ଅନୁଗୋଳ: ଅନୁଗୋଳବାସୀଙ୍କ ଦୁଃଖ ବଢାଇଲା ବନ୍ୟା । କମି ଯାଇଛି ବନ୍ୟା ଅଞ୍ଚଳର ପାଣି ହେଲେ ବଢୁଛି ବିପନ୍ନଙ୍କ ଦୁର୍ଦ୍ଦଶା । ମହାନଦୀର ବନ୍ୟା ଭାଙ୍ଗି ଦେଇଛି ଲୋକଙ୍କ ମେରୁଦଣ୍ଡ । ବନ୍ୟା ସିନା ଛାଡି ଯାଇଛି କିନ୍ତୁ ସୁଧୁରିନି ଲୋକଙ୍କ ସ୍ଥିତି । ଏବେ ଭଙ୍ଗା ଘର ସଜାଡ଼ିବାକୁ କରୁଛନ୍ତି ଉଦ୍ୟମ ।
ସୂଚନା ଅନୁଯାୟୀ,ଅନୁଗୋଳ ଜିଲ୍ଲାର ଟିକରପଡା ପଞ୍ଚାୟତରେ ହୋଇଥିବା ମହାନଦୀର ବନ୍ୟା ଯୋଗୁଁ ଲୋକଙ୍କର ଅନେକ କ୍ଷତି ହୋଇଛି। ଆସିଥିବା ବନ୍ୟାରେ ଘାଟ ସାହି ସମୂର୍ଣ୍ଣ ବୁଡି ଯାଇଥିବାରୁ ସେଠାରେ ରହୁଥିବା ମତ୍ସ୍ୟଜୀବୀ ପରିବାରଙ୍କ ଘର ଦ୍ବାର ସବୁ ଭାଙ୍ଗି ଯାଇଛି । ବନ୍ୟା ସମୟରେ ଲୋକେ ସରକାରଙ୍କ ପକ୍ଷରୁ ସ୍ଥାନୀୟ ହାଇସ୍କୁଲ ଓ ପଞ୍ଚାୟତ ଅଫିସରେ ଆଶ୍ରୟ ନେଇଥିଲେ । ମାତ୍ର ବନ୍ୟା ଛାଡିବା ପରେ ସେଠାରୁ ସେ ମାନକୁ ଚାଲିଯିବାକୁ କୁହାଯାଇଥିବା ବେଳେ ଏଯାଏଁ ସେମାନଙ୍କ ଘର ସଜାଡି ହୋଇ ନଥିବା ଜଣାପଡିଛି ।
କାହାର ଘର ମାଟିରେ ମିଶିଛି ତ କାହାର ଭାସି ଯାଇଛି । ବାକି ଯାହାର ଯାହା ଅଛି ତାକୁ ଏଣେ ସଜାଡ଼ିବାରେ ଲାଗି ପଡିଛନ୍ତି । କିଏ ଘର ଉପରେ ମିଳିଥିବା ପଲିଥିନ ତଳେ ରାତି କାଟୁଛନ୍ତି ତ କିଏ ପୁଣି ଖୋଲା ଆକାଶ ତଳେ । ଲୋକଙ୍କ ଅଭିଯୋଗ ସେମାନଙ୍କ କଥା ବୁଝିବାକୁ କେହି ନାହିଁ । କେମିତି ଘର ଖଣ୍ଡେ ମିଳିଲେ ସେମାନେ ଚଳି ଯାଆନ୍ତେ ସେଇ ଚିନ୍ତାରେ । ସେପଟେ ପ୍ରଶାସନ ରିଲିଫ କୋଡ଼ ଅନୁସାରେ ଯାହାସବୁ ଯୋଗାଇବା କଥା ତାହା ଯୋଗାଇଛି । 80ରୁ ଅଧିକ ପରିବାରକୁ ସମସ୍ତ ସହାୟତା ଯୋଗାଇ ଦିଆଯାଇଛି ।