ସିଲଭର ଜୁବଲି ପାଳିବ ଅନୁଗୋଳ କ୍ରିକେଟ ଆସୋସିଏସନ

ଚଳିତ ବର୍ଷ ଅନୁଗୋଳ ଜିଲ୍ଲା କ୍ରିକେଟ ୨୫ ବର୍ଷ ପୂର୍ତ୍ତି ଉପଲକ୍ଷେ ସିଲଭର ଜୁବଲି ପାଳନ କରିବାକୁ ଯାଉଛି । ଅଧିକ ପଢନ୍ତୁ

ଅନୁଗୋଳ: କ୍ରିକେଟର ଉନ୍ନତି ପାଇଁ ସଙ୍କଳ୍ପବୋଧ ଅନୁଗୋଳ କ୍ରିକେଟ ଆସୋସିଏସନ । ଚଳିତ ବର୍ଷ ଜିଲ୍ଲା କ୍ରିକେଟ ୨୫ ବର୍ଷ ପୁର୍ତ୍ତି ଉପଲକ୍ଷେ ସିଲଭର ଜୁବଲି ପାଳନ କରିବାକୁ ଯାଉଛି । ଦୀର୍ଘ ଦିନ ପରେ ଆଜି(ରବିବାର) ଜିଲ୍ଲା କ୍ରିକେଟ ଅସୋସିଏସନର ସାଧାରଣ ସଭା ଅନୁଷ୍ଠିତ ହୋଇଥିଲା । ସଭା ପୂର୍ବରୁ କର୍ମକର୍ତ୍ତାମାନେ ଏକ ସାମ୍ବାଦିକ ସମ୍ମିଳନୀର ଆୟୋଜନ କରିଥିଲେ ।

ଏହି ସମ୍ମିଳନୀରେ ଜିଲ୍ଲା କ୍ରିକେଟ ଅସୋସିଏସନର ସଭାପତି, ସମ୍ପାଦକଙ୍କ ସମେତ ସମସ୍ତ କର୍ମକର୍ତ୍ତା ଅଂଶଗ୍ରହଣ କରିଥିଲେ । ଚଳିତ ବର୍ଷ ଆସୋସିଏସନ ୨୫ ବର୍ଷ ପୂର୍ତ୍ତି ଉପଲକ୍ଷେ ସିଲଭର ଜୁବୁଲି ପାଳନ କରିବାକୁ ଯାଉଛି । ତେଣୁ ଏହି ସାଧାରଣ ସଭା କରାଯାଇ ଆଗାମୀ କାର୍ଯ୍ୟକ୍ରମ ସମ୍ପର୍କରେ ଆଲୋଚନା କରାଯିବ । ଏହାଛଡା ଅନୁଗୋଳ ଜିଲ୍ଲାରେ ବର୍ତ୍ତମାନ ବହୁ ଉଦୀୟମାନ ଖେଳାଳି ଅଛନ୍ତି ।

୧୬ ବର୍ଷରୁ କମ ଦଳରେ ଅନୁଗୋଳର ଜଣେ ଖେଳାଳି କ୍ୟାପଟେନ ଦାୟିତ୍ୱ ତୁଲାଉଛନ୍ତି । ସେହିପରି ୧୯ ବର୍ଷରୁ କମ ଦଳରେ ମଧ୍ୟ ଜିଲ୍ଲାର ବହୁ ଖେଳାଳି ସ୍ଥାନ ପାଇଛନ୍ତି । ତେଣୁ, ଜିଲ୍ଲା ଆସୋସିଏସନ ସମସ୍ତ ଖେଳାଳି ମାନଙ୍କୁ ପ୍ରୋତ୍ସାହନ ଯୋଗାଇ ଦେଉଛି । ଆଗାମୀ ଦିନ ମାନଙ୍କରେ ଭଲ ଖେଳାଳି ତିଆରି କରିବା ଏକମାତ୍ର ଲକ୍ଷ । କିନ୍ତୁ, ଏଥିପାଇଁ ଆବଶ୍ୟକ ଅର୍ଥର ଅଭାବ ରହିଛି । ଅନୁଗୋଳ ଭଳି ଖଣି ଖାଦାନ ଓ ଶିଳ୍ପରେ ଭରପୁର ଜିଲ୍ଲାରେ ପ୍ରଶାସନ ସହାୟତା କଲେ ଆହୁରି ଅଧିକ ଭଲ ଖେଳାଳି ବାହାରି ପାରିବେ ବୋଲି ସାମ୍ବାଦିକ ସମ୍ମିଳନୀରେ ଜିଲ୍ଲା ଅସୋସିଏସନର କର୍ମକର୍ତ୍ତା ସୂଚନା ଦେଇଥିଲେ ।

ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ