ଅନୁଗୋଳ:ମାଛ ଚାଷ କରି ସ୍ବାବଲମ୍ବୀ ମହିଳା । ରଙ୍ଗୀନ ମାଛ ଚାଷ କରି ଏବେ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି ଅନୁଗୋଳ ଜିଲ୍ଲା କୁମୁରିସିଂହା ପଞ୍ଚାୟତର ବଡବାହାଲ ଗାଁର ୧୦ ଜଣ ମହିଳା । କୁଣ୍ଡରେ ଭଳିକି ଭଳି ମାଛ ଚାଷ କରି ବେଶ ଦୁଇ ପଇସା ରୋଜଗାର କରି ପାରିଛନ୍ତି । ଓଡିଶା ଜୀବିକା ମିଶନ ସହାୟତାରେ ଏହି ମାଛ ଚାଷ ଆରମ୍ଭ କରିଥିଲେ ମା ତାରା ତାରିଣୀ ସ୍ବୟଂ ସହାୟକ ଗୋଷ୍ଠୀର ମହିଳା ।
ବଡ଼ବାହାଳ ଗାଁର ଅଧିକାଂଶ ଲୋକ ଚାଷବାସ ଉପରେ ନିର୍ଭର କରନ୍ତି । ତେଣୁ ମହିଳା ମାନେ ମଧ୍ୟ ଘର କାମ ବ୍ୟତୀତ ଚାଷବାସରେ ସହାୟତା କରନ୍ତି । କିନ୍ତୁ ରକ୍ଷଣଶୀଳ ମନୋଭାବ ଯୋଗୁଁ ଅଧିକାଂଶ ମହିଳା ଘରୁ ବାହାରକୁ ବାହାରୁ ନାହାନ୍ତି । ସେଥିପାଇଁ ଦୀର୍ଘ ୧୦ବର୍ଷ ପୂର୍ବେ ଗାଁର ୧୦ଜଣ ମହିଳା ମିଶି ମା ତାରା ତାରିଣୀ ସ୍ବୟଂ ସହାୟକ ଗୋଷ୍ଠୀ କରିଥିଲେ ମଧ୍ୟ ତାହା କେବଳ କାଗଜ କଲମରେ ସୀମିତ ଥିଲା । ହେଲେ ଓଡିଶା ଜୀବିକା ମିଶନ ସେମାନଙ୍କ ସାମାଜିକ ଓ ଆର୍ଥିକ ସ୍ଥିତିକୁ ଏବେ ବଦଳାଇ ଦେଇଛି । ମିଶନ ତରଫରୁ ଗାଁର ୧୦ଜଣ ମହିଳାଙ୍କୁ ରଙ୍ଗୀନ ମାଛ ଚାଷ କରିବାକୁ ପରାମର୍ଶ ଦିଆ ଯାଇଥିଲା । ଏହି ଚାଷ କଲେ ଘରୁ ବାହାରକୁ ଯିବାକୁ ପଡ଼ିବ ନାହିଁ । ଘରେ ବସି ସବୁ କିଛି କରିହେବ । ଭଲ ଦୁଇ ପଇସା ଆୟ ହୋଇ ପାରିବ ବୋଲି ବୁଝାସୁଝା କରା ଯାଇଥିଲା ।
ପ୍ରଥମେ ସେମାନଙ୍କ ଏ ସମ୍ପର୍କରେ ତାଲିମ ଦିଆଗଲା । ଏହାପରେ ସମସ୍ତ ପ୍ରକାର ଆର୍ଥିକ ଓ ବୈଷୟିକ ସହାୟତା ମଧ୍ୟ ଦିଆ ଯାଇଥିଲା । ଫଳରେ ମହିଳା ମାନେ ବିଭିନ୍ନ ପ୍ରକାର ରଙ୍ଗୀନ ମାଛ ଚାଷ ଆରମ୍ଭ କରିଥିଲେ । ଏହାପରେ ପ୍ରତି ମାସରେ ହଜାର ହଜାର ଟଙ୍କାର ମାଛ ବିକ୍ରୀ କରିଛନ୍ତି । କୃଷି ବିଜ୍ଞାନ କେନ୍ଦ୍ର ତରଫରୁ ସେମାନଙ୍କ ମାଛ କ୍ରୟ କରାଯାଉଛି । ବାହାରୁ ବେପାରୀ ମାନେ ମଧ୍ୟ ଆସି ମାଛ ନେଉଛନ୍ତି । ଏଥିପ୍ରତି ମହିଳା ମାନଙ୍କ ଆଗ୍ରହ ବଢ଼ିବାରେ ଲାଗିଛି ।