ଅନୁଗୋଳ: ହସ୍ପିଟାଲକୁ ଆସି ଠକାମିର ଶିକାର ହେଉଛନ୍ତି ସାଧାରଣ ଲୋକେ । ବିଭିନ୍ନ ଆଳରେ ରୋଗୀ ଓ ରୋଗୀ ସମ୍ପର୍କୀୟଙ୍କୁ ଲୁଟି ଚାଲିଛନ୍ତି ଦଲାଲ । ଆଉ ଅଭିଯୋଗ କଲେ ଶୁଣିବାକୁ ପ୍ରସ୍ତୁତ ନୁହନ୍ତି ଡାକ୍ତରଖାନା କର୍ତ୍ତୃପକ୍ଷ । ଜରପଡା ଥାନା କତଡା ଗାଁର ପ୍ରସନ୍ନ ଦେହୁରୀ ଓ ତାଙ୍କ ସ୍ତ୍ରୀ ଯଶୋଦା ଚିକିତ୍ସା ଲାଗି ଅନୁଗୋଳ ମୁଖ୍ୟ ଚିକିତ୍ସାଳୟକୁ ଆସିଥିଲେ । ଏଠାରେ ତାଙ୍କୁ ସାହାଯ୍ୟ କରିବା ବାହାନାରେ ଜଣେ ବ୍ୟକ୍ତି 7ଶହ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି ।
ସୂଚନାଯୋଗ୍ୟ, ବର୍ହିଃବିଭାଗରେ ସ୍ବାସ୍ଥ୍ୟ ପରୀକ୍ଷା ପରେ ଔଷଧ ନେବା ପାଇଁ ଚିକିତ୍ସାଳୟ ପରିସରରେ ଥିବା ଏକ ଗଛ ମୂଳରେ ଅପେକ୍ଷା କରିଥିଲେ ଦମ୍ପତ୍ତି । ସେହି ସମୟରେ ଡାକ୍ତରଖାନାର କର୍ମଚାରୀର ପରିଚୟ ଦେଇ ଜଣେ ବ୍ୟକ୍ତି ସାହାଯ୍ୟ କରିବାକୁ କହିଥିଲେ । ଆଉ ଏଥିପାଇଁ ଡାକ୍ତରଖାନାକୁ କିଛି ପଇସା ଦେବାକୁ ପଡିବ ବୋଲି କହି 7 ଶହ ଟଙ୍କା ଠକି ନେଇ କେଉଁଆଡେ ଫେରାର ହୋଇଯାଇଥିଲେ ।ତେବେ ଠକାମିର ଶିକାର ହୋଇଥିବା ଦମ୍ପତ୍ତି ହସ୍ପିଟାଲ ମ୍ୟାନେଜରଙ୍କୁ ଏ ସମ୍ପର୍କରେ କହିଥିଲେ । କିନ୍ତୁ ଏ ବିଷୟରେ କିଛି କହିପାରିବେ ନାହିଁ କହି ଫେରାଇ ଦେଇଥିଲେ କର୍ମଚାରୀ ।