ୱାଶିଂଟନ: ଷ୍ଟାର ଟେନିସ ଖେଳାଳି ନୋଭାକ ଜୋକୋଭିକ ଓ ପେଟ୍ରା କ୍ବିତୋଭା ୟୁଏସ ଓପନରେ ତୃତୀୟ ପର୍ଯ୍ୟାୟ ମ୍ୟାଚ ଜିତିବା ପରେ ଅନ୍ତିମ 16ରେ ନିଜର ସ୍ଥାନ ପକ୍କା କରିଛନ୍ତି ।
ପୁରୁଷ ଏକକ ବର୍ଗ ଜୋକୋଭିକ ଜେନ-ଲେନାର୍ଡ ଷ୍ଟ୍ରଫଙ୍କୁ 6-3. 6-3, 6-1 ସେଟରେ ପରାସ୍ତ କରିଛନ୍ତି । ଶୁକ୍ରବାର ଏହି ମ୍ୟାଚ ଆର୍ଥର ଆଶ ଷ୍ଟାଡିୟମରେ 1 ଘଣ୍ଟା 42 ମିନିଟ ଧରି ଚାଲିଥିଲା ।
ମ୍ୟାଚ ପରେ ଜୋକୋଭିକ କହିଛନ୍ତି, ‘‘ମୋ ପକ୍ଷରୁ ଏହା ଏକ ଭଲ ପ୍ରଦର୍ଶନ ଥିଲା । ମୁଁ ତାଙ୍କ ସର୍ଭକୁ ବୁଝିବାରେ ସମର୍ଥ ହେଲି । ଯାହାପରେ ମୁଁ ମୋର ବିଜୟର ବାଟ ପାଇଗଲି, ଖାସ କରି ପ୍ରଥମ ସେଟ ପରେ । କୋର୍ଟରେ ଦ୍ବିତୀୟ ଓ ତୃତୀୟ ସେଟ ଖୁବ୍ ଭଲ ଅନୁଭବ ଦେଇଥିଲା ।’’
‘‘ମୁଁ ଗତ କିଛି ସପ୍ତାହ ଧରି ଭଲ ଖେଳୁଛି, ଭଲ ଅଭ୍ୟାସ କରିଛି, ସଠିକ ଜିନିଷ ଉପରେ ଧ୍ୟାନ ଦେଇଛି, ସେହି ସ୍ତର ପ୍ରଦର୍ଶନ ବଜାୟ ରଖିଛି ଓ ଆଶା କରୁଛି ସବୁକିଛି ଖୁବ୍ ଭଲ ହେବ । ମୋ ଗେମକୁ ନେଇ ମୋର ଆତ୍ମବିଶ୍ବାସ ରହିଛି ଓ ମୁଁ ପ୍ରତିଟି ମ୍ୟାଚରେ ତାହା ପ୍ରଦର୍ଶନ କରିବି,’’ ବୋଲି ଜୋକୋଭିକ କହିଛନ୍ତି ।