ଅନୁଗୋଳ: ଆମ ଦେଶ ସ୍ବାଧୀନତାର ୭୫ ବର୍ଷ ପୁର୍ତ୍ତି ପାଳନ କରୁଥିଲେ ମଧ୍ୟ ଏମିତି ଗାଁ ଅଛି ଯେଉଁଠାକୁ ବିଜୁଳି ଆଲୁଅ ସାତସପନ । ଖାଲି ସେତିକି ନୁହେଁ ନା ଅଛି ପାନୀୟ ଜଳ ନା ପିଲାଙ୍କ ପାଇଁ ସ୍କୁଲ । ଘଞ୍ଚ ଜଙ୍ଗଲ ଭିତରେ ଜଙ୍ଗଲୀ ପରି ବଞ୍ଚି ରହିଛନ୍ତି ଲୋକେ । ଏଭଳି ସ୍ଥିତି ଦେଖିବାକୁ ମିଳିଛି ଅନୁଗୋଳ ଜିଲ୍ଲାର ସାତକୋଶିଆ ଅଭୟାରଣ୍ୟ ଭିତରେ ଥିବା ସାଲର ଗାଁରେ । ଅଭୟାରଣ୍ୟ କଟକଣା ଭିତରେ ପେଷି ହୋଇ ଯାଇଛନ୍ତି ଗ୍ରାମବାସୀ ।
ସାତକୋଶିଆ ଅଭୟାରଣ୍ୟର ଘଞ୍ଚ ଓ ଦୁର୍ଗମ ଜଙ୍ଗଲ ଭିତରେ ଅବସ୍ଥିତ ସାଲର ଗାଁ । ଗାଁ ଟି ଜଙ୍ଗଲ ଭିତରେ ଥିଲେ ମଧ୍ୟ ଏହା ରାଜସ୍ୱ ଗ୍ରାମର ମାନ୍ୟତା ପାଇଛି । ଏଠାରେ ପ୍ରାୟ ୩୦ଟି ଆଦିବାସୀ ପରିବାର ବସବାସ କରି ଆସୁଛନ୍ତି । କିନ୍ତୁ, ସେମାନେ ସମସ୍ତ ମୌଳିକ ସୁବିଧା ପାଇବାରୁ ବଞ୍ଚିତ ହୋଇଛନ୍ତି । କେବଳ ଅଭୟାରଣ୍ୟ କଟକଣା ଯୋଗୁଁ ଗାଁରେ ସମସ୍ତ ଉନ୍ନୟନମୂଳକ କାର୍ଯ୍ୟ ବାଧାପ୍ରାପ୍ତ ହେଉଛି । ଦୀର୍ଘ ବର୍ଷର ଦାବି ଆପତି ପରେ ଟିକରପଡା ରାସ୍ତାରୁ ଗାଁକୁ ସଂଯୋଗ କରୁଥିବା ରାସ୍ତାଟିଏ ନିର୍ମାଣ ହୋଇପାରିଛି । ହେଲେ ଆଉ କୌଣସି ସୁବିଧା ନାହିଁ । ଲୋକେ ଏପର୍ଯ୍ୟନ୍ତ ବିଜୁଳି ଆଲୁଅ ଦେଖିନାହାନ୍ତି । ସରକାରଙ୍କ ତରଫରୁ ସୋଲାର ଲାଇଟ୍ ବ୍ୟବସ୍ଥା ହୋଇଛି । କିନ୍ତୁ, କେତେବେଳେ ବ୍ୟାଟେରୀ ଖରାପ ହେଉଛି ତ ଆଉ କେତେବେଳେ ମେଘୁଆ ପାଗ ହେଲେ ତାହା କାମ କରୁନାହିଁ । ଅଧିକାଂଶ ସମୟରେ ଅନ୍ଧାରରେ ରହୁଛନ୍ତି ଲୋକମାନେ । କିରୋସିନୀର ଅଭାବ ସାଙ୍ଗକୁ ଲିଟର ପ୍ରତି ୭୦/୮୦ ଟଙ୍କା ଦେଇ କିଣିବା ସେମାନଙ୍କ ପକ୍ଷେ ସମ୍ଭବ ହେଉନାହିଁ । ସନ୍ଧ୍ୟା ହେଲେ ବନ୍ୟ ଜନ୍ତୁଙ୍କ ବୋବାଳି, ହାତୀ ପଲ ଉପଦ୍ରବ ଓ ବର୍ଷା ଦିନେ ସରୀସୃପ ମାଳ ମାଳ ହୋଇ ବୁଲନ୍ତି । ଏଭଳି ବୟାବହ ପରିସ୍ଥିତି ମଧ୍ୟରେ ସ୍ଥିତିରେ ରହିଛନ୍ତି ଏଠାକାର ଲୋକେ ।