ବିଶ୍ବ ଆଥଲେଟିକ ଚମ୍ପିଆନସିପ: ନିରାଶ କଲେ ଦୂତୀ, ହାତରୁ ଗଲା ଅଲମ୍ପିକ ଟିକେଟ

ବିଶ୍ବ ଆଥଲେଟିକ ଚମ୍ପିଆନସିପରେ ଭାରତୀୟ ଷ୍ଟାର ଧାବିକା ଦୂତୀ ଚାନ୍ଦ ସମସ୍ତଙ୍କୁ ନିରାଶ କରିଛନ୍ତି । ମହିଳା 100 ମିଟର ଦୌଡ ଇଭେଣ୍ଟରେ ଦୂତୀ ନୈରାଶ୍ୟଜନକ ପ୍ରଦର୍ଶନ କରି ସେମିଫାଇନାଲରୁ ବାଦ ପଡିଛନ୍ତି ।

ଦୋହା: ବିଶ୍ବ ଆଥଲେଟିକ ଚମ୍ପିଆନସିପରେ ଭାରତୀୟ ଷ୍ଟାର ଧାବିକା ଦୂତୀ ଚାନ୍ଦଙ୍କ ନୈରାଶ୍ୟଜନକ ପ୍ରଦର୍ଶନ । ଆରମ୍ଭରୁ ଦୂତୀଙ୍କୁ ବଡ ଝଟକା ଲାଗିଛି । ମହିଳା 100 ମିଟର ଦୌଡ ଇଭେଣ୍ଟରେ ଦୂତୀ ସମସ୍ତଙ୍କୁ ନିରାଶ କରିଛନ୍ତି ।

11.48 ସେକେଣ୍ଡରେ ଦୌଡ ଶେଷ କରିଛନ୍ତି ଦୂତୀ । ମୋଟ 8ଜଣ ଆଥଲେଟଙ୍କ ମଧ୍ୟ ଦୂତୀ 7ମ ସ୍ଥାନରେ ପହଞ୍ଚିଛନ୍ତି । ସମାନ ଟ୍ରାକରେ ଦୂତୀ ଚଳିତ ବର୍ଷ ଏପ୍ରିଲରେ ଜାତୀୟ ରେକର୍ଡ 11.26 ନିଜ ନାମରେ କରିଥିଲେ । ସେଥିପାଇଁ 100 ମିଟର ବର୍ଗରେ ଦୂତୀ ଆହୁରି ଭଲ ପ୍ରଦର୍ଶନ କରିବା ନେଇ ଆଶା କରାଯାଉଥିଲା ।

ପ୍ରଥମରୁ ଭଲ ଆରମ୍ଭ କରିଥିଲେ ଦୂତୀ । ମାତ୍ର ପରେ ଅନ୍ୟ ଆଥଲେଟଙ୍କ ଠାରୁ ଦୂତୀ ପଛରେ ପଡିଯାଇଥିଲେ । ତେବେ ଏହି ପ୍ରଦର୍ଶନ ପରେ ସେ ସେମିଫାଇନାଲରୁ ବାଦ ପଡିଛନ୍ତି । ଏଥିସହିତ ଏହି ବର୍ଗରେ ଅଲମ୍ପିକ ଯୋଗ୍ୟତା ହାସଲରୁ ବଞ୍ଚିତ ହୋଇଛନ୍ତି ଦୂତୀ । 2017 ଲଣ୍ଡନ ବିଶ୍ବ ଚମ୍ପିଆସିପରେ ଦୂତୀ 12.07 ସେକେଣ୍ଡରେ ପହଞ୍ଚି ସେମିଫାଇନାଲରୁ ବାଦ ପଡିଥିଲେ ।