ଅନୁଗୋଳ:ଶିକ୍ଷକ ଅଭାବ ହେତୁ ସ୍କୁଲରେ ତାଲା ପକାଇଲେ ଛାତ୍ରଛାତ୍ରୀ ଓ ଅଭିଭାବକ । ଏଭଳି ଏକ ଅଭାବନୀୟ ଘଟଣା ଅନୁଗୋଳ ଜିଲ୍ଲାର ଛେଣ୍ଡିପଦା ବ୍ଲକ ଟାଙ୍ଗିରି ଉଚ୍ଚ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳୁଛି । ସକାଳୁ ସକାଳୁ ସ୍କୁଲରେ ତାଲା ପକାଇ ରଖିଥିବାରୁ ଶିକ୍ଷକ ଓ ଅନ୍ୟ କର୍ମଚାରୀ ବାହାରେ ଠିଆ ହୋଇ ରହିଥିଲେ । ଅନ୍ୟପଟେ ଶିକ୍ଷକ ନିଯୁକ୍ତି ଦାବୀରେ ଅନିର୍ଦିଷ୍ଟ କାଳ ପର୍ଯ୍ୟନ୍ତ ଏଭଳି ତାଲା ପକାଇ ରଖିବାକୁ ନିଷ୍ପତି ନେଇଛନ୍ତି ଅଭିଭାବକ ।
ବିଦ୍ୟାଳୟରେ ୮ଟି ଶ୍ରେଣୀରେ ପାଠ ପଢାଉଛନ୍ତି ୪ ଜଣ ଶିକ୍ଷକ । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୬୨ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ଆଖପାଖରେ ସ୍କୁଲନ ଥିବାରୁ ଗାଁର ଛାତ୍ରଛାତ୍ରୀ କେବଳ ଏହି ସ୍କୁଲ ଉପରେ ନିର୍ଭରଶୀଳ । କିନ୍ତୁ ପ୍ରାୟ ୪ରୁ ୫ ମାସ ହେଲା ସ୍କୁଲରେ ଆବଶ୍ୟକ ଶିକ୍ଷକ ନାହାନ୍ତି । ପୂର୍ବରୁ ୭ଜଣ ଶିକ୍ଷକ ଥିଲେ । କିନ୍ତୁ ଶିକ୍ଷା ବିଭାଗ ପକ୍ଷରୁ ୩ ଜଣଙ୍କୁ ଏଠାରୁ ଅନ୍ୟତ୍ର ବଦଳି କରା ଯାଇଛି । ଫଳରେ ଏବେ ମାତ୍ର ୪ ଜଣ ଶିକ୍ଷକ ଅଛନ୍ତି । ସେମାନଙ୍କ ମଧ୍ୟରୁ ଜଣେ ପ୍ରଧାନ ଶିକ୍ଷକ । ତେଣୁ ୧୬୨ପିଲାଙ୍କୁ ମାତ୍ର ୩ ଜଣ ଶିକ୍ଷକ ପାଠ ପଢ଼ାଇବା ଆଦୌ ସମ୍ଭବ ହେଉ ନାହିଁ । ଅନେକ ସମୟରେ ପିଲାମାନେ ସ୍କୁଲରେ ବସି ରହୁଛନ୍ତି ।