ମେଡିକାଲରେ ନାହିଁ କୋଭିଡ ଟିକା, ନିରାଶ ଜନତା

କୋଭିଡ ଟିକା ନେବାକୁ ଆସି ହତାଶ ହେଉଛନ୍ତି ଲୋକେ। ଡାକ୍ତରଖାନାରେ ଟିକା ନଥିବାରୁ ଟିକା ନେବାକୁ ଆସୁଥିବା ବୟସ୍କ ଲୋକେ ନିରାଶ ହୋଇ ଫେରୁଛନ୍ତି।

ଅନୁଗୋଳ: ଜିଲ୍ଲା ମୁଖ୍ୟ ଚିକିତ୍ସାଳୟରେ ନାହିଁ କୋଭିଡ ଟିକା । କୋରୋନାରୁ ସୁରକ୍ଷିତ ରହିବାକୁ ଚାହୁଁଥିବା ଲୋକ ଟିକା ନେବାକୁ ଆସି ହୀନସ୍ତା ଭୋଗୁଛନ୍ତି। ସକାଳୁ ସକାଳୁ ଡାକ୍ତରଖାନାକୁ ଟିକା ନେବାପାଇଁ ଆସି ଲୋକେ ଟିକା ନେଇ ନପାରି ନିରାଶ ହୋଇ ଫେରିଛନ୍ତି । ଟିକା ସରିଯାଇଥିବା ନେଇ କର୍ତ୍ତୃପକ୍ଷ ପୂର୍ବରୁ ସୂଚନା ଦେଇ ନଥିବାରୁ ଲୋକେ ଅସୁବିଧା ଭୋଗୁଛନ୍ତି।

ଯାହାକୁ ନେଇ ନିଜର ଅସନ୍ତୋଷ ଜାହିର କରିଛନ୍ତି ଲୋକେ। ଏନେଇ କୋଭିଡ ପରିଚାଳନା ଥିବା ଡାକ୍ତର କହିଛନ୍ତି କେବଳ ମୁଖ୍ୟ ଡାକ୍ତରଖାନାରେ ଟିକା ସରି ଯାଇଛି । ଶନିବାର କିମ୍ବା ରବିବାର ସୁଦ୍ଧା ଟିକା ପହଞ୍ଚିବ । ଦୁଇଦିନ ତଳେ ଆସିଥିବା ଦୁଇ ହଜାର ଡୋଜ ଜିଲ୍ଲାର ଅନ୍ୟ ଡାକ୍ତର ଖାନାର ଟୀକାକରଣ କେନ୍ଦ୍ରକୁ ପଠାଇ ଦିଆଯାଇଛି ବୋଲି ସୂଚନା ଦେଇଛନ୍ତି ଡାକ୍ତର।

ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ