ହାଇଦ୍ରାବାଦ: ୪୧ ବର୍ଷ ଧରି ଭାରତୀୟ ହକିର ଅଲମ୍ପିକ ପଦକ ମରୁଡ଼ିରେ ଗୁରୁବାର ଅଜାଡ଼ି ହୋଇପଡ଼ିଛି ଅସରାଏ ବର୍ଷା । ୧୯୮୦ ପରେ ପ୍ରଥମ ଥର ପାଇଁ ଅଲମ୍ପିକ୍ ପଦକ ଜିତିଛି ଭାରତ । ଜର୍ମାନୀକୁ ୫-୪ରେ ପରାଜିତ କରି ଇତିହାସ ରଚିଛି ଭାରତୀୟ ହକି ଟିମ । ତେବେ ଅଲମ୍ପିକ ପଦକର ଏହି ମରୁଡ଼ି ପୂର୍ବରୁ ଏମିତି ଦିନ ଥିଲା ଯେତେବେଳେ ଭାରତୀୟ ହକି ସାରା ବିଶ୍ବରେ କରୁଥିଲା ରାଜ୍ ।
ଅଲମ୍ପିକ ଇତିହାସରେ ୮ଟି ସ୍ବର୍ଣ୍ଣ ଜିତି ଆଜି ବି ସବୁଠାରୁ ସଫଳ ଟିମ୍ ହୋଇରହିଛି ଭାରତ । ତେବେ ଆସନ୍ତୁ ନଜର ପାକାଇବା ଭାରତର ଅଲମ୍ପିକ ପଦକ ବିଜୟ ଯାତ୍ରା ଉପରେ ।
୧୯୨୮ ଅଲମ୍ପିକ୍, ଆମଷ୍ଟରଡାମ: ସ୍ବର୍ଣ୍ଣ
୧୯୨୮ ମସିହାରେ ଭାରତୀୟ ହକି ଅଲିମ୍ପିକ୍ ଡେବ୍ୟୁ କରିଥିଲା । ଏହା ୧୦ ଟି ଅଲମ୍ପିକ ରନ୍ ମଧ୍ୟରୁ ପ୍ରଥମ ରନ୍ । ଯେଉଁଥିରେ ଭାରତ ପୋଡିୟମ ଉପରକୁ ଚଢ଼ିଥିଲା ଆଉ ତାପରେ କ୍ରମାଗତ ୬ଟି ଅଲମ୍ପିକ ସ୍ବର୍ଣ୍ଣ ପଦକ ଜିତିଥିଲା । ଗ୍ରୁପ୍ ପର୍ଯ୍ୟାୟରେ ରହିଥିଲା ଭାରତୀୟ ଟିମ୍ର ଦବଦବା । ସେମାନଙ୍କ ବିପକ୍ଷରେ କେହି ମଧ୍ୟ ଗୋଟିଏ ଗୋଲ୍ ସ୍କୋର କରି ପାରିନଥିଲେ । ଆଉ ଶେଷରେ ନେଦରଲାଣ୍ଡକୁ ହରାଇ ସ୍ବର୍ଣ୍ଣ ପଦକ ନିଜ ନାଁରେ କରିଥିଲା ଭାରତ ।
୧୯୨୮ ଅଲମ୍ପିକ୍, ଲସ ଆଞ୍ଜେଲସ୍: ସ୍ବର୍ଣ୍ଣ
ମେଜର ଧ୍ୟାନ ଚାନ୍ଦ ଜିତାଇଥିବା ତିନୋଟି ସ୍ବର୍ଣ୍ଣ ପଦକ ମଧ୍ୟରୁ ଏହାଥିଲା ଦ୍ବିତୀୟ ଯେଉଁଥିରେ ପ୍ରଥମ ଥର ପାଇଁ ମେଜର ହକି କିମଦନ୍ତୀ ଧ୍ୟାନ ଚାନ୍ଦ ଟିମ୍ରେ ଅଧିନାୟକ ହୋଇଥିଲେ । କେବଳ ତିନୋଟି ଦଳ ଏହି ଅଲମ୍ପିକ୍ ରେ ଭାଗ ନେଇଥିଲେ । ଆଉ ଜାପାନ ଉପରେ ୧୧-୧ ଏବଂ ଆମେରିକା ଉପରେ ୨୪-୧ରେ ବିଜୟ ହାସଲ କରିବା ସହ ଭାରତ ଏକଛତ୍ର ଭାବେ ବିଜେତା ହୋଇଥିଲା । ଆମେରିକା ବିପକ୍ଷ ମ୍ୟାଚରେ ଧ୍ୟାନ ଚାନ୍ଦ ଆଠଟି ଗୋଲ ସ୍କୋର କରିଥିଲେ ଏବଂ ରୁପ ସିଂ ୧୦ ଟି ଗୋଲ୍ ସ୍କୋର କରିଥିଲେ ଯାହା ଅଲମ୍ପିକ୍ ଇତିହାସରେ ସବୁଠାରୁ ବଡ଼ ବ୍ୟବଧାନର ବିଜୟ ଥିଲା ।
୧୯୩୬ ଅଲମ୍ପିକ୍, ବର୍ଲିନ: ସ୍ବର୍ଣ୍ଣ
ଭାରତ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ସବୁ ଟିମ୍ ଉପରେ ଭାରି ପଡ଼ିଥିଲା । ସେମିଫାଇନାଲରେ ଫ୍ରାନ୍ସକୁ ୧୦-୦ରେ ଓ ଫାଇନାଲରେ ଜର୍ମାନୀକୁ ୮-୧ରେ ପରାଜିତ କରି ଅପରାଜୟ ହୋଇ ରହିଥିଲା ଭାରତ ।
୧୯୪୮ ଅଲମ୍ପିକ୍, ଲଣ୍ଡନ: ସ୍ବର୍ଣ୍ଣ
ସ୍ବାଧୀନତା ପରେ ଏହା ଭାରତର ପ୍ରଥମ ଅଲମ୍ପିକ ଥିଲା ଏବଂ ଦ୍ବିତୀୟ ବିଶ୍ବଯୁଦ୍ଧ ପରେ ଅନୁଷ୍ଠିତ ହୋଇଥିବା ପ୍ରଥମ ଅଲିମ୍ପିକ୍ । ସ୍ବର୍ଣ୍ଣ ପଦକର ହ୍ୟାଟ୍ରିକ୍ ଜିତିଥିବା ଦଳଠାରୁ ଏହା ଏକ ସମ୍ପୂର୍ଣ୍ଣ ଭିନ୍ନ ଦଳ ଥିଲା । କିନ୍ତୁ ଭାରତ ପୁନର୍ବାର ନିଜର ପ୍ରାଧାନ୍ୟ ବିସ୍ତାର କରିଥିଲା । ଭାରତୀୟ ଦଳ ଫାଇନାଲରେ ପ୍ରଥମ ଥର ପାଇଁ ଗ୍ରେଟ ବ୍ରିଟେନର ସମ୍ମୁଖୀନ ହୋଇଥିଲା ଏବଂ ମ୍ୟାଚକୁ ୪-୦ରେ ଜିତିନେଇଥିଲା ।
୧୯୫୨ ଅଲମ୍ପିକ୍, ହେଲସିନକି: ସ୍ବର୍ଣ୍ଣ
ସେମିରେ ଗ୍ରେଟ ବ୍ରିଟେନକୁ ୩-୧ରେ ପରାସ୍ତ କରିବା ପୂର୍ବରୁ କ୍ବାର୍ଟର ଫାଇନାଲରେ ଭାରତ ଅଷ୍ଟ୍ରେଲିଆକୁ ୪-୦ରେ ପରାସ୍ତ କରିଥିଲା । ଫାଇନାଲରେ ସେମାନେ ନେଦରଲ୍ୟାଣ୍ଡ ସହ ମୁହାଁମୁହିଁ ହୋଇଥିଲେ ଏବଂ ବାଲବୀର ସିଂ ଶ୍ରୀରାମ ପାଞ୍ଚଟି ଗୋଲ ସ୍କୋର କରି ଭାରତକୁ ୬-୧ ବିଜୟୀ କରାଇଥିଲେ ।
୧୯୫୬ ଅଲମ୍ପିକ୍, ମେଲବର୍ଣ୍ଣ: ସ୍ବର୍ଣ୍ଣ
ମେଲବର୍ଣ୍ଣ ଅଲିମ୍ପିକ୍ର ଶେଷ ଦୁଇଟି ମ୍ୟାଚରେ ଭାରତ ପୁଣି କିଛି ଚ୍ୟାଲେଞ୍ଜର ସମ୍ମୁଖୀନ ହୋଇଥିଲା । ହକି ପଡ଼ିଆରେ ପ୍ରଥମ ଥର ପାଇଁ ପାକିସ୍ତାନକୁ ଫାଇନାଲରେ ପରାସ୍ତ କରିବା ପୂର୍ବରୁ ସେମିଫାଇନାଲରେ ସେମାନେ ଜର୍ମାନୀକୁ ୧-୦ ରେ ପରାସ୍ତ କରିଥିଲେ । ଭାରତ ଏହି ମ୍ୟାଚକୁ ପାକିସ୍ତାନ ଠାରୁ ୧-୦ରେ ଜିତିଥିଲା ।
୧୯୬୦ ଅଲମ୍ପିକ୍, ରୋମ: ରୌପ୍ୟ
ପାକିସ୍ତାନ ହିଁ ଶେଷରେ ଭାରତର ଅଲମ୍ପିକ ଆଧିପତ୍ୟକୁ ସମାପ୍ତ କରିଥିଲା । ଫାଇନାଲରେ ପାକିସ୍ତାନ ସହ ମୁହାଁମୁହିଁ ହେବା ପୂର୍ବରୁ ୩୦ଟି ଅଲିମ୍ପିକ ମ୍ୟାଚରେ ଭାରତ ଅପରାଜିତ ରହିଥିଲା । ଭାରତ ୧-୦ରେ ମ୍ୟାଚ ହାରି ରୌପ୍ୟ ପଦକ ଜିତିଥିଲା ।
୧୯୬୪ ଅଲମ୍ପିକ୍, ଟୋକିଓ: ସ୍ବର୍ଣ୍ଣ
ଫାଇନାଲରେ ପୁଣି ପାକିସ୍ତାନକୁ ମୁକାବିଲା କରି ଭାରତ ଶୀର୍ଷକୁ ଫେରିଥିଲା ଏବଂ ଏଥର ବିଜୟୀ ଦଳ ଭାବେ ଉଭା ହୋଇଥିଲା । ମୋହିନ୍ଦର ଲାଲ ଭାରତ ପାଇଁ ଗୋଲ ସ୍କୋର କରିଥିଲେ ଓ ଭାରତ ଫାଇନାଲକୁ ୧-୦ରେ ଜିତିଥିଲା ।
୧୯୬୮ ଅଲମ୍ପିକ୍, ମେକ୍ସିକୋ ସିଟି: କାଂସ୍ୟ
ନ୍ୟୁଜିଲ୍ୟାଣ୍ଡ ଠାରୁ ପରାସ୍ତ ହୋଇ ଭାରତ ଏହି ଟୁର୍ନାମେଣ୍ଟ ଆରମ୍ଭ କରିଥିଲା କିନ୍ତୁ ପରେ ପଶ୍ଚିମ ଜର୍ମାନୀ, ଜାପାନ, ସ୍ପେନ୍, ମେକ୍ସିକୋ, ପୂର୍ବ ଜର୍ମାନୀ ଏବଂ ବେଲଜିୟମ ବିପକ୍ଷରେ ପରବର୍ତ୍ତୀ ୬ଟି ମ୍ୟାଚ୍ ଜିତି ନେଇଥିଲା । ତେବେ ଅଲମ୍ପିକ ଇତିହାସରେ ପ୍ରଥମ ଥର ପାଇଁ ଅଷ୍ଟ୍ରେଲିଆ ଠାରୁ ହାରି ଟିମ ଫାଇନାଲକୁ ଯିବାରୁ ବଞ୍ଚିତ ହୋଇଥିଲା । ତେବେ କାଂସ ପଦକ ଜିତିବା ପାଇଁ ସେମାନେ ପଶ୍ଚିମ ଜର୍ମାନୀକୁ ପୁଣି ଥରେ ପରାସ୍ତ କରିଥିଲେ ।
୧୯୭୨ ଅଲମ୍ପିକ୍, ମୁନିଚ: କାଂସ୍ୟ
ସେମିଫାଇନାଲରେ ପାକିସ୍ତାନ ମୁହାଁମୁହିଁ ହେବା ପୂର୍ବରୁ ଭାରତ ଟୁର୍ଣ୍ଣାମେଣ୍ଟରେ ଅପରାଜିତ ରହିଥିଲା । କିନ୍ତୁ ସେମିଫାଇନାଲରେ ପାକିସ୍ତାନ ମ୍ୟାଚକୁ 2-0ରେ ଜିତି ଭାରତକୁ ପୁଣି କାଂସ୍ୟ ପଦକ ପାଇଁ ଲଢ଼େଇ କରିବାକୁ ବାଧ୍ୟ କରିଥିଲା । କାଂସ୍ୟ ପଦକ ପାଇଁ ମ୍ୟାଚରେ ନେଦରଲ୍ୟାଣ୍ଡକୁ ୨-୧ରେ ପରାସ୍ତ କରି ପଦକ ଜିତିଥିଲା ଭାରତ।
୧୯୮୦ ଅଲମ୍ପିକ୍, ମସ୍କୋ: ସ୍ବର୍ଣ୍ଣ
୧୯୭୨ ଅଲମ୍ପିକ ସହ ଏକ ଯୁଗର ସମାପ୍ତି ହୋଇଥିଲା ଓ ଆସିଥିଲା ଆଷ୍ଟ୍ରୋ ଟର୍ଫ ପିଚ୍ ଯାହାକି ଭାରତର ପଦକ ଯାତ୍ରାକୁ ଏକପ୍ରକାର ସମାପ୍ତ କରି ଦେଇଥିଲା । ୧୯୮୦ ଅଲିମ୍ପିକ୍ସରେ ଅନେକ ଦେଶ ନାମ ପ୍ରତ୍ୟାହାର କରିଥିବା ହେତୁ ନକ୍ଆଉଟ୍ ପର୍ଯ୍ୟାୟ ହୋଇନଥିଲା । ୧୯୬୪ ପରେ ଭାରତ ପ୍ରଥମ ଥର ପାଇଁ ସ୍ପେନକୁ ୪-୩ ରେ ପରାସ୍ତ କରି ସ୍ବର୍ଣ୍ଣ ପଦକ ଜିତିଥିଲା ।
୨୦୨୦ ଅଲମ୍ପିକ୍, ଟୋକିଓ: କାଂସ୍ୟ
୧୯୮୦ ଅଲିମ୍ପିକ୍ ଏକ ବ୍ୟତିକ୍ରମ ଭାବେ ପ୍ରମାଣିତ ହୋଇଥିଲା । କାରଣ ଏହାପରେ ଭାରତ ବିଶ୍ବ ହକି ସବୁଠାରୁ ପଛରେ ରହିଯାଇଥିଲା । ଆଉ ସବୁଠାରୁ ଦୁଃଖର ବିଷୟ ଥିଲା ଭାରତ ୨୦୦୮ ବେଜିଂ ଅଲମ୍ପିକ୍ ପାଇଁ ଯୋଗ୍ୟତା ମଧ୍ୟ ଅର୍ଜନ କରି ପାରିନଥିଲା । ୨୦୧୬ ରିଓ ଅଲମ୍ପିକ୍ରେ ଭାରତ କ୍ବାର୍ଟର ଫାଇନାଲ ପର୍ଯ୍ୟନ୍ତ ପହଁଞ୍ଚିଥିଲା କିନ୍ତୁ ପଦକ ଆଶା ସେଥର ମଧ୍ୟ ମଉଳି ଯାଇଥିଲା । ଚଳିତ ଅଲମ୍ପିକ୍ରେ କିନ୍ତୁ ଭାରତୀୟ ହକି ଦଳ ୪ ଦଶନ୍ଧିର ପ୍ରତୀକ୍ଷାର ଅନ୍ତ ଘଟାଇ ଦେଶ ପାଇଁ ଆଣି ଦେଇଛି ପଦକ । ସେମି ଫାଇନାଲରେ ହାଇଯାଇଥିଲେ ମଧ୍ୟ କାଂସ୍ୟ ପଦକ ମ୍ୟାଚରେ ଜର୍ମାନୀକୁ ୫-୪ ରେ ମାତ ଦେଇ ବିଜୟୀ ହୋଇଛି ଟିମ୍ ।
ବ୍ୟୁରୋ ରିପୋର୍ଟ, ଇଟିଭି ଭାରତ
