କମ୍ପାନୀ କାର୍ଯ୍ୟରେ ନିୟୋଜିତ ଶ୍ରମିକଙ୍କ ସନ୍ଦେହଜନକ ମୃତ୍ୟୁ

କମ୍ପାନୀ ଆରମ୍ଭରୁ ଅଘଟଣ । ସିମେଣ୍ଟ ବୁହା କାର୍ଯ୍ୟରେ ନିୟୋଜିତ ଶ୍ରମିକଙ୍କ ସନ୍ଦେହଜନକ ମୃତ୍ୟୁକୁ ନେଇ ଧୁବାମହିଳା ଗ୍ରାମରେ ଉତ୍ତେଜନା । ଅଧିକ ପଢନ୍ତୁ

ଅନୁଗୋଳ: ମୈତ୍ରୀ କମ୍ପାନୀରେ ଆରମ୍ଭରୁ ଅଘଟଣ । କମ୍ପାନୀ ତିଆରି କାର୍ଯ୍ୟ ଚାଲିଥିବା ବେଳେ ଶ୍ରମିକଙ୍କ ସନ୍ଦେହଜନକ ମୃତ୍ୟୁ । ଅନୁଗୋଳ ନିଶା ଶିଳ୍ପାଞ୍ଚଳ ଥାନା ଧୁବାମହିଳାରେ ଥିବା ସ୍କୁଲ ପଛ ପଟୁ ଶ୍ରମିକଙ୍କ ମୃତଦେହ ମିଳିବା ପରେ ଗ୍ରାମରେ ଦେଖାଦେଇଛି ଉତ୍ତେଜନା । ମୃତକ ଜଣଙ୍କ ହେଉଛନ୍ତି ଅଭିରାମ ପ୍ରଧାନ ।

ମିଳିଥିବା ସୂଚନା ଅନୁଯାୟୀ, ଧୁବାମହିଳା ଗ୍ରାମ ନିକଟରେ ମୈତ୍ରୀ ନାମକ ଏକ କମ୍ପାନୀ ନାଲକୋ ପାଇଁ କାର୍ଯ୍ୟ ଆରମ୍ଭ କରୁଛି । ଯେଉଁଥି ପାଇଁ ସିମେଣ୍ଟ ବୋହିବା କାର୍ଯ୍ୟରେ ନିୟୋଜିତ ହୋଇଥିଲେ ରାଇଝରଣ ଗ୍ରାମର ଅଭିରାମ ପ୍ରଧାନ, ଚିହୁରୁ ମାଝୀ, କରୁଣା ମାଝୀ, ପର୍ସୁ ପଲେଇ । ତେବେ ସିମେଣ୍ଟ ଅନ ଲୋଡ଼ିଂ ସରିବା ପରେ ଚିହୁରୁ ମାଝି, କରୁଣା ମାଝୀ ଓ ପର୍ସୁ ପଲେଇ ସେଠାରୁ କେଉଁ ଆଡେ ଚାଲି ଯାଇଥିଲେ । ସେମାନେ ଯିବାର କିଛି ସମୟ ପରେ ଅଭିରାମ ପ୍ରଧାନଙ୍କ ମୃତ ଶରୀର ସ୍କୁଲ ପଛ ପଟେ ପଡ଼ିଥିବା ସ୍ଥାନୀୟ ଅଞ୍ଚଳବାସୀ ଦେଖିବାକୁ ପାଇଥିଲେ ।

ତେବେ କେହି ତାଙ୍କୁ ହତ୍ୟା କରି ଏଠାରେ ଫୋପାଡି ଦେଇଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି । ଏଥି ସହ ତାଙ୍କୁ କମ୍ପାନୀ କାର୍ଯ୍ୟରେ ନିୟୋଜିତ କରିଥିବା ବ୍ୟକ୍ତିଙ୍କୁ ଦାୟୀ କରିଛନ୍ତି ସ୍ଥାନୀୟ ଲୋକେ । କମ୍ପାନୀ କାର୍ଯ୍ୟ ଜାରି ରହିଥିବା ବେଳେ ସିମେଣ୍ଟକୁ ଗାଁ ସ୍କୁଲରେ ରଖାଯାଉଛି । ଯାହାକୁ ନେଇ ସ୍ଥାନୀୟ ଲୋକେ ବିରୋଧ କରିଥିଲେ । ତେବେ ବିଳମ୍ବିତ ରାତି ପର୍ଯ୍ୟନ୍ତ ପୋଲିସ ପହଁଞ୍ଚି ନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା । ସେପଟେ ମୃତ୍ୟୁ ବ୍ୟକ୍ତିଙ୍କ ପରିବାରକୁ କ୍ଷତିପୂରଣ ଦେବାକୁ ଦାବି କରିଥିଲେ ଅଞ୍ଚଳବାସୀ ।

ଇଟିଭି ଭାରତ, ଅନୁଗୋଳ