ନିଦ ହଜାଇ ଦେଇଛି ହାତୀ ଉପଦ୍ରବ, ବନ୍ତଳାକୁ କର ଗଜମୁକ୍ତ କରିବାକୁ ରାଜରାସ୍ତାରେ ଲୋକେ

ଅନୁଗୋଳ ଜିଲ୍ଲା ବନ୍ତଳା ରେଞ୍ଜରେ ହାତୀ ଆତଙ୍କ । ହାତୀକୁ ଘଉଡାଇବା ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ 3 ଦିନ ଧାରଣାରେ ବସିଲେ ବନ୍ତଳା ରେଞ୍ଜ ବାସିନ୍ଦା । ବନ୍ତଳାକୁ ହାତୀମୁକ୍ତ କରିବାକୁ ଦାବି । ଦେଖନ୍ତୁ ଏହି ରିପୋର୍ଟ୍

ଅନୁଗୋଳ:ହାତୀ ପାଇଁ ତାତିଲେ ଲୋକେ । ଅନୁଗୋଳ ବନ ଖଣ୍ଡ ବନ୍ତଳା ରେଞ୍ଜ ଓ ଏହାର ଆଖପାଖ ପ୍ରାୟ ୧୨୮ଟି ଗାଁର ଲୋକେ ଆଜି(ମଙ୍ଗଳବାର)ଠାରୁ ଆସନ୍ତା ୩ଦିନ ପାଇଁ ଜିଲାପାଳଙ୍କ କାର୍ଯ୍ୟାଳୟ ଆଗରେ ଧାରଣାରେ ବସିଛନ୍ତି। ୩ଦିନ ମଧ୍ୟରେ ହାତୀ ଘଉଡାଇବା ବ୍ୟବସ୍ଥା ନକଲେ ଆଗାମୀ ଦିନରେ ଆହୁରି ବଡ଼ ଧରଣର ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି । ଗତକାଲି ବନ ବିଭାଗ, ପ୍ରଶାସନ ଓ ଅଞ୍ଚଳବାସୀଙ୍କ ମଧ୍ୟରେ ତ୍ରିପାକ୍ଷିକ ଆଲୋଚନା ହୋଇଥିଲେ ମଧ୍ୟ ତାହା ବିଫଳ ହେବାରୁ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇଥିବା କହିଛନ୍ତି ଅନ୍ଦୋଳନକାରୀ ।

ଏହାମଧ୍ୟ ପଢନ୍ତୁ..କରଞ୍ଜିଆରେ ହାତୀ ଉପଦ୍ରବ, ଘର ଭାଙ୍ଗିବା ସହିତ କାନ୍ଥ ପଡି ଜଣେ ବୃଦ୍ଧା ଗୁରୁତର

ଅନୁଗୋଳ ବନଖଣ୍ଡର ବନ୍ତଳା ବନାଞ୍ଚଳରେ ଅସହ୍ୟ ହେଲାଣି ହାତୀ ଉପଦ୍ରଵ । ଏକ ବର୍ଷ ମଧ୍ୟରେ ଏହି ବନ୍ୟାଞ୍ଚଳରେ ହାତୀ ଆକ୍ରମଣରେ 30ରୁ ଉର୍ଦ୍ଧ୍ବ ଜୀବନ ଗଲାଣି । ଗାଁଠୁ ନେଇ ବିଲବାଡି ସବୁଠି ହାତୀ ପଲ । ପ୍ରାୟ ୫ ବର୍ଷ ହେଲା ଏହି ସମସ୍ୟାରେ ଯୁଝି ହେଉଛନ୍ତି ଲୋକେ । କେତେବେଳେ ଘର ଭାଙ୍ଗୁଛନ୍ତି ତ କେବେବେଳେ ଫସଲ ଉଜାଡି ଦେଉଛନ୍ତି ହାତୀପଲ । ଲୋକମାନେ ଏକପ୍ରକାର ଗୃହବନ୍ଦୀ କହିଲେ ଚଳେ । ଗାଁରୁ ହାତୀ ଘଉଡାଇବା ପାଇଁ ବନ ବିଭାଗ ଯେଉଁ ପଦକ୍ଷେପ ନେଉଛି ତାହା ଯଥେଷ୍ଟ ହେଉନଥିବା କହିଛନ୍ତି ଲୋକେ । ଏବେ ହାତୀମୁକ୍ତ ବନ୍ତଳା ଦାବି କରିଛନ୍ତି ଲୋକେ । ତେଣୁ ବନ୍ତଳା ଅଞ୍ଚଳରେ ଲୋକେ ନିଜର ସୁରକ୍ଷା ପାଇଁ ସାମାଜିକ ସୁରକ୍ଷା ମଞ୍ଚ ଗଠନ କରି ପ୍ରଶାସନ ଓ ବନ ବିଭାଗକୁ ହାତୀ ଉପଦ୍ରଵ ରୋକିବା ପାଇଁ ଚାପ ପକାଉଛନ୍ତି । ଅନୁଗୋଳ ବନଖଣ୍ଡ ବନ୍ତଳା ରେଞ୍ଜ ଓ ଏହାର ଆଖପାଖ ପ୍ରାୟ ୧୨୮ଟି ଗାଁର ଲୋକେ ଆଜିଠାରୁ ୩ଦିନ ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣାରେ ବସିଛନ୍ତି । ୩ଦିନ ମଧ୍ୟରେ ହାତୀ ଘଉଡ଼ାଇବା ବ୍ୟବସ୍ଥା ନକଲେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।
ଏହାମଧ୍ୟ ପଢନ୍ତୁ..ଅନୁଗୋଳରେ ହାତୀ ଆତଙ୍କ, କାମ କରିବାକୁ ଯାଉଥିବା ବେଳେ କଚାଡି ମାରିଲା ଦନ୍ତା

ଅନ୍ୟପଟେ ବନବିଭାଗର ସୂଚନା ଅନୁଯାୟୀ, ବନ୍ତଳା ଅଞ୍ଚଳରେ ହାତୀ ଉପଦ୍ରଵ ନିୟନ୍ତ୍ରଣ କରିବାକୁ ସରକାର ପ୍ରାୟ ସାଢ଼େ ୪କୋଟି ଟଙ୍କା ଅନୁଦାନ ଦେଇଛନ୍ତି । ସେହି ଅର୍ଥରେ ବନ୍ତଳା ଅଞ୍ଚଳରେ ହାତୀ ଉପଦ୍ରଵ କରୁଥିବା ୪୩ଟି ଗାଁ ଚିହ୍ନଟ କରାଯାଇଛି । ସେହି ୪୩ଟି ଗାଁର ବିଭିନ୍ନ ସ୍ଥାନରେ ୪୩ଟି ଉଚ୍ଚ ଶକ୍ତି ସମ୍ପନ୍ନ ହାଇମାସ୍କ ଲାଇଟ ଲଗାଯିବ। ପ୍ରାୟ ୨୨କିମି ଟ୍ରେଞ୍ଚ୍‌ ଖନନ କରାଯିବ । ସେଥିମଧ୍ୟରୁ ବର୍ତ୍ତମାନ ସୁଧା ୫କିମିରୁ ଅଧିକ ଖନନ କାର୍ଯ୍ୟ ଶେଷ ହୋଇଛି । ୪୩କିମି ସୋଲାର ଫେନସିଂ ନିର୍ମାଣ କରାଯିବ । ବର୍ତ୍ତମାନ ୧୦କିମି ନିର୍ମାଣ ସରିଛି । ହାତୀ ଆସିବା ଆଗରୁ ଲୋକେ କିଭଳି ଜାଣି ପାରିବେ ସେଥିପାଇଁ ସାଇରନ୍‌ ସିଷ୍ଟମ ଲଗା ଯାଉଛି । ବର୍ତ୍ତମାନ ସୁଦ୍ଧା ୨୫ଟି ସିଷ୍ଟମ କାମ ସରିଛି । ଆଗକୁ ପ୍ରାୟ ୬୮ଟି ସ୍ଥାନରେ ଏଭଳି ସିଷ୍ଟମ ଲଗାଯିବାର ଯୋଜନା ରହିଛି । ଅକ୍ଟୋବର ମାସ ଶେଷ ସୁଦ୍ଧା ସମସ୍ତ କାର୍ଯ୍ୟ ଶେଷ କରିବାକୁ ଯୋଜନା କରାଯାଉଛି ।

ଏହାଛଡା ଜଙ୍ଗଲ ଭିତରେ ବ୍ୟାପକ ଆମ୍ବ, ପଣସ ଓ ହାତୀ ଖାଦ୍ୟ ଭଳି ଗଛ ଲଗାଯିବ। ଗାଁ ଗାଁରେ ବୁଲୁଥିବା ହାତୀ ପଲକୁ ସାତକୋଶିଆ ଭିତରକୁ ଘଉଡାଇବାକୁ ବ୍ୟାପକ ପଦକ୍ଷେପ ଗ୍ରହଣ କରାଯିବ ବୋଲି ବନ ବିଭାଗ କହିଛି । ଏ ସମସ୍ତ ପଦକ୍ଷେପ ସମ୍ପର୍କରେ ସୂଚନା ଦେବାପାଇଁ ପ୍ରଶାସନର ସହଯୋଗରେ ବନ ବିଭାଗ ଓ ଅଞ୍ଚଳବାସୀଙ୍କ ମଧ୍ୟରେ ବୈଠକ ହୋଇଥିଲା । କିନ୍ତୁ ଲୋକେ କୌଣସି କଥା ନଶୁଣି କେବଳ ଗଜଶୂନ୍ୟ ବନ୍ତଳା ଅଞ୍ଚଳ ଦାବି କରିଥିଲେ ।

ତେବେ ବନ୍ତଳା ଅଞ୍ଚଳରେ ହାତୀ ଉପଦ୍ରଵ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ପ୍ରାୟ ୫ ବର୍ଷ ହେଲା ଏହି ସମସ୍ୟାରେ ଯୁଝି ହେଉଛନ୍ତି ଲୋକେ । ଲୋକଙ୍କୁ ହାତୀ ଆକ୍ରମଣ କରିବା ଏକ ନିତିଦିନିଆ ଘଟଣା ହୋଇ ଯାଇଛି । ଯାହାକୁ ନେଇ ଲୋକଙ୍କ ଅସନ୍ତୋଷ ଦେଖିବାକୁ ମିଳିଛି ।

ଇଟିଭି ଭାରତ, ଅନୁଗୋଳ