ଆବୁଧାବି:ଟି-୨୦ ବିଶ୍ବକପରେ ଆଜି ବାଂଲାଦେଶ ଓ ଇଂଲଣ୍ଡ ମଧ୍ୟରେ ସୁପର ୧୨ ମ୍ୟାଚ ଖେଳାଯାଉଛି । ଏହି ମ୍ୟାଚ ପାଇଁ ପ୍ରଥମେ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଛି ବାଂଲାଦେଶ । ଆବୁଧାବିରେ ଏହା ଦ୍ବିତୀୟ ମ୍ୟାଚ ଖେଳାଯାଉଛି । ଏହା ପୂର୍ବରୁ ଏହି ଷ୍ଟାଡିୟମରେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମୁହାଁମୁହିଁ ହୋଇଥିଲେ ।
ଟସ୍ ଜିତି ବାଂଲାଦେଶ କ୍ୟାପଟେନ ମହମ୍ମଦୁଲ୍ଲା କହିଛନ୍ତି ଯେ, "ପିଚଂ ବ୍ୟାଟିଂ ପାଇଁ ଅନୁକୂଳ ମନେ ହେଉଛି । ଏଥିପାଇଁ ପ୍ରଥମେ ଆମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛୁ । ଏକ ବଡ଼ ବିଜୟଲକ୍ଷ୍ୟ ଧାର୍ଯ୍ୟ କରିବାକୁ ଆମେ ଚେଷ୍ଟା କରିବୁ । ଆଜି ଦଳରେ ୩ଜଣ ସ୍ପିନରଙ୍କୁ ସ୍ଥାନ ଦିଆଯାଇଛି । ଭଲ ଖେଳିବାକୁ ଚେଷ୍ଟା କରିବୁ ।"
ସେପଟେ ବିପକ୍ଷ ଦଳ ଅଧିନାୟକ ଇଅନ ମୋର୍ଗାନ କହିଛନ୍ତି ଯେ, "ଲକ୍ଷ୍ୟ ପିଛା କରିବାରେ ଆମର ଭଲ ରେକର୍ଡ ରହିଛି । ପିଚ୍ ମଧ୍ୟ ବ୍ୟାଟିଂ ପାଇଁ ଅନୁକୁଳ ରହିବ । ଅଧିକାଂଶ ଖେଳାଳି ଆମର ଏଠାରେ ଆଇପିଏଲ ଖେଳିଥିଲେ । ମ୍ୟାଚରେ ଭଲ ପ୍ରଦର୍ଶନ କରିବା ଆମର ମୂଳ ଲକ୍ଷ୍ୟ ।"
ଆଜିର ମ୍ୟାଚ ପାଇଁ ବାଂଲାଦେଶ ଦଳରେ ଗୋଟିଏ ପରିବର୍ତ୍ତନ କରିଛି । ସୈଫୁଦ୍ଦିନଙ୍କ ସ୍ଥାନରେ ସ୍ପିନର ଶୋରିଫୁଲ ଇସଲାମଙ୍କୁ ଦଳରେ ସ୍ଥାନ ଦିଆଯାଇଛି । ପ୍ରଥମ ମ୍ୟାଚ ଶୀଲଙ୍କା ବିପକ୍ଷରେ ଖେଳି ପରାଜୟ ବରଣ କରିଥିଲା ବାଂଲାଦେଶ । ଆଜିର ମ୍ୟାଚରେ ବିଜୟ ହାସଲ କରି ସେମିଫାଇନାଲ ଆଶା ବଞ୍ଚାଇ ରଖିବାକୁ ଚେଷ୍ଟା କରିବ ବାଂଲାଦେଶ । ସେପଟେ ଇଂଲଣ୍ଡ ଟୁର୍ଣ୍ଣାମେଣ୍ଟରେ ତାର ଦ୍ବିତୀୟ ମ୍ୟାଚ ଖେଳିବ । ପ୍ରଥମ ମ୍ୟାଚରେ ୱେଷ୍ଟଇଣ୍ଡିଜ୍କୁ ପରାଜିତ କରିଥିଲା ଦଳ ।