ନୂଆଦିଲ୍ଲୀ:ଦେଶବାସୀଙ୍କ ଉଦ୍ଦେଶ୍ୟରେ ପଦକ ଉତ୍ସର୍ଗ କଲେ ମୀରାବାଇ ଚାନୁ । ଦେଶବାସୀଙ୍କ ପ୍ରାର୍ଥନା ଓ ଭଲ ପାଇବା ପାଇଁ ଟୋକିଓ ଅଲମ୍ପିକରେ ରୌପ୍ୟ ପଦକ ବିଜୟିନୀ ସୈଖମ ମୀରାବାଇ ଚାନୁ ଦେଶବାସୀଙ୍କ ଉଦ୍ଦେଶ୍ୟରେ ପଦକ ଉତ୍ସର୍ଗ କରିଛନ୍ତି । ରିଓ ଅଲମ୍ପିକରେ ପଦକ ବିଜୟ ସ୍ବପ୍ନ ଚୁରମାର ପରେ ଟୋକିଓରେ ସଫଳ ହୋଇଛନ୍ତି ମୀରା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରେରଣାଦାୟୀ ଶବ୍ଦ, ନିଷ୍ଠା ଓ କଠିନ ପରିଶ୍ରମ ମଧ୍ୟ ଟୋକିଓରେ ଭାରତ ପାଇଁ ପ୍ରଥମ ପଦକ ଜିତିବାରେ ସହାୟକ ହୋଇଥିବା କହିଛନ୍ତି ମୀରାବାଇ । ଫଳରେ ବିଜୟ ମନ୍ତ୍ର ସହ ଉତ୍ସାହିତ କରିଥିବାରୁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଜଣାଇଛନ୍ତି ମଣିପୁରୀ ଭାରୋତ୍ତଳନକାରୀ ।
ଘରକୁ ଫେରିବା ପରେ ଚାନୁ କହିଛନ୍ତି, "ଭାରତୀୟଙ୍କ ଭଲପାଇବା ଓ ପ୍ରାର୍ଥନା ପାଇଁ ମୁଁ ଏହି ପଦକ ଜିତିପାରିଛି । ମୁଁ ସମସ୍ତଙ୍କୁ ବିଶେଷ କରି ଦେଶକୁ ଗର୍ବିତ କରିବାକୁ କ୍ରୀଡାକୁ କ୍ୟାରିୟର ବାଛିଥିବା ଝିଅଙ୍କୁ ଶୁଭେଚ୍ଛା ଜଣାଉଛି । ଦେଶବାସୀଙ୍କ ଉଦ୍ଦେଶ୍ୟରେ ମୁଁ ମୋର ପଦକ ଉତ୍ସର୍ଗ କରୁଛି । ଉତ୍ସାହିତ କରିଥିବାରୁ ପ୍ରଧାନମନ୍ତ୍ରୀ ଓ କ୍ରୀଡାମନ୍ତ୍ରୀଙ୍କୁ ଧନ୍ୟବାଦ ।"