ଅନୁଗୋଳ: ଜିଲ୍ଲାର ଛେଣ୍ଡିପଦାସ୍ଥିତ ସାଇ ଶ୍ରଦ୍ଧା ନର୍ସିଂ କଲେଜରେ ୫ ଜଣ ଆଦିବାସୀ ଛାତ୍ରୀଙ୍କୁ କଲେଜ କର୍ତ୍ତୃପକ୍ଷ ନକଲି ଆଡ୍ମିଟ କାର୍ଡ ଦେଇଥିବାରୁ ସେମାନେ ପରୀକ୍ଷା ଦେବାରୁ ବଞ୍ଚିତ ହୋଇଥିବା ଅଭିଯୋଗ ହୋଇଥିଲା । ଏନେଇ ସେମାନେ ବାରମ୍ବାର ପୋଲିସ ଓ ପ୍ରଶାସନକୁ ଅଭିଯୋଗ କରିବା ପରେ ମଧ୍ୟ କୌଣସି ସୁଫଳ ନମିଳିବାରୁ ବାଧ୍ୟ ହୋଇ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନରେ ବସିଛନ୍ତି । ଏହାସହ ତାଙ୍କ ସମସ୍ୟାର ସମାଧାନ ନହେଲେ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ହିଁ ଆତ୍ମାହୁତି ଦେବେ ବୋଲି ଚେତାବନୀ ଦେଇଛନ୍ତି ।
ଧାରଣାରତ ଛାତ୍ରୀମାନଙ୍କ ଅଭିଯୋଗ ଅନୁସାରେ, ସେମାନେ ସମସ୍ତେ ଅନୁଗୋଳ ଛେଣ୍ଡିପଦାସ୍ଥିତ ସାଇ ଶ୍ରଦ୍ଧା ନର୍ସିଂ କଲେଜରେ ଦ୍ଵିତୀୟ ବର୍ଷର ଛାତ୍ରୀ । କଲେଜରେ ନାମଲେଖା ଓ ପରୀକ୍ଷା ଫର୍ମ ପୂରଣ ପାଇଁ ଲକ୍ଷାଧିକ ଟଙ୍କା ଜମା କରିଛନ୍ତି । ଜାନୁଆରୀ ମାସ ୯ ତାରିଖରେ ଜିଲ୍ଲାର ଏକ ଘରୋଇ ଇଞ୍ଜିନିୟରିଂ କଲେଜରେ ସେମାନଙ୍କ ପରୀକ୍ଷା କେନ୍ଦ୍ର ହୋଇଥିଲା । ଯେତେବେଳେ ଆଡ୍ମିଟ କାର୍ଡ ଧରି ପରୀକ୍ଷା କେନ୍ଦ୍ରକୁ ଯାଇଥିଲେ ସେତେବେଳେ ଦାୟିତ୍ୱରେ ଥିବା ଅଧିକାରୀମାନେ ତାହା ଯାଞ୍ଚ କରି ନକଲି ବୋଲି ଜାଣି ପାରିଥିଲେ । ଛାତ୍ରୀ ମାନଙ୍କୁ ପରୀକ୍ଷା ଦେବାକୁ ବାରଣ ମଧ୍ୟ କରିଥିଲେ । ଏହାପରେ ଛାତ୍ରୀମାନେ ସେମାନଙ୍କ ଅଭିଭାବକଙ୍କୁ ସାଥିରେ ନେଇ ନର୍ସିଂ କଲେଜ ଯାଇ ଅଧ୍ୟକ୍ଷଙ୍କୁ ପଚାରିବା ପରେ ଅଧ୍ୟକ୍ଷ ସେମାନଙ୍କୁ ଧମକଚମକ ଦେଇ ବିଦା କରି ଦେଇଥିଲେ । ଏହାପରେ ସେମାନେ ଛେଣ୍ଡିପଦା ଥାନାର ଦ୍ୱାରସ୍ଥ ହୋଇଥିଲେ । ସେଠାରେ ମଧ୍ୟ ନ୍ୟାୟ ନମିଳିବାରୁ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିଲେ । ଏହିପରି ବାରମ୍ବାର ପୋଲିସ ଓ ପ୍ରଶାସନର ଦ୍ୱାରସ୍ଥ ହୋଇଥିଲେ ।