ଅନୁଗୋଳ: ଖଣି ଖାଦାନ ଓ ପ୍ରାକୃତିକ ସମ୍ପଦରେ ପରିପୂର୍ଣ୍ଣ ଓଡିଶାର ଅନୁଗୋଳ ଜିଲ୍ଲା । ଛୋଟ ବଡ ଶିଳ୍ପ, କଳକାରଖାନା ଏବଂ କୋଇଲା ଖଣି ପାଇଁ ଏଠାରେ ପ୍ରତି ବର୍ଷ ହଜାର ହଜାର ସଂଖ୍ୟାରେ ଗଛ କଟା ଯାଉଛି । ଯାହାର ସିଧାସଳଖ ପ୍ରଭାବ ପରିବେଶ ଉପରେ ପଡ଼ୁଛି । ପ୍ରତିବର୍ଷ ଏ ଅଞ୍ଚଳରେ ବୃଦ୍ଧି ହେଉଥିବା ତାପମାତ୍ରା ତଥା ପାନୀୟ ଜଳାଭାବ ଏହାର ଜ୍ବଳନ୍ତ ଉଦାହରଣ । ତେଣୁ ଜିଲ୍ଲାରେ ଏହି ସମସ୍ୟାକୁ ଏଡାଇବା ପାଇଁ ନୂତନ ପ୍ରୟାସ ଆପଣେଇଛି ଓଡ଼ିଶା ବନ ଉନ୍ନୟନ ନିଗମ । ଗତ 3 ବର୍ଷରେ ପ୍ରାୟ ୫୦୦ ଏକର ଜଙ୍ଗଲ ସୃଷ୍ଟି କରିବାରେ ସଫଳ ହୋଇଛି ବନ ବିଭାଗ ।
ସବୁଜ ହେଉଛି ଶିଳ୍ପାଞ୍ଚଳ, 500 ଏକର ଜଙ୍ଗଲ ସୃଷ୍ଟି କଲା ବନବିଭାଗ ସୂଚନା ଅନୁଯାୟୀ, 2017-18 ଆର୍ଥିକ ବର୍ଷରେ ଲାଗିଛି 57 ହଜାର 570ଟି ଗଛ । 2018-19 ଆର୍ଥିକ ବର୍ଷରେ ଲାଗିଛି 19 ହଜାର 80ଟି ଗଛ । ସେହିପରି 19-20 ଆର୍ଥିକ ବର୍ଷରେ ଲାଗିଛି 1 ଲକ୍ଷ 27 ହଜାର 330ଟି ଗଛ ।
ରାଷ୍ଟ୍ରାୟତ୍ତ ସଂସ୍ଥା ନାଲକୋ, ଏମସିଏଲ, ଏନଟିପିସି ଏବଂ ଟିଟିପିଏସ ପରି ବିଗତ ଦଶନ୍ଧି ମଧ୍ୟରେ ଜିଲ୍ଲାରେ ଗଢି ଉଠିଛି ବହୁ ଛୋଟବଡ଼ ଶିଳ୍ପସଂସ୍ଥା । ଜଙ୍ଗଲ ସୃଷ୍ଟି କରିବାରେ ଏହି ସଂସ୍ଥା ମାନଙ୍କଠାରୁ ମିଳିଛି ଆର୍ଥିକ ସହାୟତା । ଗତ ୩ ବର୍ଷରେ ପ୍ରାୟ ୬ କୋଟି ଟଙ୍କା ବ୍ୟୟ କରି ଏହି ଜଙ୍ଗଲ ସୃଷ୍ଟି କରିଛି ବନ ଉନ୍ନୟନ ନିଗମ । ଆଉ ଏହି ଜଙ୍ଗଲର ରକ୍ଷଣାବେକ୍ଷଣ ଦାୟିତ୍ବ ନିକଟସ୍ଥ ଗ୍ରାମବାସୀଙ୍କୁ ହସ୍ତାନ୍ତର କରିଛି । ଫଳରେ ପାଖାପାଖି ୩୦ଟି ଗାଁର ଲୋକେ ରୋଜଗାରକ୍ଷମ ହୋଇପାରିଛନ୍ତି । ଆଉ ଏହି ଜଙ୍ଗଲରୁ ମିଳିବାକୁ ଥିବା ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଲାଭବାନ ହୋଇ ପାରିବେ ଗ୍ରାମବାସୀ ।
ତେବେ ଚାରାରୋପଣ ଓ ନୂତନ ଜଙ୍ଗଲ ସୃଷ୍ଟି କରିବା କେବଳ ସଭା ସମିତି ଓ ସ୍ଲୋଗାନ ସୀମିତ ରଖି ନାହିଁ ଜିଲ୍ଲା ବନ ଉନ୍ନୟନ ନିଗମ । ଏହି ପ୍ରୟାସକୁ ଏକ ସବୁଜ ବିପ୍ଳବର ରୂପ ଦେଇଛି ବିଭାଗ । ସେପଟେ ଭରପୁର ସହଯୋଗ କରିବା ସହିତ ଉଦାହରଣ ସୃଷ୍ଟ କରିଛନ୍ତି ଗ୍ରାମବାସୀ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥଙ୍କ ରିପୋର୍ଟ, ଇଟିଭି ଭାରତ
