ଅନୁଗୋଳ: ଦୁର୍ଦ୍ଦିନରେ ଅନୁଗୋଳ ଜିଲ୍ଲାର କପା ଚାଷୀ । କପା ଉତ୍ପାଦନରେ ନା ଲାଭ ଦେଉଛି ନା କ୍ଷତି । ସେପଟେ ବିକ୍ରି ପାଇଁ ମଧ୍ୟ ସୁବିଧା ନାହିଁ । ଫଳରେ ଚାଷୀମାନେ ନିଜସ୍ୱ ଖର୍ଚ୍ଚରେ ବଲାଙ୍ଗୀର ନେଇ ବିକ୍ରି କରିବାକୁ ବାଧ୍ୟ ହେଉଛନ୍ତି । ଜିଲ୍ଲାର ଆଠମଲ୍ଲିକ ଏବଂ ଅନୁଗୋଳ ବ୍ଲକର ପ୍ରାୟ ୫ଶହ ଏକରରୁ ଅଧିକ ଜମିରେ କପା ଚାଷ ହେଉଛି । କପା ଚାଷ ପାଇଁ କୌଣସି ସରକାରୀ ପ୍ରୋତ୍ସାହନ ନାହିଁ । ତେଣୁ ଚାଷୀମାନେ ଯେତିକି ଲାଭ ପାଇବା କଥା ସେତିକି ପାଇ ପାରୁ ନାହାନ୍ତି । କେବଳ ପେଟପାଟଣା ପାଇଁ ବାଧ୍ୟ ହୋଇ କପା ଚାଷ କରୁଛନ୍ତି ।
ଅନୁଗୋଳ ଜିଲ୍ଲାର ଆଠମଲ୍ଲିକ ଓ ଅନୁଗୋଳ ବ୍ଲକର ଅଧିକାଂଶ ଜଙ୍ଗଲ ଅଧ୍ୟୁଷିତ ଅଞ୍ଚଳରେ ବନ୍ୟଜନ୍ତୁ ପ୍ରାଦୁର୍ଭାବ ଯୋଗୁ କୌଣସି ଫସଲ ହୋଇ ପାରୁନାହିଁ । କିଛି ବର୍ଷ ହେବ ଶହ ଶହ ଏକର ଜମି ପଡିଆ ପଡୁଛି । ଏହାକୁ ଦେଖି ଅନେକ ଚାଷୀ ଏବେ କପା ଚାଷକୁ ଆପଣେଇଛନ୍ତି । କାରଣ କପା ଚାଷରୁ ଭଲ ଲାଭ ହୁଏ । ଅତି କମ ଜଳସେଚନର ଆବଶ୍ୟକତା ପଡେ । ଏହାସହ ଏହାକୁ କୌଣସି ବନ୍ୟଜନ୍ତୁ ଖାଆନ୍ତି ନାହିଁ । ଗତ ୩ ରୁ ୪ବର୍ଷ ହେବ ଜିଲ୍ଲାର ପ୍ରାୟ ୫ ଶହ ଏକରରୁ ଅଧିକ ଜମିରେ କପା ଚାଷ ହେଉଛି ।
ଚାଷୀଙ୍କ କହିବା ଅନୁସାରେ ଗୋଟିଏ ଏକର ଜମିରେ ୫ ରୁ ୭ କୁଇଣ୍ଟାଲ କପା ଉତ୍ପାଦନ ହୁଏ । କୁଇଣ୍ଟାଲ ପ୍ରତି ସାଢ଼େ ସାତ ହଜାର ଟଙ୍କାରେ ବିକ୍ରି ହୁଏ । ଏକର ପ୍ରତି ବିହନ, ଔଷଧ, ଜଳସେଚନ ଏବଂ କପା ତୋଳିବା ମଜୁରୀ ମିଶିଲେ ୨୫ହଜାର ଟଙ୍କା ଖର୍ଚ୍ଚ ହୋଇଥାଏ । ତେଣୁ ଦେଖିବାକୁ ଗଲେ ଚାଷୀଙ୍କର ଭଲ ଦୁଇ ପଇସା ଲାଭ ହୁଏ । ହେଲେ ଏବେ ଜିଲ୍ଲାରେ କପା ଚାଷୀଙ୍କ ଦୁର୍ଦ୍ଦଶା ବଢି ଚାଲିଛି । କାରଣ ଏଠାରେ ଉତ୍ପାଦିତ ହେଉଥିବା କପା ବିକ୍ରି ପାଇଁ ସୁବିଧା ନାହିଁ । କିଛି ଚାଷୀ ବାଧ୍ୟ ହୋଇ ସୁଦୂର ବଲାଙ୍ଗୀର ନେଇ ବିକ୍ରି କରୁଛନ୍ତି । ଫଳରେ ପରିବହନ ଖର୍ଚ୍ଚ ଅଧିକ ହେଉଛି । ଆଉ କିଛି ଚାଷୀଙ୍କ ଠାରୁ ଆନ୍ଧ୍ରପ୍ରଦେଶର କିଛି ବ୍ୟବସାୟୀ ଆସି କମ ଦରରେ କିଣି ନେଉଛନ୍ତି । ତେଣୁ ଚାଷୀଙ୍କର ଯେତିକି ଲାଭ ହେବା କଥା ସେତିକି ହୋଇ ପାରୁ ନାହିଁ । ଏହାଛଡା ଏଠାକାର ଚାଷୀ କେବଳ ବର୍ଷା ଉପରେ ନିର୍ଭର କରନ୍ତି । କିଛି ବର୍ଷ ହେଲା ଜଳବାୟୁରେ ପରିବର୍ତ୍ତନ ଯୋଗୁ ଠିକ ସମୟରେ ଆବଶ୍ୟକ ବର୍ଷା ହେଉ ନାହିଁ । ଏଠାରେ ଜଳସେଚନର ସୁବିଧା ମଧ୍ୟ ନାହିଁ । ତେଣୁ ଚଳିତ ବର୍ଷ ପାଣି ଅଭାବରୁ ଭଲ ଗଛ ହୋଇ ନାହିଁ । ଗଛ ଭଲ ନହେବାରୁ ଫଳ ମଧ୍ୟ ଭଲ ପରିମାଣର ହୋଇ ନାହିଁ ।