ପୁଣି ଚର୍ଚ୍ଚାରେ ସ୍ବାସ୍ଥ୍ୟସେବା: ଶିଶୁ ଦେହରୁ ମିଳିଲା ଅଧାଭଙ୍ଗା ଛୁଞ୍ଚି

ପୁଣି ସାମ୍ନାକୁ ଆସିଛି ଅବହେଳିତ ସ୍ବାସ୍ଥ୍ୟସେବାର ନଗ୍ନ ରୂପ । ଆଉ ଏଥର ଏହି ଅବହେଳାର ଶିକାର ହୋଇଛି ଆଠମଲ୍ଲିକ ମାଧପୁରର ସୀତାକାନ୍ତ ପଣ୍ଡାଙ୍କ ତିନି ବର୍ଷର ପୁଅ ସ୍ବୟଂଜିତ ପଣ୍ଡା । ଥଣ୍ଡା କାଶ ପାଇଁ ଇଞ୍ଜେକ୍ସନ ଦେବାକୁ ଯାଇ ହୀନସ୍ତା ହୋଇଛି ଶିଶୁ ।

ଅନୁଗୋଳ: ପୁଣି ସାମ୍ନାକୁ ଆସିଛି ଅବହେଳିତ ସ୍ବାସ୍ଥ୍ୟସେବାର ନଗ୍ନ ରୂପ । ଆଉ ଏଥର ଏହି ଅବହେଳାର ଶିକାର ହୋଇଛି ଆଠମଲ୍ଲିକ ମାଧପୁରର ସୀତାକାନ୍ତ ପଣ୍ଡାଙ୍କ ତିନି ବର୍ଷର ପୁଅ ସ୍ବୟଂଜିତ ପଣ୍ଡା । ଥଣ୍ଡା କାଶ ପାଇଁ ଇଞ୍ଜେକ୍ସନ ଦେବାକୁ ଯାଇ ହୀନସ୍ତା ହୋଇଛି ଶିଶୁ । ଫଳରେ ଇଞ୍ଜେକ୍ସନର ଛୁଞ୍ଚି ଅଧା ଭାଙ୍ଗି ଶରୀର ଭିତରେ ରହିଯାଇଥିବାରୁ ଅସହ୍ୟ ଯନ୍ତ୍ରଣାରେ ଛଟପଟ ହେଉଛି ଶିଶୁ ।

ସୂଚନା ଅନୁଯାୟୀ ଏକ ମାସ ତଳେ ଆଠମଲ୍ଲିକ ମୋହନ ଖଳିରେ ଶ୍ରମିକ ଭାବେ କାର୍ଯ୍ୟରତ ଥିବା ସୀତାକାନ୍ତଙ୍କ ପୁଅ ସ୍ବୟଂଜିତକୁ ଥଣ୍ଡା କାଶ ପାଇଁ ମାଧପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ସେଠାରେ ଥିବା ଷ୍ଟାଫ ନର୍ସ ସ୍ବୟଂଜିତଙ୍କ ଅଣ୍ଟାରେ ଇଞ୍ଜେକ୍ସନ ଦେଇଥିଲେ । ହେଲେ ଇଞ୍ଜେକ୍ସନର ଛୁଞ୍ଚି ଭାଙ୍ଗିଯାଇ ସ୍ବୟଂଜିତଙ୍କ ଦେହରେ ଅଧା ରହିଯାଇଥିଲା । ଯାହା ସମ୍ପର୍କରେ କାହାକୁ କିଛି ନଜଣାଇ ଚୁପ ରହିଯାଇଥିଲେ ନର୍ସ ଜଣଙ୍କ ।

ଗତ ଏକମାସ ହେବ ଛୁଞ୍ଚି ରହିଯାଉଥିବାରୁ ଯନ୍ତ୍ରଣା ପାଉଥିଲା ଶିଶୁ ଏବଂ ହଠାତ୍‌ ଏକମାସ ପରେ ଶିଶୁଟିର ସମ୍ବେଦନଶୀଳ ଜାଗାରେ ଛୁଞ୍ଚିଟି ଅଧା ବାହାରିବାରୁ ଆଶ୍ଚର୍ଯ୍ୟ ହୋଇଯାଇଥିଲେ ପରିବାର ଲୋକେ । ପରେ ପରିବାର ଲୋକେ ଶିଶୁକୁ ଗୁରୁବାର ସକାଳେ ମାଧପୁର ମେଡିକାଲକୁ ଆଣିଥିଲେ । ସେଠାରେ ଡାକ୍ତରଙ୍କ ପରାମର୍ଶ ପରେ ଆଠମଲ୍ଲିକ ଚିକିତ୍ସାଳୟକୁ ସ୍ବୟଂଜିତକୁ ସ୍ଥାନାନ୍ତର କରାଯାଇଥିଲା । ଆଠମଲ୍ଲିକ ଚିକିତ୍ସାଳୟରେ ଚିକିତ୍ସା ହେବା ପରେ ଶିଶୁର ଶରୀରରୁ ଛୁଞ୍ଚିକୁ ବାହାର କରି ଦିଆଯାଇଛି ।

ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ