ହାଇଦ୍ରାବାଦ:ଟୋକିଓରୁ ଶନିବାର ପ୍ରଥମ ଖୁସି ଖବର ଆସିଛି । ଅଲମ୍ପିକରେ ଭାରତର ଆରମ୍ଭ (Silver medal in Tokyo olympic)ରୌପ୍ୟ ପଦକରୁ ହୋଇଛି । ଭାରତ ପାଇଁ 49 କିଲୋଗ୍ରାମ ବର୍ଗରେ ଭାରୋତ୍ତୋଳନରେ ସୈଖୋମ ମୀରାବାଇ ଚାନୁ(Saikhom Mirabai Chanu ) ପ୍ରଥମ ପଦକ ହାସଲ କରିଛନ୍ତି । ଭାରୋତ୍ତୋଳନରେ ଭାରତକୁ 20 ବର୍ଷ ପରେ ପଦକ ମିଳିଛି, ପୂର୍ବରୁ 2000 ସିଡନୀ ଅଲମ୍ପିକ୍ରେ କର୍ଣ୍ଣମ ମାଲେଶ୍ବରୀ ବ୍ରୋଞ୍ଜ ପଦକ ଜିତିଥିଲେ ।
ପିଲାଦିନେ ଜାଳେଣୀ କାଠ ବିଡା ଉଠାଇବା ଠାରୁ ମୀରାବାଇ ଚାନୁଙ୍କ ଭାରୋତ୍ତୋଳନକାରୀ ପୋଡିୟମ ପର୍ଯ୍ୟନ୍ତ ପହଞ୍ଚିବାର ଯାତ୍ରା ଅତ୍ୟନ୍ତ ସଂଘର୍ଷମୟ ରହିଛି । ଅଲମ୍ପିକରେ ରୂପା ପଦକ ଜିତିବା ପୂର୍ବରୁ ନିଜର ପ୍ରଥମ ସ୍ବର୍ଣ୍ଣ ପଦକ ମାତ୍ର 11 ବର୍ଷ ବୟସରେ ଜିତିସାରିଥିଲେ । ନିଜ ଅଞ୍ଚଳର ଭାରୋତ୍ତୋଳନ ଚମ୍ପିଆନସିପ୍ରେ ସେ ବିଜୟୀ ହୋଇଛନ୍ତି ।
ରିପୋର୍ଟ ଅନୁସାରେ, ମୀରାବାଇ ଚାନୁଙ୍କ ଜନ୍ମ 8 ଅଗଷ୍ଟ 1994ରେ ନୈଙ୍ଗପୋକ କାଚିଙ୍ଗ ଅଞ୍ଚଳର ଏକ ହିନ୍ଦୁ ପରିବାରରେ ଜନ୍ମଗ୍ରହଣ କରିଥିଲେ। ନୈଙ୍ଗପୋକ କାଚିଙ୍ଗ ଇମ୍ଫାଲରେ ରହିଛି ଓ ଇମ୍ଫାଲ ମଣିପୁରର ରାଜଧାନୀ । ମାତ୍ର ପ୍ରତିଯୋଗିତାରେ ବିଜୟ ପରେ ପରିବାର ଲୋକେ ଚାନୁଙ୍କ ଶକ୍ତିକୁ ଜାଣିପାରିଥିଲେ । ମାତ୍ର 12 ବର୍ଷ ବୟସରେ ସେ ସହଜରେ ଯେଉଁ କାଠବିଡା ସବୁ ଘରକୁ ନେଇଆସୁଥିଲେ, ସେହି ସବୁକୁ ଉଠାଇବାକୁ ତାଙ୍କ ଭାଇଙ୍କ ପକ୍ଷରେ କଷ୍ଟକର ଥିଲା ।
କୁଞ୍ଜୁରାନୀ ଦେବୀ ହେବାର ସ୍ୱପ୍ନ ତାଙ୍କୁ ଅଲମ୍ପିକ ପଦକ ବିଜୟିନୀ ବନାଇଦେଇଛି:
26 ବର୍ଷୀୟା ମୀରାବାଇ ଚାନୁ ଏକ ୱେବସାଇଟକୁ ସାକ୍ଷାତକାରରେ କହିଛନ୍ତି, ଯେବେ ସେ ଛୋଟ ଥିଲେ, ସେବେ କୁଞ୍ଜୁରାନୀ ଦେବୀଙ୍କ ପ୍ରଦର୍ଶନ ଦେଖିଥିଲେ । ଏତେ ଓଜନିଆ ଭାର କିପର କୁଞ୍ଜୁରାନୀ ସହଜରେ ଉଠାଇଦେଉଛନ୍ତି ଦେଖି ଆଶ୍ଚର୍ଯ୍ୟ ହୋଇଥିଲେ । ପରେ ସେ ତାଙ୍କର ପିତା ସୈଖମ କ୍ରିତି ମାଇତିଙ୍କ ଆଗରେ ଜଣେ ଭାରୋତ୍ତୋଳନକାରୀ ବନିବାକୁ ଇଚ୍ଛା ଥିବା କହିଥିଲେ । ପିତା ରାଜି ହୋଇଯାଇଥିଲେ । ଛୋଟ ଝିଅର ଏପରି ଦୃଢ ଲକ୍ଷ୍ୟ ଦେଖି ମା' ଅଗବି ତାମ୍ବି ଲେମା ମଧ୍ୟ ରାଜି ହୋଇଯାଇଥିଲେ ।
କୁଞ୍ଜୁରାନୀ ଦେବୀ ବିଶ୍ବ ଭାରୋତ୍ତୋଳନ ଚମ୍ପିଆନସିପରେ 7ଥର ରୌପ୍ୟ ପଦକ ଓ ଏସିଆନ ଗେମ୍ସରେ ମଧ୍ୟ ଦୁଇଥ ବ୍ରୋଞ୍ଜ ପଦକ ଜିତିସାରିଛନ୍ତି । ଚାନୁ କହିଛନ୍ତି, ଯେବେ ସେ ବଡ ହେଉଥିଲେ, ସେବେ ମଣିପୁରର ଝିଅ କୁଞ୍ଜୁରାନୀ ଦେବୀ ନଚେତ ସାନିଆ ମୀର୍ଜା ବନିବାକୁ ଚାହୁଁଥିଲେ । ଚାନୁ କୁଞ୍ଜୁରାନୀଙ୍କୁ ଅନୁକରଣ କରିଛନ୍ତି । ଅତୀତର ଏହି କଥା ଆଗକୁ ବଢାଇବା ପୂର୍ବରୁ ସୂଚନାଯୋଗ୍ୟ ଯେ, 2016ରେ ଯେବେ ରିଓ ଅଲମ୍ପିକ ପାଇଁ ଟ୍ରାଏଲ ଚାଲୁଥିଲା ସେବେ ଚାନୁ କୁଞ୍ଜୁରାନୀ ଦେବୀଙ୍କ 12 ବର୍ଷ ତଳର ପୁରୁଣା ରେକର୍ଡ ଭଙ୍ଗ କରିଥିଲେ ଓ ଭାରତୀୟ ଟିମରେ ସ୍ଥାନ ପକ୍କା କରିଥିଲେ ।
କୋଚ୍ ପ୍ରତିଦିନ ଚିକେନ ଖାଇବାକୁ କହିଥିଲେ, ମାତ୍ର ଘରେ ଟଙ୍କା ନଥିଲା:
ଏବେ କାହାଣୀ ସଂଘର୍ଷର, ଯେଉଁ ରାସ୍ତାରେ ସମସ୍ତ ଭାରତୀୟ ଖେଳାଳି ଦିନେ ଆସିଥାନ୍ତି । କୁଞ୍ଜୁରାନୀଙ୍କୁ ଅନୁସରଣ କରି ମୀରାବାଇ ଚାନୁ 2008ରେ ଖୁମନ ଲମ୍ପକ ସ୍କୋର୍ଟ୍ସ କମ୍ପ୍ଲେକ୍ସରେ ଭାରୋତ୍ତୋଳନ ଟ୍ରେନିଂ ଆରମ୍ଭ କରନ୍ତି । ତାଙ୍କ ଗାଁରେ କୌଣସି ଭାରୋତ୍ତୋଳନ ସେଣ୍ଟର ନଥିଲା ଫଳରେ ଇମ୍ପାଲ ସହରକୁ ଯିବାକୁ ତାଙ୍କୁ ପ୍ରତିଦିନ 44 କିଲୋମିଟର ଯିବାକୁ ପଡୁଥିଲା ।
ଚାନୁ ଇଣ୍ଟରଭିନ୍ୟୁରେ କହିଛନ୍ତି, ଅଭ୍ୟାସ ସମୟରେ କୋଚ୍ ତାଙ୍କୁ ସୁଷମ ଖାଦ୍ୟ ଖାଇବାକୁ ପରାମର୍ଶ ଦେବା ସହ ଖାଦ୍ୟର ଏକ ତାଲିକା (Diet Chart)ଧରାଇଦେଇଥିଲେ । ମୀରାବାଇଙ୍କ 5 ଭାଇ ଭଉଣୀ ରହିଛନ୍ତି ଓ ସେ ସମସ୍ତଙ୍କ ଠାରୁ ସାନ । ପବ୍ଲିକ ୱାର୍କ ଡିପାର୍ଟମେଣ୍ଟରେ ପିତା କାମ କରୁଥିଲେ ଓ ମା' ଅଧିକ ରୋଜଗାର ପାଇଁ ଏକ ଦୋକାନ ଚଳାଉଥିଲେ । ଏପରି ଅବସ୍ଥାରେ ଏହି ଖର୍ଚ୍ଚ ପରିବାର ପାଇଁ ବୋଝ ଭଳି ଥିଲା । ମାତ୍ର ଇଚ୍ଛାଶକ୍ତି ଓ ଦୃଢ ମନୋବଳକୁ କଣ ସହଜରେ ହାର୍ ମାନିପାରିବ । ଏ ନେଇ ଚାନୁ ନିଜ ଅଭ୍ୟାସ ଜାରି ରଖିଥିଲେ ।