ଅନୁଗୋଳ: ବିବାହ ଆମ ସାମାଜିକ ନୀତି ଓ ପରମ୍ପରା । ହେଲେ ଦିନକୁ ଦିନ ଏହା ବ୍ୟୟବହୁଳ ହୋଇପଡୁଛି । ଯୌତୁକ ରୂପୀ ରାକ୍ଷାସ କବଳରେ ହନ୍ତସନ୍ତ ହେଉଛନ୍ତି କନ୍ୟାପକ୍ଷ ଓ ନବବଧୂ । ଗରିବ ମା, ବାପାଟିଏ ନିଜ ପୁଅଝିଅଙ୍କ ବିବାହ ପାଇଁ ଋଣ କରଜରେ ବୁଡିମରନ୍ତି। ଟଙ୍କା ଅଭାବରୁ ବହୁଜଣ ବିବାହ କରିପାରୁନଥିବା ନଜିର ବି ରହିଛି। ଆଉ ଏମିତି ଏକ ସମୟରେ ବେଶ ଆଦୃତ ହେଉଛି ସାମୂହିକ ବିବାହ। ଅନୁଗୋଳର ବିଭିନ୍ନ ସମାଜିକ ସଙ୍ଗଠନ ୫୫ ଯୋଡା ଗରିବ ପୁଅଝିଅଙ୍କୁ ବିବାହ କରାଇ ଆଦର୍ଶ ଉଦାହରଣଟିଏ ସୃଷ୍ଟି କରିଛି।
ଉତ୍ସବ ମୁଖର ମାହୋଲ । ମନ୍ତ୍ରଧ୍ୱନିରେ ପ୍ରକମ୍ପିତ ହେଉଛି ସମଗ୍ର ପରିବେଶ । ବାହା ବେଦିରେ ବାପ ମାଆ ଛେଉଣ୍ଡ ପୁଅକୁ ମିଳିଛି ଆଉ ଦୁଇ ବାପା ମାଆ। ଗରିବ ଝିଅଟି ବି ନିଜକୁ ଅଭାଗା ଅନୁଭବ କରୁନି । ପାରମ୍ପରିକ ରୀତିନୀତିରେ ଚାଲିଛି ବିବାହ କାର୍ଯ୍ୟ । ଗୋଟିଏ କି ଦୁଇ ଯୋଡି ନୁହେଁ, 55 ଯୋଡି ବରକନ୍ୟା ଅଗ୍ନିକୁ ସାକ୍ଷୀରଖି ଏକାସାଙ୍ଗରେ ବାହା ହେବା ସହ ନୂଆ ସଂସାରଟିଏ ଗଢିଛନ୍ତି। ଅନୁଗୋଳ ସରସ୍ଵତୀ ଶିଶୁମନ୍ଦିର ପରିସରରେ ଦେଖିବାକୁ ମିଳିଥିଲା ଏହି ସାମୂହିକ ବିବାହ ।