ଅନୁଗୋଳ: ଜିଲ୍ଲା ଜରପଡା ଥାନା ରାଉତାଳ ଗାଁର ଏକ ପରିତ୍ୟକ୍ତ କୂଅରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ୍ୟୁର କାରଣ ଜଣାପଡିନାହିଁ । ପୋଲିସର ତଦନ୍ତ ଜାରି ରହିଛି ।
ସୂଚନାଅନୁସାରେ, ଗତକାଲି ରାତିରେ କୂଅ ଉପରୁ ସମ୍ପୃକ୍ତ ଯୁବକଙ୍କ ଏକ ମନିପର୍ସ , ଏକ ଏଟିଏମ୍ କାର୍ଡ , ଗାଡ଼ି ରେଜିଷ୍ଟ୍ରେସନ କାର୍ଡ ଓ ମୋବାଇଲ ପଡ଼ିଥିଲା । ଏହା ଦେଖି କୂଅ ପାଖକୁ ଗାଁ ଲୋକ ଯାଇ ଯୁବକଙ୍କ ମୃତଦେହ ଭାସୁଥିବାରେ ଦେଖିବାକୁ ପାଇଥିଲେ । ଏ ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ ।
ପୋଲିସ, ଦମକଳ ବାହିନୀ ସହାୟତାରେ କୂଅ ଭିତରୁ ମୃତ ଉଦ୍ଧାର କରାଯାଇଥିଲା । ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । କୂଅ ପାଖରୁ କିଛ ଦୂରରେ ଏକ ସିଡି ଡିଲକ୍ସ ମୋଟରସାଇକେଲ ମଧ୍ୟ ମିଳିଥିଲା। ମୃତ ଯୁବକ ଜଣକ ହେଲେ କଣିହାଁ ଥାନା ଡେରେଙ୍ଗ ଗାଁର ପ୍ରଦୀପ ସାହୁଙ୍କ ପୁଅ ସଞ୍ଜୟ କୁମାର ସାହୁ ବୋଲି ପ୍ରାଥମିକ ତଦନ୍ତରୁ ଜଣାପଡିଛି ।
ତେବେ ସମ୍ପୃକ୍ତ ଯୁବକ ଜଣକ ଆତ୍ମହତ୍ୟା କରିଛନ୍ତି ନା ତାଙ୍କୁ ଯୋଜନାବଦ୍ଧ ଭାବରେ ହତ୍ୟା କରାଯାଇଛି ସେ ନେଇ ସନ୍ଦେହ ସୃଷ୍ଟି ହୋଇଛି । ପୋଲିସ ଘଟଣାର ପର୍ଦ୍ଦାଫାଶ କରିବାକୁ ତଦନ୍ତ ଜାରି ରଖିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ