ପ୍ରେମ ବ୍ୟାପାରକୁ ନେଇ ଛୁରା ମାଡ଼,ଯୁବକ ଗୁରୁତର

ଛୁରା ମାଡରେ ଜଣେ ଯୁବକ ଗୁରୁତର। ଯୁବକ ଜଣକ ହେଲେ ବଇଣ୍ଡା ସାନହୁଲା ତରାଜ ସାହିର ଅଜିତ ଗୋଛାୟତ। ତେବେ ପ୍ରେମ ବ୍ୟାପାରକୁ ନେଇ ଏହି ଛୁରା ମାଡ ହୋଇଥିବା କୁହାଯାଉଛି। ଅଧିକ ଖବର ପଢନ୍ତୁ...

ଅନୁଗୋଳ: ପ୍ରେମ ବ୍ୟାପାରକୁ ନେଇ ଛୁରା ମାଡ। ଛୁରା ମାଡରେ ଜଣେ ଯୁବକ ଗୁରୁତର । ଗୁରୁତରଙ୍କୁ ପ୍ରଥମେ ଅନୁଗୋଳ ଓ ପରେ କଟକ ସ୍ଥାନାନ୍ତରଣ କରାଯାଇଛି। ଜିଲ୍ଲାର ହଣ୍ଡପା ଥାନା ବଇଣ୍ଡା ଅଞ୍ଚଳରେ ଘଟିଛି ଏପରି ଘଟଣା। ଆହତ ଯୁବକ ହେଲେ ବଇଣ୍ଡା ସାନହୁଲା ତରାଜ ସାହିର ଅଜିତ ଗୋଛାୟତ।

ସୂଚନା ଅନୁସାରେ, ଅଜିତକୁ କୌଶଳ କରି ଡାକି ନେଇ ଝିଅ ଲୋକେ ଛୁରା ମାଡ କରିଥିବା ଅଜିତର ଭାଇ ଅଭିଯୋଗ କରିଛନ୍ତି। ତାଙ୍କ ଅଭିଯୋଗ ମୁତାବକ ଅଜିତ ବିବାହିତ ଓ ତାଙ୍କର ଦୁଇଟି ପିଲା ଅଛନ୍ତି। ହେଲେ ସମ୍ପୃକ୍ତ ଯୁବତୀ ଜଣକ କାଳେ ଅଜିତକୁ ଭଲ ପାଉଥିଲେ। ଏଥିରେ ଅଜିତ ରାଜି ନହେବାରୁ ଏଭଳି ଘଟଣା ଘଟିଛି ବୋଲି ଅଭିଯୋଗ କରିଛନ୍ତି ।

ଖବର ପାଇ ହଣ୍ଡାପା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ହେଲେ ପ୍ରକୃତ ଘଟଣା କଣ ଏନେଇ ପୋଲିସ କିମ୍ବା ଝିଅ ଘର ପକ୍ଷର କୌଣସି ପ୍ରତିକ୍ରିୟା ମିଳିନାହିଁ । ତେବେ ପୁଅ ଝିଅକୁ କି ଝିଅ ପୁଅକୁ ଭଲ ପାଉଥିଲେ ନା ପରିବାର ଲୋକେ ଏମାନଙ୍କ ପ୍ରେମକୁ ବିରୋଧ କରୁଥିଲେ ତାହା ମଧ୍ୟ ଜଣାପଡ଼ିନାହିଁ।

ଅନୁଗୋଳରୁ ସଂଗ୍ରାମ ରଞ୍ଜନ ନାଥ,ଇଟିଭି ଭାରତ