି କିଛି ଛାତ୍ରଛାତ୍ରୀ ଅସୁସ୍ଥ ହୋଇଥିଲେ । ତେବେ ଅସୁସ୍ଥ ଛାତ୍ରଛାତ୍ରୀଙ୍କୁ ଡାକ୍ତରଖାନା ଆଣିବା ସମ୍ଭବ ନା ହେବାରୁ ,ସେ ଜିଲ୍ଲା ସମାଜ କଲ୍ୟାଣ ଅଧିକାରୀଙ୍କୁ ଖବର ଦେଇଥିଲେ । ପରେ ଖବର ପାଇ ଖୋଲାନ ଗୋଷ୍ଠୀସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡା. ମୀନକେତନ କିଷାନଙ୍କ ନେତୃତ୍ୱରେ ଡାକ୍ତରୀ ଟିମ୍ ଆସି ଛାତ୍ରୀଙ୍କ ସ୍ୱାସ୍ଥ୍ୟ ପରୀକ୍ଷା କରିବା ସହ ତାଙ୍କର ଚିକିତ୍ସା କରିଥିଲେ । ସମସ୍ତ ଛାତ୍ରୀଙ୍କୁ ଆବଶ୍ୟକ ଔଷଧ ସହ ଓ ଆରଏସ ବଣ୍ଟନ କରାଯାଇଛି ।

ଏହା ମଧ୍ୟ ପଢନ୍ତୁ....ଆଜି ବିଶ୍ବପ୍ରସିଦ୍ଧ ବରଗଡ଼ ଧନୁଯାତ୍ରା ଉଦଘାଟନ, କଂସଙ୍କ କୋପରେ କମ୍ପିବ ମଥୁରାନଗରୀ

ଅନ୍ୟପଟେ ଝାଡାବାନ୍ତିରେ ଆକ୍ରାନ୍ତ ହୋଇଥିବା ଛାତ୍ରୀମାନେ ବର୍ତ୍ତମାନ ସୁସ୍ଥ ରହିଛନ୍ତି । କାହାକୁ ମଧ୍ୟ ଡାକ୍ତରଖାନାରେ ଭର୍ତ୍ତି କରିବା ଆବଶ୍ୟକତା ନଥିବା ସୂଚନା ଦେଇଛନ୍ତି ଖୋଲା ସ୍ବାସ୍ଥ୍ୟ ଅଧିକାରୀ । ତେବେ ହଷ୍ଟେଲ ମେସରେ ଖାଇବା ପରେ ଝାଡାବାନ୍ତିରେ ଆକ୍ରାନ୍ତ ହୋଇଥିବାର ଅଭିଯୋଗ ହୋଇଛି । ସେହିପରି ବିଦ୍ୟାଳୟରେ ଗତ ୩ରୁ ୪ଦିନ ହେଲା ସକାଳ ୮ରୁ ୧ଟା ପର୍ଯ୍ୟନ୍ତ ବିଦ୍ୟୁତ କାଟ ଯୋଗୁଁ ପାଣି ଫିଲଟର କାମ କରୁନଥିବା ଅଭିଯୋଗ ହୋଇଛି । ତେଣୁ ପିଲାମାନେ ବୋରୱେଲରୁ ପାଣି ସଂଗ୍ରହ କରି ପିଇବା ମଧ୍ୟ ଏକ କାରଣ ହୋଇପାରେ ବୋଲି କୁହାଯାଇଛି ।ଏହି ବିଦ୍ୟାଳୟରେ ୧୯୭ ଛାତ୍ରୀ ହଷ୍ଟେଲରେ ରହୁଥିବାବେଳେ ୧୮୬ ଜଣ ଛାତ୍ରୀ ଡେସ୍କଲାର ରହିଛନ୍ତି । ନିୟମିତ ସେମାନଙ୍କ ସ୍ବାସ୍ଥ୍ୟାବସ୍ଥା ଉପରେ ନଜର ରଖାଯିବା ବୋଲି ସୂଚନା ମିଳିଛି ।

ଇଟିିଭି ଭାରତ, ବଲାଙ୍ଗୀର