ଅନୁଗୋଳ: ଆବଶ୍ୟକ ପରିମାଣର କୋଇଲା ଅଭାବରୁ ଏନଟିପିସି ପରିଚାଳନାଧୀନ ତାଳଚେର ଥର୍ମାଲ (ଟିଟିପିଏସ)ର ୩ ଗୋଟି ୟୁନିଟ ବନ୍ଦ ହୋଇଛି। ସେହିପରି ଏନଟିପିସି କଣିହାଁର ମଧ୍ୟ 2ଟି ୟୁନିଟ ବନ୍ଦ ଅଛି । ଏମସିଏଲ ତାଳଚେରସ୍ଥିତ ଜଗନ୍ନାଥ କୋଇଲା ଖଣିରୁ ଠିକରେ କୋଇଲା ଉତ୍ପାଦନ ହୋଇପାରୁ ନଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି।
ଟିଟିପିଏସରେ ୪୬୦ ମେଗାୱାଟ ବିଶିଷ୍ଟ ପ୍ରକଳ୍ପରେ ୬ ଗୋଟି ୟୁନିଟ୍ ରହିଥିବାବେଳେ ଏହା କାର୍ଯ୍ୟକାରୀ ହେବାକୁ ଦୈନିକ ୯ ହଜାର ମେଟ୍ରିକ ଟନ କୋଇଲା ଆବଶ୍ୟକ ହୋଇଥାଏ। କିନ୍ତୁ ଗତ ସୋମବାର ଠାରୁ ପର୍ଯ୍ୟାୟକ୍ରମେ ୧, ୩ ଓ ୫ ନମ୍ବର ୟୁନିଟକୁ ବନ୍ଦ କରିଦିଆଯାଇଛି।
ଏମସିଏଲ ଜଗନ୍ନାଥ କୋଇଲା ଖଣିରୁ ଦୈନିକ ୬ ହଜାର ମେଟ୍ରିକ ଟନ କୋଇଲା ଟିଟିପିଏସକୁ ଯାଇଥାଏ। ତେବେ ବର୍ତ୍ତମାନ ଜଗନ୍ନାଥ ଓସିପିରେ କୋଇଲା ଖନନ ନିମନ୍ତେ ଆବଶ୍ୟକୀୟ ସ୍ଥାନ ଉପଲବ୍ଧ ନଥିବାରୁ ଖଣିରୁ ଏବେ ଦୈନିକ ମାତ୍ର ୩ ହଜାରରୁ ସାଢ଼େ ୩ହଜାର ମେଟ୍ରିକ ଟନ କୋଇଲା ଉତ୍ପାଦନ ହେଉଛି।
ଫଳରେ ଓଡିଶା ସମେତ ବିଭିନ୍ନ ରାଜ୍ୟରେ ବିଦ୍ୟୁତ ଯୋଗାଣ ପ୍ରଭାବିତ ହେବା ସହ ବିଦ୍ୟୁତ ପ୍ରକଳ୍ପରୁ ବିଦ୍ୟୁତ ଉତ୍ପାଦନ ହ୍ରାସ ପାଇଛି । କୋଇଲା ସଙ୍କଟ ଯୋଗୁଁ ପରିସ୍ଥିତି ସଙ୍ଗୀନ ହୋଇ ପଡ଼ିଥିବାବେଳେ ବିଭାଗୀୟ କର୍ତ୍ତୃପକ୍ଷଙ୍କ ପାଇଁ ମୁଣ୍ଡବ୍ୟଥାର କାରଣ ସାଜିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
